Morgunblaðið - 28.05.2003, Blaðsíða 16

FYRSTA mótið í Íslandsmeistarakeppninni í
rallakstri var haldið um síðustu helgi og fór
keppnin fram á Reykjanesi. Það voru Akst-
ursíþróttafélag Suðurnesja og Bílar & Hjól
sem stóðu fyrir keppninni, en alls tóku 16
áhafnir þátt í henni.
Búist var við harðri keppni um fyrsta sætið
á milli þeirra bræðra Rúnars Jónssonar og
Baldurs Jónssonar á Subaru og Sigurðar
Braga Guðmundssonar og Ísaks Guðjónsson-
ar á Metro. Óhætt er að segja að þeir Metro-
menn hafi komið öflugir undan vetri og áttu
þeir besta tíma á fyrstu leið, en einungis 12
áhafnir skiluðu sér út af þeirri sérleið. Í fyrri
ferð um Ísólfsskála náðu bræðurnir sama
tíma og þeir Sigurður og Ísak og á fyrri ferð
um Djúpavatn náðu Rúnar og Baldur forystu
í rallinu, eftir að hafa ekið sérleiðina á sjö sek-
úndum skemmri tíma og munar þá aðeins
einni sekúndu á milli fyrsta og annars sætis.
Á þessari leið sprengdu þeir Sighvatur og
Úlfar á Jeep dekk og var þá draumur þeirra
um verðlaunasæti úti. Baráttan um þriðja
sætið var mikil, enda fjórar áhafnir að slást
um það.
Á seinni ferð um Djúpavatn náðu bræð-
urnir aftur sjö sekúndum betri tíma og lögðu
grunn að fyrsta sigri sínum á þessu keppn-
istímabili, því erfitt var fyrir þá Metro-menn
að ná upp þessu forskoti á þeim stuttu leiðum
sem eftir voru í keppninni. Áhorfendur voru
þó nokkrir og þá sérstaklega á tveimur síð-
ustu leiðum rallsins sem voru eknar innan-
bæjar í Keflavík, nánar tiltekið um höfnina.
Þar náðu þeir Sigurður og Ísak aðeins að
klóra í bakkann og ná betri tímum í báðum
ferðum en þeir bræður. Sást þar greinilega að
Metro-inn er í fínu formi og hefur sennilega
sjaldan verið betri. Verður því gaman að sjá
þessa ökumenn kljást við þá bræður í sumar.
Gaman er að sjá hvað Rúnar hefur náð sér vel
af þeim veikindum sem hrjáðu hann í fyrra og
ekki langt í að hann nái sínum besta hraða á
ný.
Guðmundur og Jón í þriðja sæti
Í þriðja sæti í rallinu enduðu þeir Guð-
mundur og Jón á Subaru, en þetta var þeirra
fyrsta keppni saman á þessum bíl, eftir góðan
og öruggan akstur. Nokkuð öflugur bíll, en þó
ekki eins og toppbílarnir. Í fjórða sæti og að-
eins einni sekúndu á eftir þriðja sætinu end-
uðu þau skötuhjú Daníel og Sunneva á
Honda, eftir ævintýralegan akstur um hafn-
arsvæðið, þar sem besti tími fyrri ferðar þar
var þeirra. Reyndar var nokkru til kostað þar
sem þau reyndu að smeygja sér nokkuð hratt
í gegnum hraðahindrun, sem sett var upp til
að takmarka hraðann á sérleiðinni. Endaði sú
tilraun með því að bæði frambrettin urðu fyr-
ir tjóni, ljós og fleira smávægilegt. Hins vegar
náðist mun betri tími en ella, en það bara
dugði ekki til að ná verðlaunasæti. Hins vegar
mega þau vera nokkuð ánægð með að vinna
hinn nýja flokk, svokallaðan 2000 rúmsenti-
metra flokk. Sighvatur og Úlfar enduðu í
fimmta sæti og feðginin Sigurður og Elsa í því
sjötta, en þau eru á nýrri nokkuð öflugri fjór-
hjóladrifinni bifreið sem þau eiga eftir að ná
betri tökum á. Kristinn og Jóhannes á Nissan
náðu að klára keppnina á undan þeim reynslu-
boltum Þorsteini og Witek, sem enn einu sinni
lenda í því að bíllinn þeirra svíkur á miðri sér-
leið. Þurftu þeir að fara þar út og gera við
bensínslöngu sem dottið hafði úr sambandi og
töpuðu þannig miklum tíma. Ingólfur og Guð-
mundur á Suzuki lentu í níunda sæti, Ragnar
og Árni á Toyota í því tíunda og Daníel og
Halldór á Honda ráku lestina.
