Pressan - 06.07.1989, Blaðsíða 23
Fimmtudagur 6. júlí 1989
23
í BEINNI
ÚTSENDINGU
BEINNI ÚTSENDINGU. SLÍKT BÖNORÐ FELUR I
SÉR AÐ HRINGARNIR FÁST AÐ GJÖF OG PAR-
INU ER BOÐIÐ I KVÖLDVERÐ OG KAMPAVÍN
Á VEITINGAHÚSI.
EFTIR: ÖNNU KRISTINE MAGNÚSDÓTTUR — MYNDIR: EINAR ÓLASON
engin alvara í því. Ég vissi að þessi
trúlofunarútsending færi fram ein-
hvern tíma milli eitt og tvö eftir há-
degi á föstudögum. Þetta virtist
alveg vonlaust, það var alltaf á tali,
en svo ákvað ég að reyna einu sinni
enn. Og náði!“
Hún man nákvæmlega hvernig
hún orðaði bónorðið: „Elsku Oli-
ver, viltu giftast mér — eða eiga
mig?“ Oliver Edvardson bílstjóri
var staddur í bifreið sinni á rauðu
ljósi við Staldrið í Breiðholti þegar
hann heyrði bónorðið koma á öld-
um ljósvakans. Það var ekki að sök-
um að spyrja; hann gaf í botn og ók
suður í Kópavog á vinnustað systur
sinnar þar sem hann fékk að
hringja á Bylgjuna. „Ég hljóp niður
í sjoppu og bað afgreiðslufólkið að
stilla á Bylgjuna og hafa útvarps-
tækið hátt stillt!“ segir Heiðdís.
„Og þar stóð ég og beið eftir svar-
inu, sem varð að koma innan tíu
mínútna. Hann náði...!“
Bónorðið tekið upp
ó segulband
Þau ákváðu að bíða með að setja
upp hringana fram að 22 ára af-
mælisdegi Heiðdísar, 28. desember.
Þá þáðu þau boð um að borða á
Hard Rock Café og settu þar upp
hringana sem Jóhannes Leifsson
gullsmiður gaf þeim. „Ég var í
rauninni mjög hissa á sjálfri mér að
hafa hringt," segir hún. „Fjöl-
skyldu minni og vinum fannst þetta
öllum sniðugt en flestir spurðu
hvernig ég hefði þorað þetta. Við
fengum eina mjög skemmtilega
gjöf á trúlofunardaginn. Það var
segulbandsspóla með bónorðinu á!
Ástæðan var sú að vinafólk systur
Olivers var að reyna að ná inn á
Bylgjuna og ætlaði að taka það
bónorð upp. En ég varð fyrri til, svo
það var mitt bónorð sem lenti inni
á spólunni — og hana fengum við
að gjöf. Þetta var allt alveg meiri-
háttar upplifun."
Sonurinn lasinn og síminn
við hliðina á
Agnes Helga Bjarnadóttir var
aldrei slíku vant heima hjá sér á
föstudaginn var þegar trúlofunar-
stundin rann upp á Bylgjunni. Son-
ur hennar og Róberts Lee
Tómassonar, Tómas Lee, var lasinn
og þurfti að hafa mömmu sína hjá
sér. Agnes starfar annars í bygg-
ingarvinnu og vinnur þessa dagana
við byggingu útsýnishússins í
Öskjuhlíð en Róbert er hjúkrunar-
fræðingur á slysadeild Borgar-
spítalans.
Agnes hafði reyndar áður reynt
að ná sambandi við Bylgjuna til að
biðja Róberts „en þá guggnaði ég.
Ég varð svo feimin þegar það var
svarað að ég lagði á“! Þetta var á
föstudegi viku fyrr og Agnes segir
að það hafi verið að hrökkva eða
stökkva í þetta skiptið: „Mér var
búið að detta í hug fyrir löngu að
biðja Róberts á þennan hátt, en ein-
hvern veginn hafði ég aldrei látið
verða af því. Svona bónorð er ólíkt
öllum öðrum og maður gleymir
þessari stund aldrei." Þau Róbert
og Agnes hafa þekkst í fjögur ár og
búið saman mestallan tímann. Son-
urinn Tómas Lee er tveggja ára og
átti sinn þátt í því að mamma hans
hringdi einmitt þennan dag.
Lét hann nú vita af
bónorðinu til öryggis!
Það var stillt á Bylgjuna á slysa-
deildinni og Róbert heyrði því bón-
orðið í beinni útsendingu: „Honum
brá, en var fljótur í símann!“ segir
Agnes. „Áður en hann náði að
hringja á Bylgjuna var ég þó búin
að hringja í hann, því ég ætlaði nú
ekki að láta hann sleppa, ef ske
kynni að hann hefði ekki heyrt bón-
orðið! Á Bylgjunni var ég fyrst Iátin
kynna mig og segja deili á honum
líka en bónorðið sjálft var svona:
„Elsku Bobby minn, viltu giftast
mér því ég elska þig.“ Svo rifjaði ég
upp hvernig við hefðum kynnst. Ég
var alveg að deyja úr feimni og hef
aldrei verið eins stressuð! Og mikið
voru auglýsingarnar margar á
Bylgjunni þennan dag! Ég beið og
beið við útvarpstækið eftir að Ró-
bert hringdi og svaraði bónorðinu
og mér fannst auglýsingarnar aldrei
ætla að taka enda.“ Flestir vinir
Róberts heyrðu bónorðið og síminn
á heimili þeirra stoppaði ekki þann
daginn: „Það var mjög skemmtilegt
að fá svona margar hamingjuóskir
sama daginn!“ segir Agnes.
Ekki segist hún hafa verið búin
að ímynda sér þegar hún var yngri
hvort hún ætti eftir að biðja sér eig-
inmanns: „Reyndar ætlaði ég aldrei
að gifta mig. Mér fannst það hljóta
að vera það leiðinlegasta sem til
væri að verða húsmóðir, eiga karl
og barn! En svo breyttist hugarfarið
þegar ég kynntist Bobby.“ Þau
völdu hringana hjá Jens Guðjóns-
syni á mánudaginn en ætla ekki að
setja þá upp fyrr en á föstudags-
kvöldið þegar þau þiggja boð Café
Óperu um að snæða þar kvöldverð.
3. Oliver Edvardson var á rauöu
Ijósi á Breiðholtsbrautinni þegar
hann heyrði i vinkonu sinni, Heið-
disi Hermannsdóttur, á Bylgjunni.
„Eisku Oliver, viltu giftast mér?“
4. Hartmann Guðmundsson og
Erla Bolladóttir höfðu þekkst i eitt
og hálft ár þegar hann baö hennar í
beinni útsendingu. Þau giftu sig
skömmu síðar og eiga von á fyrsta
barninu i næsta mánuði.