Dagur - 07.12.1987, Blaðsíða 15

7. desember 1987 - DAGUR - 15
Kveðjuorð:
Halldór Jónsson
bóndi
Fæddur 12. desember 1919 - Dáinn 27. nóvember 1987
Fáir þekkja fegurð Öxnadals til
fullnustu aðrir en þeir, sem búa
þar eða dveljast langdvölum.
Ljós og litir leika um hrikaleg
fjöllin eftir skýjafari, veðri og
vindum og fáir fá augum litið það
sjónarspil allt aðrir en þeir, sem
með því fylgjast dag hvern um
langa hríð. Mest er fegurðin um
miðbik dalsins, „þar sem háir
hólar, hálfan dalinn fylla“, og
Hraundrangar og Hólahyrna
kallast á um dalinn þveran. Þver-
brekkuhnjúkur gnæfir í suðvestri
og Blámannshattur lokar fjalla-
hringnum til norðausturs handan
Eyjafjarðar, þótt ekki sjái á
Eyjafjörðinn sjálfan. Fjallahring-
urinn myndar trausta umgjörð
um byggðina í dalnum og mótar
skapgerð þess fólks, sem þar er
fætt og uppalið og skapar því
öryggi og festu, jafnframt því
sem nálægðin við víðáttu Eyja-
fjarðar eykur því víðsýni og sjón
til margra átta. Eitt af börnum
dalsins, sem þannig hafði mótast,
var Halldór Jónsson, bóndi að
Hólum í Öxnadal, en jarðarför
hans er gerð frá Akureyrarkirkju
mánudaginn 7. desember 1987.
Hann lést á Fjórðungssjúkrahús-
inu á Akureyri föstudaginn 27.
nóvember s.l. Andlát hans bar
óvænt að garði og reið yfir fjöl-
skyldu, vini og vandamenn sem
ógnþrungið og óundirbúið högg.
Eftir sitja eiginkona og börn í
hljóðri sorg og hnípnir vinir eiga
engin ráð önnur en fátækleg
huggunarorð.
Halldór Jónsson fæddist 12.
desember 1919 að Efstalandskoti
í Öxnadal. Foreldrar hans voru
Jón Jónsson og Jóhanna Sigurð-
ardóttir, er þar bjuggu þá og síð-
ar að Engimýri í Öxnadal. Al-
systkini Halldórs voru 5 og er eitt
þeirra látið, eða Sigríður, sem
bjó á Akureyri og lést fyrir
nokkrum árum. Gísli, bróðir
Halldórs, er bóndi að Engimýri í
Öxnadal, María systir hans býr í
Reykjavík og Aðalheiður tví-
burasystir hans býr á Akureyri.
Yngstur systkinanna er
Hermann, sem búsettur er á
Akureyri. Hálfbróður áttu þau
systkinin, Jónas Jónsson í Hrauni
í Öxnadal, og var hann elstur.
Svo sem títt var um þær mundir
fór Halldór að vinna í búi for-
eldra sinna með systkinum sínum
svo fljótt sem vettlingi varð
valdið, en fór ungur að heiman
að vinna fyrir sér. Fyrst fór hann
að Bakka í Öxnadal, þar sem
hann dvaldi fram á unglingsárin,
en síðan vann hann um margra
ára skeið á Pverá í Öxnadal hjá
Önnu Sigurjónsdóttur og
Ármanni Porsteinssyni frá
Bakka, en bæði þessi heimili að
Bakka og á Þverá voru Halldóri
jafnan mjög kær. Hjá Önnu og
Ármanni á Þverá taldi hann sér
heimili alveg fram að þvf er hann
stofnaði sitt eigið heimili. Reynd-
ar dvaldi hann einnig oft hjá
Gísla bróður sínum og Maríu
konu hans að Engimýri, en með
þeim Halldóri og Gísla og fjöl-
skyldu voru miklir og nánir kær-
leikar. Auk landbúnaðarstarf-
anna heima í dalnum vann Hall-
dór um skeið á Keflavíkurflug-
velli við landmælingar, en þau
störf opnuðu honum sýn til nýrra
átta og þjálfuðu hann í ensku
máli, sem hann áður hafði numið
í skóla. Halldór stundaði nám í
tvo vetur í Reykholtsskóla í
Borgarfirði og síðan nam hann
einn vetur og eitt sumar að
Bændaskólanum á Hvanneyri.
Hugðist hann halda þar áfram
námi en veiktist þá af lömunar-
veiki og nokkrum árum síðar
veiktist hann hastarlega af Ákur-
eyrarveikinni, sem lagðist svo
þungt á hann að honum var vart
hugað líf um nokkurra vikna
skeið. Þótt Halldór næði sér að
því er virtist að fullu eftir þau
miklu veikindi, með elju og
þrautseigju, áttu þau þó vafalaust
þátt í að hjarta hans var ekki svo
sterkt fyrir sem haldið var þegar
hinsta kallið gerði sín fyrstu boð
aðfaranótt föstudagsins 27.
nóvember s.l.
