Morgunblaðið - 26.08.2004, Blaðsíða 18

MINNSTAÐUR
18 FIMMTUDAGUR 26. ÁGÚST 2004 MORGUNBLAÐIÐ
AUSTURLAND
LANDIÐ
Hólmavík | Alexandra Hilf frá Hannover í Þýskalandi fer
ótroðnar slóðir í mastersnámi sínu við Eberswalde-háskólann í
Þýskalandi. Hún dvelur nú á Hólmavík í vettvangsnámi á þriðju
önn og stundar rannsóknir á menningar- og viðskiptalegum
áhrifum Galdrasýningar á Ströndum á samfélag og ferðaþjón-
ustu.
Alexandra er 29 ára gömul og er líffræðingur að mennt, en
stundar mastersnám við Eberswalde-háskólann sem er í ná-
grenni Berlínar. Það er fremur fámennur háskóli á þýskan mæli-
kvarða og þar stundar hún nám í stjórnun sjálfbærrar ferðaþjón-
ustu. Námið er nýtt af nálinni og er því enn í mótun. „Það gefur
meira svigrúm til að velja sér óvenjuleg viðfangsefni.“ Alexandra
segir að verkefnið sé þó ekki mastersverkefni sitt, því hún sé á
þriðju og næstsíðustu önninni, sem byggist á vettvangsnámi. Á
fjórðu önninni verður hins vegar unnið að lokaverkefni og mun
hún þá venda kvæði sínu í kross og fjalla um stórt ferðaþjónustu-
fyrirtæki í Þýskalandi.
Meðal viðfangsefna í vettvangsrannsóknum Alexöndru eru
viðhorf ferðamanna til Galdrasýningar á Ströndum. Hún leggur
könnun fyrir gesti sýningarinnar, innlenda jafnt sem erlenda, og
spyr m.a. um viðhorf þeirra til sýningarinnar og hvort þeir hafi
áhuga á að sjá þá hluta sýningarinnar sem áformað er að koma
upp víðar á Ströndum. Viðbrögð þeirra sem hafa svarað könn-
uninni hingað til eru afar jákvæð og telur hún að viðhorfið í sam-
félaginu sé það líka. „Mér skilst að þeir sem höfðu efasemdir í
upphafi hafi líka skipt um skoðun, enda er hér ekkert illt eða ljótt
á ferðinni, heldur er verið að segja merkilega sögu.“ Verkefnið
vinnur Alexandra í náinni samvinnu við Strandagaldur og Sigurð
Atlason sem hún segir afar hjálplegan og hugmyndaríkan.
„Hugmyndin er líka þeirra og þeir munu vonandi njóta góðs af
þessari vinnu og geta notað eitthvað úr skýrslunni minni til hlið-
sjónar við áframhaldandi uppbyggingu á starfseminni. Ég mun
líka taka viðtöl við fólk sem starfar við ferðaþjónustu á Strönd-
um og kynna mér áhrif Galdrasýningarinnar á samfélagið í við-
skiptalegu og menningarlegu samhengi. Þá ætla ég að skoða
hvernig verkefni Strandagaldurs standa nú, hvað má betur fara
og hvernig skynsamlegt sé að halda uppbyggingunni áfram.“
Fékk verkefnið fyrir tilviljun
Aðspurð segir Alexandra að það hafi ekki verið áhugi á göldr-
um eða nornaeðli sem dró hana alla leið til Stranda norður á Ís-
landi, því hafi tilviljun ráðið. „Vinkona mín og skólasystir ætlaði
að vinna þetta og hafði mikinn áhuga en átti ekki heimangengt.
Þegar hún forfallaðist hugsaði ég af hverju ekki ég og bauðst til
að taka þetta að mér.“
Þótt Alexandra hafi aðeins dvalið hér í stuttan tíma hefur hún
farið mikið um Strandir með Sigurði og m.a. skoðað þá staði sem
áformað er að geymi seinni áfanga Galdrasýningar á Ströndum í
Bjarnarfirði og Trékyllisvík. Einnig hefur hún verið kynnt fyrir
nokkrum ferðaþjónustuaðilum sem hún hyggst ræða við og er
það allt saman hluti af verkefninu, ásamt því að starfa við sýn-
inguna.
Alexandra segir að ættingjum og vinum hafi almennt fundist
það uppátæki hennar að fara til Íslands spennandi. „Það voru all-
ir heillaðir, og margir sögðu við mig að þá hefði alltaf langað að
koma til Íslands og vildu gjarnan heimsækja mig hingað.
