Litli Bergþór - 01.07.2014, Blaðsíða 32

32 Litli-Bergþór
Við hér á Krummaklettum sem er eldri barna deild
í leikskólanum Álfaborg, erum búin að vera að gera
margt mjög skemmtilegt saman í vetur.
Við unnum meðal annars skemmtilegt verkefni í
kringum tónverkið Pétur og úlfurinn. Við hlustuðum
á tónlistina, ræddum söguþráðinn, lásum bókina og
settum síðan upp leikrit sem var tekið upp. Börnin
unnu að mynddiski og gáfu foreldrum sínum í
jólagjöf. Börnin elska að fá að taka þátt og það styrkir
sjálfsmynd þeirra.
Eftir áramót höfum við verið að taka fyrir tónverkið
Svanavatnið og höfum við m.a. búið okkur til stóran
svan, skoðað myndir, búið okkur til vængi úr pappír
og prófað að fljúa um í kaðli. Þetta tengist yfirþema
vetrarins sem er fuglar. Við höfum líka búið til
fuglahús úr mjólkurfernum, gert páskaunga úr leir,
skoðað uppstoppaða fugla, gefið krumma að borða
og fleira skemmtilegt. Það er afskaplega gaman að
vinna svona með ákveðið þema, skoða það frá ýmsum
hliðum og vinna þvert á listgreinar. Nota fjölbreyttan
efnivið og ræða , rannsaka og skoða efnið til hlítar.
Leikurinn er líka í hávegum hafður og í gegnum
hann læra börnin svo margt m.a. að sýna hvert öðru
tillitssemi, hjálpsemi, þolinmæði og vináttu. Þau
læra að tjá sig á ýmsan hátt og leggja grunn að lestri,
stærðfræði og öllu öðru námi framtíðarinnar.
Elsti árgangurinn hefur farið einu sinni í viku út í
grunnskóla með kennara sínum í allan vetur og er það
samstarf frábært. Börnin læra á grunnskólann sinn,
kynnast kennurum, verklagi og innviðum skólans
sem gerir þau öruggari og auðveldar flutning yfir
á næsta skólastig. Markvisst hefur verið unnið að
undirbúningi fyrir grunnskóla á ýmsan annan hátt m.a.
með markvissum málörvunarstundum, skipulagðri og
frjálsri verkefnavinnu og eru stafir , orð og tölur höfð
sýnileg í skólanum.
Við vinnum í anda Reggio Emilia og þar er m.a.
lögð áhersla á frelsi einstaklingsins og frelsi til að tjá
sig á sem fjölbreyttastan hátt, t.d. í gegnum tónlist
og myndlist. Það lýsir sér m.a. í því að börnin hafa
frjálsan aðgang að ýmsum efnivið s.s. bókum,
spilum, litum og pappír. Elstu árgangarnir okkar
í leikskólanum hafa haft þennan aðgang alla sína
leikskólagöngu og sýna þau og sanna hve gott það er.
Þau eru sérstaklega örugg með sig og sköpunargleði
þeirra fær að njóta sín, það er hlustað á hugmyndir
þeirra og þær oftast framkvæmdar. T.d. vildu nokkrir
drengir gera sína eigin skrifstofu. Það var ekkert mál,
þeir sóttu borð, stóla og kassa sem þeir breyttu í hin
ýmsu skrifstofutæki, prentara og fl. Þeir báðu síðan
kennarann að kenna sér að skrifa nafn skrifstofunnar
og skilti sem segði lokað. Skrifstofan fékk nafnið
Aðalstrákaskrifstofan. Þarna jókst trú þeirra á sjálfan
sig, það reyndi á útsjónarsemi, lýðræði, samvinnu og
fleira merkilegt.
Nú er vorið og sólin komin og gaman að hlaupa um,
fara í fræðandi rannsóknar- og gönguferðir og njóta
okkar fallegu náttúru sem mest. Börnin eru yndisleg
og forréttindi að fá að vinna með þessum ungu, flottu
og sterku einstaklingum sem kenna okkur og gefa svo
margt alla daga. Það er yndislegt að fá að taka þátt í
lífi þeirra á svo mikilvægum tíma og að fá að styðja
þau og styrkja og undirbúa fyrir lífið sem bíður fullt
af tækifærum. Það er alltaf gaman og tilfinningaríkt
að útskrifa flotta krakka að vori og horfa á eftir þeim
út í lífið. Starf leikskólakennarans er einkar gefandi og
skemmtilegt. Takk fyrir okkur.
Fyrir hönd eldri
deildar leikskólans:
Agnes Heiður Magnúsdóttir
deildarstjóri.
Leikskólinn Álfaborg,
Krummaklettar mars 2014
Metta Malin Bridde og Arnaldur Ármann. Það er svo
gaman úti.
Jóhann Hilmir Sigurðarson og Samúel Örn Sigurvinsson
í lögguleik.