Á árinu 1963 urðu þáttaskil í
lífi Halldórs Jónssonar. Hann
hafði endurheimt heilsu og þor
og horfði hugdjarfur til framtíð-
arinnar. Hann hafði kynnst einni
heimasætunni að Ási á Þela-
mörk, Fjólu Rósantsdóttur, þau
felldu hugi saman og gengu í hei-
lagt hjónaband þann 6. febrúar
1963. Þar var stigið mikið gæfu-
spor í lífi beggja, en þau hafa síð-
an búið saman í ást, vináttu og
gagnkvæmri virðingu, einstak-
lega samhent í lífi og starfi. Var
unun að heyra til þeirra og sjá,
þegar þau saman sinntu búskap-
arverkunum með léttleika,
glettni og góðlátlegri kímni, en
búskapurinn átti hug þeirra og
hjarta og lék þeim í höndum.
Halldór var einstaklega glöggur
sauðfjárbóndi, umgekkst bústofn
sinn af alúð og hlýju, þekkti enda
hvern einstakling sem um pers-
ónulegan vin eða kunningja væri
að ræða. Það má orða það svo,
að sauðféð hafi örugglega átt
góða vist hjá Halldóri í Hólum.
Þau Halldór og Fjóla hófu
búskap að Syðra-Brekkukoti í
Arnarneshreppi. Árið 1969 flutt-
ust þau að Naustum IV við Akur-
eyri og stundaði þá Halldór ýmis
störf á Akureyri, t.d. byggingar-
vinnu, framleiðslustörf í Efna-
verksmiðjunni Sjöfn og síðast
starfaði hann hjá Verksmiðjuaf-
greiðslu KEA. Þann 1. júní 1978
fluttu þau að Engimýri í Öxna-
dal, þar sem þau hófu búskap í
félagi við ættmenni Halldórs þar,
en 7. september 1980 fluttu þau
að Hólum í Öxnadal, þar sem
Halldór bjó til æviloka og Fjóla
býr enn með börnum þeirra
hjóna. Þeim varð fjögurra barna
auðið. Daníel Jón fæddist 23.
desember 1962, en andaðist af
slysförum þann 26. desember
1969, eða 7 ára gamall. Næst elst-
ur er Rúnar Jens, fæddur 6.
nóvember 1964. Hann hefur
sinnt ýmsum störfum heima að
búi með foreldrum sínum eða á
Akureyri, en hefur nú horfið til
bús með móður sinni eftir svip-
legt andlát föðurins. Næst er
Dóra Heiða fædd 10. apríl 1969,
hún nemur við Verkmenntaskól-
ann á Akureyri, og yngst er Dal-
rós Jóhanna, fædd 26. október
1972 en hún dvelur í heimahús-
um og stundar nám í Laugalands-
skóla á Þelamörk. Þeimr'Sem til
þekkja, ber saman um að Daníel
Jón hafi verið efnilegur og yndis-
legur drengur. Andlát hans varð
foreldrum hans mikið áfall og þótt
þau bæru harm sinn í hljóði
máttu kunnugir greina sára kviku
undir rólegu yfirborði, þegar
drengurinn barst í tal, og vafa-
mál, að Halldór hafi nokkru sinni
náð sér að fullu eftir áfallið, sem
hann varð fyrir við slysið, sem
leiddi drenginn til dauða. En
þeim sáru tilfinningum var aldrei
flíkað. Börnin, sem eftir lifa, eru
mannvænleg í besta lagi og fylkja
sér með móður sinni í erfiðleik-
um líðandi stundar og á göngunni
framundan.
Kynni okkar Halldórs Jónsson-
ar hófust fyrir alvöru þegar hann
flutti með fjölskyldu sína að Hól-
um í Öxnadal á árinu 1980. Við
höfðum reyndar kynnst nokkuð
meðan þau bjuggu í Engimýri frá
árinu 1978. Eins hafði ég veitt
athygli þessum trausta og vandaða
manni, er hann starfaði hjá KEA
á árum áður og góður vinskapur
hafði tekist með eiginkonum
okkar þegar á árinu 1969 þegar
þær ólu dætur nánast samtímis á
Fæðingardeildinni á Akureyri.
En náin kynni og vinátta hófust að
Hólum, þar sem við hjónin og
börn okkar dveljum gjarnan,
þegar tómstundir gefast. Kynnin
við Halldór Jónsson og fjölskyldu
hans hafa öll verið hin ánægjuleg-
ustu. Halldór verður mjög eftir-
minnilegur hverjum þeim, er
honum kynntist náið en kannske
voru þeir ekki mjög margir, sem
honum kynntust á þann hátt, því
hann var maður dulur undir sínu
rólega og afar vinsamlega yfir-
borði. Hann var einstaklega
heiðarlegur og vandaður, vel
greindur og traustur, átti sér
hlýja kímnigáfu og var víðsýnn í
sinni traustu skaphöfn. Hann var
hlýr heimilisfaðir og góður vinur
vina sinna. Við hjónin kveðjum
hann í hljóðlátri þökk og börnin
okkar senda honum vinarkveðjur
á skilnaðarstundu, sérstaklega
þau sem utanbæjar og erlendis
dveljast og ekki geta fylgt honum
síðustu sporin.
