Fréttablaðið - 01.11.2007, Qupperneq 33

Hálsbindi voru löngum úthrópuð af femínistum sem karlrembutákn,
holdgervingur karlmennskunnar, valdsins og jafnvel phallusarins.
Konur hafa reyndar reglulega tekið upp á því að nota bindi og Yves
Saint Laurent hikaði ekki við að klæða konur hálsbindum þegar hann
hafði tekið smókinginn frá körlum og aðlagað konum, kannski til að
afvopna karlana. Bindin hafa hins vegar verið úti í kuldanum um
nokkurra ára skeið og álitin hreinlega hallærisleg, notuð þegar ekki
var hægt að komast hjá því.
En nú eru breytingar í lofti og jafnvel hægt að tala um tískubylgju,
hvort sem litið er á Lanvin eða Hermès, Miu Miu eða Paul Smith.
Ekki eitt einasta tískuhús lætur bindið eiga sig lengur.
Eins og fyrir svo margt í herratískunni síðustu ár er Hedi Slimane,
fyrrverandi hönnuður herralínu Dior, að einhverju leyti ábyrgur en
hann var þar listrænn stjórnandi frá 2000-2007. Til hans má rekja
renglutískuna með níðþröngu gallabuxunum sem eiga helst að síga
niður á rassinum, aðsniðnar skyrtur eða boli og svo bítlabindi. Þessi
bindi hafa verið örmjó eins og gömlu góðu lakkrísbindin, mjög í anda
breskra popp- eða pönksveita. Aðrir minni spámenn hafa svo tekið
mjóa bindið inn í sínar tískulínur og nú er hægt að kaupa „ekta“
Slimane-bindi hjá H&M á tíu evrur.
„Slimane-lookið“ er hins vegar að syngja sitt síðasta og buxur í
vetrartískunni eru víðari en áður hjá sumum hönnuðum. Vortískan
verður enn víðari hvað varðar buxnasnið. Bindin fylgja og eiga nú að
vera breiðari, mynstruð eða röndótt og hnúturinn á að vera í stíl
pabba eða afa. Stíllinn er hér kallaður „póst-Gainsbourgískur dandý-
stíll“ (dandý er einhvers konar bóhemískur, velklæddur heims-
maður).
Í stað sportlegs eða jafnvel druslulegs stíls síðustu ára þar sem öllu
hefur verið blandað saman sést nú ákveðið afturhvarf til fágunar. Til
þess er bindið auðveldur aukahlutur sem bætir við mynstri eða lit og
er punkturinn yfir i-ið hjá velklæddum manni. Athyglisvert er þó að
það eru frekar ungir herrar á aldrinum 20-30 ára sem eru að taka upp
bindið meðan til dæmis stjórnmálamenn taka af sér bindið og opna
skyrtuna þegar þeir vilja vera frjálslegir og sýna að þeir séu ekki
forpokaðir. Kannski þess vegna er hægt að segja að þessi nýja binda-
menning sé ekki ákall karla til valdsins heldur einungis hégómleg
tískubylgja í þjónustu fagurkera þar sem nánast enginn munur sést
lengur á hegðan kvenna og karla þegar innkaup og tískutiktúrur eru
annars vegar.
Svo er að sjá hvernig gengur að læra að hnýta og hvort götutískan
tekur upp bindið eins og fínustu tískuhönnuðir vilja.
Margar gerðir af búningasilfri.
Þetta er ódýrasta mynstrið. Allt sem þarf á upphlutinn,
settið frá 90.530, kr.
Allar upplýsingar um hefð og
gerðir búninga eru veittar á staðnum.
Gullkistan - Frakkastíg 10 - Sími: 551-3160.
Sérverslun með
kvensilfur