Monitor - 22.09.2011, Blaðsíða 12

12 Monitor FIMMTUDAGUR 22. SEPTEMBER 2011
Undanfarin misseri hefur lagið Little
Talks með hljómsveitinni Of Monsters
and Men verið á heila annars hvers
manns hérlendis. Vinsældir lagsins
hafa verið meiri en þau Nanna Bryndís
Hilmarsdóttir og Ragnar Þórhallsson
þorðu að reikna með en lagið hefur
verið leikið í útvarpi vestanhafs auk
þess sem fjöldinn allur af notendum
YouTube hefur sett á netið sínar eigin
útgáfur af laginu. Ævintýri krakkanna í
Of Monsters and Men hófst hins vegar
fyrir einu og hálfu ári síðan með sigri í
Músíktilraunum.
Hvað var hljómsveitin Of Monsters
and Men að gera áður en hún vann
Músíktilraunir í fyrra?
R Hún byrjaði sem sólóverkefni hjá
Nönnu sem hét Songbird, þótt það sé
reyndar bara eitt lag frá þeim tíma
á plötunni okkar. Síðar komum við
Brynjar inn í þetta. Fyrir Músíktilraunir
vorum við bara að spila slatta, spiluð-
um á Airwaves 2009 á Trúbatrix-kvöldi.
N Já, þá vorum við miklu lágstemmd-
ari með klukkuspil og eitthvað. Ég
kynntist Brynjari gítarleikara í skóla
en við Raggi kynntumst í gegnum
kærastann minn.
Af hverju ákváðuð þið að taka þátt í
Músíktilraunum?
R Okkur langaði bara að gera
eitthvað, við ákváðum þetta með mjög
stuttum fyrirvara.
N Já, alveg á seinustu stundu.
R Þá bættum við honum Arnari við, til
að spila á slagverk og syngja bakraddir.
N Já, ég man samt eftir tímabili þar
sem ég hugsaði alveg að við ættum að
bíða með þetta í eitt ár en í dag er ég
mjög fegin að við skyldum ekki gera
það.
Stundum er talað um að hljómsveitir
sem vinna Músíktilraunir þurfi síðan
að hrista af sér einhvers konar Mús-
íktilraunastimpil. Eruð þið upptekin
af slíku?
R Ég hef aldrei pælt í því. Ég held að
stimpillinn sé góður.
N Það að vinna þessa keppni gerði
okkur mjög gott og gerir hljómsveitum
mjög gott. Við viljum ekkert losna við
hann, erum bara mjög ánægð með að
hafa unnið þetta.
R Nákvæmlega. Ég held samt líka að
það að við biðum dálítið með að gefa
út plötu hafi orðið til þess að fólk sér
okkur alls ekkert bara sem einhverja
Músíktilraunahljómsveit, heldur bara
hljómsveit sem hefur verið að spila
helling.
Þegar þið unnuð Músíktilraunir voruð
þið bara fjögur í hljómsveitinni. Hvers
vegna bættust tveir við eftir það?
R Við vildum bara gera þetta stærra,
stækka hljóminn. Arnar langaði að
spila á trommur svo við færðum hann
yfir á það og þá þurftum við bassa-
leikara. Í staðinn fyrir melódikku og
klukkuspil, sem höfðu áður verið, þá
fengum við harmonikku- og píanóleik-
ara saman í einum manni.
N Svo erum við stundum með
trompetleikara líka.
R Þetta var bara rétt þróun, lögin
kölluðu á stærri hljómsveit.
Um hvað eru lög hljómsveitarinnar?
N Öll lögin eru einhverjar sögur.
R Þetta eru allt einhverjar sögur sem
við búum til, einhver ævintýri, eða
sögur sem við finnum á netinu og
vinnum með þegar við búum til texta.
Það eru einhverjar skrýtnar sögur sem
leynast lengst inni í internetinu sem
við finnum á einhverjum skrýtnum
síðum.
N Þetta er allt saman mjög dularfullt.
Þið syngið á ensku, hvers vegna er
það?
N Það var einhvern tímann pæling
hjá okkur að gera íslenskt lag en það
einhvern veginn gerðist aldrei.
R Það er ekki það að við tölum mikla
ensku eða að við séum eitthvað
sérstaklega góð í henni, þetta gerist
bara. Ég held líka að innst inni sé þetta
sú hugsun að búa til tónlist fyrir stærri
markað. Er það ekki?
