Fréttablaðið - 07.12.2013, Blaðsíða 96

7. desember 2013 LAUGARDAGUR| MENNING | 96
Jafnrétti verður yfirskriftin á alþjóð-
lega listaverkefninu Inside Out þegar það
kemur til Íslands í desember og verður
afraksturinn frumsýndur á Laugaveg-
inum á Þorláksmessu. Forsprakki verk-
efnisins á Íslandi er Katrín Olafsson, nemi
í ljósmyndun, sem búsett er í New York.
Hugmyndin að því að koma með verkefnið
hingað til lands kviknaði í heimsókn Katr-
ínar á vinnustofu franska ljósmyndarans
JR, sem er upphafsmaður verkefnisins.
„Í heimsókninni tók ég eftir korti þar
sem merkt hafði verið við þá staði í heim-
inum þar sem Inside Out-verkefnið hafi
verið unnið. Ég tók eftir því að það átti
eftir að vinna slíkt verkefni á Íslandi og
nú er ég á leiðinni heim að koma þessu í
verk,“ segir Katrín. Tilgangur verkefnis-
ins er að sögn Katrínar að vekja fólk til
umhugsunar um gildi sem þeir listamenn,
sem eru í forsvari fyrir verkefnið í hverju
landi fyrir sig, telji mikilvæg. Katrín valdi
jafnréttið, sem Íslendingar eru þekktir
fyrir um allan heim.
„Ég vildi sýna heiminum að jafnrétti
skiptir okkur Íslendinga máli. Þó svo að
við stöndum vel miðað við önnur lönd
getum við alltaf gert betur.“ Katrín mun
taka andlitsmyndir af öllum þeim sem
hafa áhuga á að leggja verkefninu lið.
Andlitsmyndirnar verða svo prentaðar og
hengdar upp á sérstökum stað á Laugaveg-
inum. „Ég vil að það komi fólki á óvart
hvar þetta verður á Laugaveginum. En
þetta á eftir að vekja athygli allra sem
ganga Laugaveginn á Þorláksmessu,“
útskýrir Katrín. Ásamt henni mun Nanna
Rúnarsdóttir stýra verkefninu. Hún mun
festa verkefnið á filmu og er hugmyndin
að gera stuttmynd um framkvæmdina hér
á landi.
„Hinn 16. desember munum við taka
myndir af þeim sem vilja vera með. Við
verðum með aðstöðu hjá Elite í Ármúl-
anum og verðum með opið frá kl. 16 til 22
og vonumst til þess að fá sem flesta. Ég
vonast líka til að fá sem flesta til þess að
hjálpa okkur. Verkefnið gengur út á að fá
fólk til þess að starfa saman að góðu mál-
efni. Við viljum helst að þjóðin taki öll
þátt,“ segir Katrín. kjartanatli@frettabladid.is
Vilja fá þjóðina í lið með jafnrétti
Alþjóðlega listaverkefnið Inside Out er á leið til Íslands. Afrakstur verkefnisins verður frumsýndur á Laugaveginum á Þorláksmessu.
VINSÆLT VERKEFNI Inside Out hefur notið mikilla vinsælda um allan heim og verið unnið í 108 löndum. SVARTHVÍTAR MYNDIR Í verkefninu notast listamenn við svarthvítar myndir á fjölförnum stöðum.
➜ Inside Out-verkefnið hófst árið
2011. Upphafsmaðurinn er franski ljós-
myndarinn JR. Hann vann til TED-verð-
launanna fyrir hugmyndina. Hann vill
breyta heiminum og nota til þess svart-
hvítar andlitsmyndir af fólki og hengja
þær upp á fjölförnum stöðum. Verk-
efnið hefur verið unnið í 108 löndum
og hafa 120 þúsund manns tekið þátt
í því.