Kannski kemur systir mín í heimsókn. En þetta eru ekki nema
nítján vikur. Tíminn flýgur áfram. Ég verð komin heim fyrir jól.
Amma er sú eina sem er lítið um þetta gefið, henni er ekki vel við
að ég sé að þvælast svona.“
Alexandra segist þegar vera búin að gera flest það sem dæmi-
gerðir túristar á Ströndum gera og notar til að mynda sundlaug-
ina óspart. Hún á reyndar eftir að fara á hestbak og ef til vill
kemst hún í smalamennsku.
Ísland þekkti Alexandra nokkuð af afspurn, enda hafa for-
eldrar hennar ferðast hingað með skemmtiferðaskipi, en aðeins
séð Reykjavík og Akureyri. „Ég vissi líka að Íslendingar væru
vingjarnlegt fólk, en samt hefur það komið mér mest á óvart
hvað fólkið hér er ótrúlega vingjarnlegt og opið. Allir heilsa öll-
um og eru til í að spjalla. Ég kann mjög vel við það.“
Alexandra er meðal annars búin að fylgjast með þegar Sig-
urður Atlason, í gervi galdramanns af Ströndum, kveður niður
draug með bölvi og ragni og dyggri aðstoð sýningargesta. „Það
stóð lítil stúlka við hliðina á mér og aðstoðaði galdramanninn,
hún var afar hugrökk, en það munaði engu að ég hlypi út því ég
var hálfhrædd.“ Einnig hefur Alexandra kynnst hröfnunum sem
hafa haldið til við sýninguna í sumar. „Þær koma hér daglega eða
annan hvern dag, hvor í sínu lagi reyndar, þær Galdra-Manga og
Galdra-Imba. Þær hafa tekið ástfóstri við Sigurð, eru meira
segja búnar að uppgötva hvar hann á heima. Þær geta verið
mjög stríðnar og stela öllu steini léttara. Reyndu meira að segja
að stela gólfmottunni í anddyri Galdrasýningarinnar í gær en
hún var of þung. Þær eru samt skemmtilegar, ekki síst fyrir
börnin, og skapa andrúmsloft sem minnir á galdra,“ segir Alex-
andra Hilft.
Háskólanemi frá Þýskalandi rannsakar áhrif Galdrasýningar á samfélag og ferðaþjónustu
Allir ánægðir
nema amma
Morgunblaðið/Kristín Sigurrós
Galdrar: Alexandra Hilft í viðeigandi umhverfi á galdrasýn-
ingunni á Hólmavík þar sem hún hefur starfsaðstöðu í sumar.
VERKFRÆÐISTOFA Austurlands hélt
á dögunum upp á 25 ára starfsafmæli í
nýju húsnæði við Kaupvang 5 á Egilsstöð-
um. Er stofan flutt í gamla rjómabúið sem
svo er kallað, sem einnig hefur hýst bak-
arí og handverkshús gegnum árin.
Óli Grétar Metúsalemsson, einn eig-
enda Verkfræðistofu Austurlands, sagði
að eitt stærsta verkefnið hefði verið hönn-
un hitaveitunnar á Egilsstöðum. „Hún er
25 ára í ár og því jafngömul stofunni,“
sagði Óli Grétar. „Svo skemmtilega vill til
að stærsta verkefni stofunnar nú er hönn-
un hitaveitu á Eskifirði. Þá erum við með
fjöldann allan af stærri og smærri verk-
efnum.“ Hjá fyrirtækinu starfa að jafnaði
6 verkfræðingar og eru þeir eigendur,
tækniteiknari og mælingamaður auk ný-
útskrifaðs verkfræðings.
Verkfræðistofa
flyst í rjómabú
TÍÐNI og kostnaður vegna sigl-
inga og flugs á milli Íslands og
Grænlands eru óviðunandi, að mati
samgönguráðherra Norður-
landanna. Þetta var meðal þess
sem rætt var á tveggja daga
löngum samráðsfundi ráðherranna
á Egilsstöðum, en honum lauk á
þriðjudag.
Á fundinum var lögð fram
skýrsla, sem Sturla Böðvarsson
samgönguráðherra lét vinna og fel-
ur í sér úttekt á samgöngum milli
Íslands, Færeyja og Grænlands.
Sturla sagði í samtali við Morg-
unblaðið að helstu niðurstöður út-
tektarinnar væru að mikil og vax-
andi samkeppni virtist vera í
siglingum á milli Færeyja og Ís-
lands og kæmi það ekki á óvart.