Þrátt fyrir blíðviðrið um þessar
mundir hafa skammdegisskugg-
arnir dökknað og dýpkað. Tóm
sest að sálinni við þungan missi.
Mestur er missir eiginkonu og
barna, sem leita sér huggunar hjá
góðum Guði og í minningunni
um kæran eiginmann og föður.
Vinir og vandamenn leita sér
huggunar í handleiðslu Guðs og í
minningunni um góðan dreng,
sem gott var dð eiga samleið
með. Við ferðalok Halldórs Jóns-
sonar má rifja upp hendinguna úr
Ferðalokum eftir Jónas Hall-
grímsson. „Ástarstjörnu/yfir
Hraundranga/skýla næturský."
Skammdegisský skýla nú ástar-
stjörnunni þeirra í Hólum, en öll
ský leysir um síðir og stjörnurnar
gefa fyrirheit um endurfundi í
fyllingu tímans.
Innilegar samúðarkveðjur eru
sendar heim í Hóla til Fjólu og
barnanna.
Valur Arnþórsson.
Auglýsing frá ríkisskattstjóra
Verðbreytingarstuðull
fyrir árið 1987
Samkvæmt ákvæðum 26. gr. laga nr. 75 14. september
1981 um tekjuskatt og eignarskatt hefur ríkisskattstjóri
reiknað verðbreytingarstuðul fyrir árið 1987 og nemur
hann 1,1795 miðað við 1,0000 á árinu 1986.
Reykjavík 1. desember 1987,
Ríkisskattstjóri.
Auglýsing
varðandi réttindi til
fasteigna- og skipasölu
Samkvæmt 5. gr. reglugerðar nr. 520 24. nóvember 1987,
skulu lögmenn sem reka fastfeigna- og skipasölu og ekki
hafa hlotið leyfi til fasteignasölu samkvæmt lögum nr. 47/
1938 sækja um löggildingu samkvæmt 2. gr. laga nr. 34/
1986 fyrir 31. desember 1987 hyggjast þeir stunda slíka
starfsemi eftir þann tíma.
Þeir sem hlotið hafa leyfi til fasteignasölu samkvæmt lög-
um nr. 47/1938 og stunda fasteignasölu skulu sömuleiðis
fyrir 31. desember 1987 framvísa í dómsmálaráðuneytinu
gögnum um að þeir fullnægi ákvæðum reglugerðar nr.
520/1987 um tryggingarskyldu.
Jafnframt skulu fasteignasalar tilkynna ráðuneytinu hvar
starfsstöð þeirra er en samkvæmt 2. mgr. 6. gr. laga nr.
34/1986 getur fasteignasali aðeins haft eina starfsstöð, á
sama stað og fasteignasalan er rekin. Þá skulu fasteigna-
salar einnig senda ráðuneytinu til staðfestingar eyðublað
það sem þeir hyggjast nota fyrir söluumboð samkvæmt 9.
gr. laga nr. 34/1986 og 2. gr. reglugerðar nr. 520/1987.
Umsóknareyðublöð fást í dóms- og kirkjumálaráðuneyt-
inu, Arnarhvoli.
Dóms- og kirkjumálaráðuneytið, 1. desember 1987.
Ritari
ístess hf. óskar eftir að ráða ritara.
Um er að ræða hlutastarf, en gera má ráð fyrir að
innan tíðar verði um fullt starf að ræða. Starfið fellst
einkum í vélritun, símavörslu og öðrum almennum
skrifstofustörfum. Viðkomandi þarf að hafa gott vald
á norsku (eða öðru Norðurlandamáli), góða vélritun-
arkunnáttu og reynsla við tölvuvinnslu er æskileg.
Allar upplýsingar eru gefnar á skrifstofu fyrirtækis-
ins, Glerárgötu 30, Akureyri, eða í síma 96-26255.
Skriflegum umsóknum skal skilað á skrifstofu fyrir-
tækisins eigi síðar en 14. desember n.k.
ístess hf. Glerárgötu 30, Akureyri © 96-26255
Vélgæslumaður
ístess hf. óskar að ráða vélgæslumann.
Um er að ræða vaktavinnu, a.m.k. mestan hluta
ársins. Æskilegt er að viðkomandi hafi reynslu af
meðferð véla og tölvubúnaðar.
Allar upplýsingar eru gefnar á skrifstofu fyrirtækis-
ins, Glerárgötu 30, Akureyri, eða í síma 96-26255.
Skriflegum umsóknum skal skilað á skrifstofu fyrir-
tækisins eigi síðar en 14. desember n.k. Eldri
umsóknir óskast endurnýjaðar.
ístess hf. Glerárgötu 30, Akureyri S 96-26255