Næsta keppni verður 21. júní og verður þá
ekið um Suðurland.
Íslandsmeistaramótið í rallakstri
Hörð barátta um fyrsta sætið
Morgunblaðið/Gunnlaugur Einar
Sigurður Bragi Guðmundsson og Ísak Jónsson á Rover Metro.Bræðurnir Rúnar Jónsson og Baldur Jónsson á Subaru Legacy.
16 B MIÐVIKUDAGUR 28. MAÍ 2003 MORGUNBLAÐIÐ
bílar
ALLIR ökumenn vænta þess af sín-
um bíl að stýringin sé nákvæm og
rétt og bíllinn fari beina línu án út-
úrdúra, nema auðvitað þegar beygt
er. Þegar bílnum er beygt á hann
eingöngu að fara þá leið sem honum
er stýrt og rétta sig síðan af og fara
beina línu þegar út úr beygjunni er
komið. Þetta virðast frekar einföld
sannindi og margir taka því sem
gefnu að bíllinn hagi sér með þessu
móti. Af þessum sökum vanrækja
margir ökumenn eða gleyma því að
fara með bílinn í hjólastillingu. Yf-
irleitt þarf þess þó ekki nema fram-
endi bílsins verði fyrir einhverju
hnjaski.
Verði menn varir við neðangreind
vandamál er hyggilegast að fara
með bílinn án tafar á næsta stilling-
arverkstæði í hjólastillingu.
 Stýrishjólið er ekki í réttri
stöðu þegar ekinn er beinn vegur.
 Óeðlileg hljóð heyrast frá fjöðr-
unarbúnaðinum.
 Bíllinn rásar frá einni hlið veg-
ar til hinnar.
 Bíllinn leitast við að beygja til
annarrar hliðar þegar ekinn er beinn
vegur eða þegar hemlað er.
 Titringur er í stýri eða í gegn-
um sæti bifreiðarinnar.
 Stýrið virkar of létt.
 Ekki hefur verið farið með bíl-
inn í hjólastillingu á langan tíma.
 Slit á dekkjunum er ójafnt.
 Það vælir í dekkjunum í beygj-
um.
 Bíllinn réttir sig ekki hnökra-
laust af eftir beygju.
Rétt hjólastilling skiptir sköpum
til að auðvelda ökumönnum stjórn á
ökutækinu og hámarka jafnvægi
bílsins við hemlun. Hún eykur einnig
líftíma hjólbarðanna og gerir akst-
urinn þægilegri.
Nútíma fjöðrunarbúnaður er flók-
inn og krefst þess að jafnvægi sé í
stillingu allra fjögurra hjólanna.
Sumir telja nægilegt að stilla aðeins
af framhjólin en óhætt er að mæla
með því að farið sé með bílinn á
verkstæði þar sem öll fjögur hjólin
eru mæld í tölvu og þau stillt til að
hámarka afköst fjöðrunarkerfisins.
Þess verður þó að geta ekki er
hægt að stilla afturhjól á öllum bíl-
um. Sigurður Ólafsson hjá Vélastill-
ingu sf. í Kópavogi, segir að hjóla-
stilling kosti allt frá 8-13 þúsund
krónur eftir verkstæðum. Hjólin eru
mæld í tölvu og síðan er halli hjól-
anna, millibilið og kasthallinn stilltur.
Það er alltaf hægt að stilla millibil
og það er það sem er höfuðóvin-
urinn, þ.e.a.s. það að hjólin stefni
beint fram. Miðað er við að millibilið
sé jafnt milli fram- og afturenda
hjólsins. Rangt millibil veldur sliti á
hjólbörðum.
Morgunblaðið/Jim Smart
Sigurður Ólafsson hjá Vélastillingu fæst
ekki við annað en að hjólastilla bíla.
Mikilvægi
hjólastillingar
VIÐGERÐIR OG VIÐHALD