„Þörf er á tíðari flugsamgöngum
milli Færeyja og Íslands, en hins
vegar eru siglingar og flug milli
Grænlands og Íslands með þeim
hætti að talið er algerlega óviðun-
andi,“ sagði Sturla. „Ótrúlegur
kostnaður er á flugi milli þessara
tveggja landa og ljóst að það haml-
ar aukningu í ferðamennsku. Farið
verður frekar ofan í þessi mál, ekki
síst höft á flugi til Grænlands, en
ekki er frelsi í flugi á milli Íslands
og Grænlands. Við Íslendingar
lögðum á ráðherrafundinum
áherslu á að þetta yrði opnað þann-
ig að væri með sama hætti og á
milli landanna á hinu evrópska
efnahagssvæði.“
Skuggagjald á
umferðarmannvirki
Norrænu samgönguráðherrarn-
ir fjölluðu einnig um samgöngu-
áætlanagerð og fjármögnun sam-
göngumannvirkja á
Norðurlöndunum. „Hjá okkur er
bygging samgöngumannvirkja, svo
sem vega, jarðganga og brúa nán-
ast eingöngu unnin fyrir skattfé,“
sagði Sturla. „Við ræddum hvaða
möguleikar eru á Norðurlöndum til
að hraða framkvæmdum með sér-
stakri gjaldtöku fyrir notkun um-
ferðarmannvirkja, sérstaklega
vega. Þetta er svokallað skugga-
gjald sem gengur út á að samið er
við fjárfesta um byggingu sam-
göngumannvirkja og síðan greitt
fyrir eftir notkun. Það var sam-
dóma álit okkar að afar mikilvægt
sé að hraða uppbyggingu sam-
göngumannvirkja og leita allra
leiða til að fjármagna þau þannig
að hægt sé að hraða uppbyggingu í
þágu umferðaröryggis og meiri af-
kastagetu, einkum vegakerfisins.“
Dauðaslys og alvarleg
slys óviðunandi
Samgönguráðuneytið hefur yfir-
tekið umferðaröryggismál frá
dómsmálaráðuneyti og tók sam-
gönguráðherra nú í fyrsta sinn þátt
í umræðu norrænna kollega sinna
um þann málaflokk.
Hann segir einhug meðal ráð-
herranna um að dauðaslys og al-
varleg slys í umferðinni séu óvið-
unandi með öllu. „Alvarlegustu
ástæður slíkra slysa á Norðurlönd-
um öllum eru hraðakstur, ölvunar-
akstur og að menn nota ekki bíl-
belti. Nú settum við af stað vinnu
embættismannahóps, sem mun
samræma aðgerðir í umferðarör-
yggismálum til að sporna við þess-
um alvarlegu slysum, því umferð er
vaxandi á vegum og getur leitt til
þess, ef ekki er farið varlega, að
umferðarslys stóraukist.“
Reglur um tilkynningu
flugatvika
Á fundi ráðherranna var jafn-
framt lögð fram skýrsla um meng-
un frá flugi og rætt um að settar
verði reglur fyrir norræn flugfélög
um tilkynningu flugatvika sem
ekki eru þess eðlis að rannsökuð
séu af flugöryggisnefndum. Hug-
myndinni var vel tekið en ráðherr-
arnir telja vænlegra að slíkar regl-
ur séu á víðari grunni, þ.e.
samevrópskum eða á heimsvísu.
Málið verður rætt í nefnd ráð-
herranna í framhaldinu.
Morgunblaðið/Steinunn Ásmundsdóttir
Norrænir samgönguráðherrar luku tveggja daga fundi sínum á Egilsstöðum með því að fara í skoðunarferð í Kárahnjúkavirkjun.
Fundur um samgöngur við Grænland og umferðaröryggismál
Vilja afnema
höft á flugi til
Grænlands
MÖÐRUSVARMI heitir þessi tegund fiðr-
ildis, sem Kjartan Einarsson og Svein-
björn Valur Jóhannsson fundu í húsi
Björgunarsveitarinnar Héraðs, á Egils-
stöðum fyrr í sumar. Afar sjaldgæft er að
finna þessa tegund hér á landi.
Líklegt er, að sögn Erlings Ólafssonar
dýrafræðings, að fiðrildið hafi borist
hingað til lands með annaðhvort vindum
eða varningi.
Möðrusvarmi lifir m.a. í norðanverðri
N-Ameríku og Mið- og S-Evrópu. Hann
fannst fyrst hér á landi árið 1972 en þá
fundust tveir sama dag, að því er fram
kemur í Náttúrufræðingnum.
Ljósmynd/Ragnhildur Aðalsteinsdóttir
Möðrusvarmi
á Egilsstöðum
♦♦♦