N Jú, ætli við viljum það ekki.
Nafn hljómsveitarinnar hljómar eins
og vísun í bókatitilinn Of Mice and
Men. Kom aldrei til greina að nefna
hljómsveitina Of Monster Sandmen,
sem hljómar alveg eins?
N (hlær) Við höfum heyrt þetta áður.
R Ég sé þetta nafn einmitt alltaf þegar
ég skrifa netfangið okkar, ofmonsters-
andmenmusic@gmail.com. Það er
samt mjög kúl, minnir á Metallica og
eitthvað.
N Það hefði verið kúl nafn og við
ræddum það ítarlega en við ákváðum
á fundi að nota það ekki.
Lagið Little Talks hefur fengið frábær-
ar viðtökur síðustu mánuði. Er þetta
ykkar uppáhaldslag?
N Nei, en það er ótrúlega gaman að
sjá hvað fólk tekur vel í það, sér-
staklega nýlega, og tekur vel undir á
tónleikum.
R Það er ótrúlega gaman. Þetta er ekk-
ert uppáhaldslagið manns í heiminum,
en það er rosa gaman að spila og
semja það. Við hlustum almennt ekki
mikið á okkar tónlist.
Þegar þið sömduð lagið Little Talks,
grunaði ykkur strax að þetta væri lag
sem yrði spilað á milljón í útvarpi, til
dæmis á FM957?
N Við bjuggumst einmitt ekki við því
af öllu.
R Nei, en ég skil það alveg svo sem. Ég
var samt alls ekki einu sinni viss um
að þetta kæmist inn á X-ið, ég hugsaði
að þetta væri kannski svona Rásar
2-lag.
N Svo var líka mjög óvænt að sjá fólk
frá útlöndum vera að „covera“ lagið og
setja myndbönd af því á YouTube. Það
er alltaf jafnfyndið.
Náið þið nú til breiðari hóps af fólki
eftir að lagið sló í gegn?
N Já, það er miklu breiðari hópur
byrjaður að mæta á tónleika.
R Já, svo erum við búin að spila fyrir
börn.
N Síðan vorum við að spila í brúð-
kaupi og það voru áttræðar ömmur
sem voru dansandi við tónlistina
okkar. Það er mjög gaman.
Bandaríska útvarpsstöðin KEXP tók
upp myndband með ykkur í kringum
Airwaves í fyrra þar sem þið fluttuð
Little Talks. Síðan hafa rúmlega
208.000 manns horft á þetta mynd-
band. Tókuð þið tímabil þar sem þið
láguð yfir YouTube og fylgdust með
áhorfinu rjúka upp?
R Já, þetta var orðin einhvers konar
fíkn og við töluðum alveg um að nú
þyrftum við að hætta þessu.
N Þetta var alveg rosalegt en ég hef
ekki gert það í marga mánuði núna.
R Lagið er hins vegar núna komið á
einhvern vinsældarlista á útvarpstöð
úti í Philadelphia og situr þar í 26. sæti
og eftir það byrjaði áhorfið á YouTube
að rjúka aftur upp. Fyrir mjög stuttu
var það sem sagt bara í 198.000 en svo
rauk það upp í 208.000 um daginn.
N (hlær) Geðveikt nákvæmar tölur.
Þið eruð með bandarískan umboðs-
mann. Kom það til vegna þessa
myndbands?
N Nei, það gerðist bara stuttu eftir
Músíktilraunir. Maðurinn hennar er
íslenskur og hann sá okkur á tónleik-
um og benti henni á okkur. Hún kom
til Íslands og sendi okkur tölvupóst
þannig að við héldum tónleika fyrir
hana, töluðum við hana eftir það og
úr varð að hún gerðist umboðsmaður
okkar.
v
ið
ta
lið
Texti: Einar Lövdahl einar@monitor.is
Myndir: Eggert Jóhannesson eggert@mbl.is
Já, þetta var
orðin einhvers
konar fíkn og við
töluðum alveg um að
nú þyrftum við að
hætta þessu.
NANNA
Fyrstu sex: 060589.
Uppáhaldsmatur: Kjúklingur.
Uppáhaldsstaður í heiminum:
New York.