Vikan - 20.10.1983, Blaðsíða 20
Veturaðsumrihjá
Tískukóngar Parísarborgar eru sískapandi allan ársins hring
og heitasta sumar í manna minnum þar í landi kom ekki í
veg fyrir að æskilegt útlit kvenna næsta vetur - að þeirra
dómi - birtist væntanlegum viðskiptavinum og öðrum aðdáendum
miðsumars. Þeir hafa sínar föstu venjur í því efni, sýna allir á næstum
sama tíma bæði sumar og haust, þannig að veðurfar og annað sem
plagar sauðsvartan almúgann er hreint aukaatriði í umstanginu.
Louis Féraud sýndi tísku vetrarins á sjálfu Champs-Elysées í
Théatre du Rond-Point. Úti var steikjandi sumarhiti en inni
sátu áhorfendur og virtu fyrir sér þykkar vetrarkápur og
fleira nytsamlegt til að verjast miklum vetrarhörkum. Kápur voru
flestar úr ull og athyglisvert að hnappar eru áberandi notaðir til að ná
fram ákveðnum áhrifum. Gylltir hnappar eru á áberandi stöðum á
flíkinni svo minnir á stundum á einkennisbúninga. Litir og mynstur
eru einnig mjög sterk þannig að andstæðir litir eru notaðir djarflega,
hvítt á móti svörtu og línur harðar — eins konar „geómetrísk
mynstur”. Aðallitir eru svart, hvítt, grátt og svo alls kyns afbrigði af
bláu og blárauðu.
Ekki voru allt kápur. Kjólar og þess háttar þarf víst að fylgja
klæðnaðinum og svo var einnig í þetta skiptið. Skór, hattar og ýmsir
smáhlutir gleymdust ekki heldur og skyldi einhver halda að hönnun
alls þessa sé á eins manns hendi skal það samstundis leiðrétt. Að baki
stendur hópur starfsmanna, við þessa sýningu Alexandre Zouari,
Edith Remi og Michel, með hatta, hár og förðun, og svo Caroline
Field, Helga Björnsson, Michel Binet og Bernard Menardi með föt,
skó, bindi og fjaðrir svo eitthvað sé nefnt.
20 Vikan 42. tbl.