Fréttablaðið - 31.12.2009, Page 26

26 31. desember 2009 FIMMTUDAGUR
GÓÐUR GESTUR Dalai Lama, leiðtogi Tíbeta, heimsótti Ísland á árinu. Fjölmenni var við þær opnu athafnir
sem hann kom fram á og nokkrir stjórnmálamenn hittu hann á einkafundum. Þeir sátu þá fundi sem
einstaklingar, ekki stjórnmálamenn, til að styggja ekki Kínverja. „Þeir sem hugsa eingöngu um peninga og
aftur peninga, og völd og aftur völd, ættu að hlúa betur að sínum innri gildum,“ sagði Dalai Lama meðal
annars. FRÉTTABLAÐIÐ/ANTON
ELDUR Á AUSTURVELLI Ófremdarástand ríkti í miðborginni marga daga í röð í byrjun árs þegar fjöldi fólks krafðist afsagnar ríkisstjórnarinnar og aðgerða sér til handa í kjölfar falls bankanna og tilheyrandi erfiðleika.
Mótmælunum linnti þegar ljóst varð að ný ríkisstjórn var í spilunum. FRÉTTABLAÐIÐ/STEFÁN
BÚIÐ SPIL Hótel Valhöll á Þingvöllum brann til kaldra kola í sumar. Stuttu fyrir brunann hafði nýr hótel-
haldari tekið yfir reksturinn og varið peningum og tíma í að koma hótelinu í gott lag. Tyrft var yfir bruna-
rústirnar og eru litlar líkur á að nýtt hótel verði reist á sama stað. FRÉTTABLAÐIÐ/ARNÞÓR
ÞITT ER MITT Hópur fólks hreiðraði um sig í yfirgefnu húsi við Vatnsstíg í Reykjavík í apríl. Taldi það sig í
fullum rétti til að hafast þar við enda væri nýtingarréttur eignarréttinum yfirsterkari. Húseigandinn var á
öðru máli og morguninn eftir réðist lögregla til atlögu og rýmdi húsið. FRÉTTABLAÐIÐ/VALLI