Morgunblaðið - 04.11.2005, Blaðsíða 12

12 B FÖSTUDAGUR 4. NÓVEMBER 2005 MORGUNBLAÐIÐ
bílar
FYRSTA íslenska útgáfan af Land
Rover G4 Challenge hefur litið dags-
ins ljós. Útgáfan er að grunni til 38"
breyttur Range Rover árgerð 1985,
en að sögn Davíðs Garðarssonar, eig-
anda bílsins, er lítið eftir af honum að
boddíinu undanskildu.
G4 Challenge er alþjóðleg rall-
keppni sem Land Rover stendur að
og er hún talin ein sú kröfuharðasta
sem um getur fyrir farartæki jafnt
sem ökuþóra. Sérleiðir reyna veru-
lega á torfæruhæfni keppnisbílsins,
auk þess sem keppandinn verður
einnig að sanna hæfni sína í m.a.
klettaklifri, torfæruhjólreiðum og
kajakróðri. Davíð, sem er bifvélavirki
hjá B&L og einn frammámanna Ís-
landrover, segist lengi hafa haft það á
stefnuskránni hjá sér að koma upp ís-
lenskri G4 útgáfu. Ástæðan sé þó ekki
sú að hann stefni á þátttöku í G4.
„Þetta er nú bara fyrir sjálfan mig
gert og aðra áhugamenn um Land
Rover, en G4 bílarnir eru hreinrækt-
uð torfærutröll og verkefnið spenn-
andi með hliðsjón af því. Ég er jafn-
framt svo heppinn að nokkrir
starfsfélaga minna sýndu þessu verk-
efni mikinn áhuga. Þeir höfðu síðan
frumkvæðið að því að klára breyting-
arnar með mér í sjálfboðavinnu, þann-
ig að þetta er ekki síður þeirra verk,
en breytingarnar krefjast þess að bíll-
inn sé tekinn í sundur nánast í frum-
einingar. Svona vinnufélagar eru ekki
á hverju strái,“ segir Davíð. Mest
áberandi við G4 bílana er appelsínu-
guli liturinn, en hann er eitt af þeim
skilyrðum sem þeir verða að uppfylla.
„Önnur skilyrði lúta síðan að torfæru-
hæfninni, en þessir bílar verða að
geta tekist á við nánast öll hugsanleg
akstursskilyrði.“
G4 Challenge er virkilega duglegur við erfiðar aðstæður. Gerður úr fjórum bílum og breyttur fyrir 38" dekk.
Fyrsta íslenska G4 Challenge-útgáfan
Íslenska G4 Challenge-útgáfan er með uppgerða 5 strokka 160 hestafla dísilvél úr
Discovery, gírkassa úr Defender árg. ’99, millikassa úr Discovery árg. ’97 og drif úr
Land Rover ’75 árg. G4 vísar til fjögurra gerða Land Rover, þ.e. Defender, Freelander,
Discovery og Range Rover, en Range Rover Sport var að sjálfsögðu ekki kominn á
markað þegar rallkeppnin hóf göngu sína fyrir um áratug.
Hópurinn sem stóð að fyrstu íslensku útgáfunni af Land Rover G4 Chal-
lenge. Davíð Garðarsson er fjórði frá vinstri.
MITSUBISHI kynnir um þessar
mundir nýjan og gjörbreyttan L-200
pallbíl sem kominn verður á almenn-
an markað fyrri helming næsta árs.
Horfið verður nú frá hinu sterklega
eða verklega útliti vinnubílsins og í
staðinn koma ávalar og mjúkar línur
sem fleyta eiga bílnum meira inn á
markað útilífs og ferðalaga og
stækka með því kaupendahópinn.
Talsmenn Mitsubishi segja þó að
eftir sem áður sé L-200 kjörinn
vinnubíll, hann er áfram með blað-
fjöðrum að aftan og ber áfram eitt
tonn.
Oliver Soell, sem starfar í pallbíladeild Mitsubishi, einn þeirra er unnu við hönnun bíls-
ins, segir að pallbílamarkaðir séu mjög ólíkir í t.d. Evrópu og Ameríku. Vestra sé hann
hluti af lífsstíl en í Evrópu séu pallbílar einkum notaðir sem vinnutæki. Hann segir að
meðal þess sem nýr L-200 hafi upp á að bjóða sé gjörbreytt útlit, ný fjöðrun, nýtt mæla-
borð og aukið rými að innan. Farþegarýmið er 15 cm lengra, 2,5 cm hærra til lofts í
framsætum og 1,3 í aftursætum. Þá staðhæfir hann að beygjuradíus bílsins sé skarpari
en keppinautanna eða 5,9 metrar og hefur hann lagast með tilkomu nýrrar fjöðrunar.
Markaður fyrir pallbíla í Evrópu er einungis rúmlega 100 þúsund bílar og gert er ráð
fyrir að hann stækki örlítið næstu árin, kannski upp í um 120 þúsund bíla 2010. Mjög er
misjafnt hversu mikla hlutdeild L-200 hefur í einstökum Evrópulöndum og sagði Soell að
t.d. í Bretlandi hefði salan aukist um 33% eftir að skattareglum var breytt sem gerði
pallbílakaup fýsilegri. Því hefði hins vegar verið öfugt farið í Portúgal. Stefnt er að um 35
þúsund bíla sölu í Evrópu með nýju gerðinni.
L-200 verður fáanlegur með einföldu húsi, svonefndu Club-húsi sem er með tveimur
smásætum aftan við framsætin en það rými nýtist nú einkum sem geymslupláss. Þriðja
gerðin er fullvaxið fimm manna og fjögurra dyra hús. Heildarlengd þessara gerða er hin
sama en á lengri gerðunum er pallurinn sem því nemur styttri. Vélin er 2,5 lítrar og 136
hestöfl og togið er 314 Nm við 2.000 snúninga. Bíllinn er m.a. fáanlegur með sams konar
drifkerfi og í Pajero, svonefndu Super Select kerfi sem er sívirkt en hægt er einnig að fá
hann með eldra kerfinu og mun það fara eftir óskum markaðanna hvað í boði verður.
L-200 er smíðaður í Taílandi eins og verið hefur síðustu árin og er framleiðslugetan
um 180 þúsund bílar á ári. Þar í landi er hlutdeild bílsins einna sterkust. Mitsubishi stát-
ar af nærri sex áratuga sögu um pallbíla.
Gjörbreyttur
Mitsubishi L-200
á næsta ári
Morgunblaðið/Jóhannes Tómasson
Mitsubishi L 200 hefur tekið mjög miklum breytingum eins og sjá má.
Farþegarýmið er 15 cm lengra, 2,5 cm hærra til lofts í framsætum.
Mælaborðið er frísklegt og líflegt.
joto@mbl.is