Bændablaðið - 12.07.2012, Síða 10

Bændablaðið | Fimmtudagur 12. júlí 201210
Fréttir
Sveitaverslanir sem bjóða
handverk og búvörur hafa
opnað víða um land á síðustu
árum. Á Kirkjubæjarklaustri
er nú rekin lítil verslun í gamla
samkomuhúsinu Kirkjuhvoli og
ber hún heitið „Sveitabragginn“.
Þar ræður ríkjum Kristín
Bjarnveig Böðvarsdóttir en hún
ákvað einn góðan veðurdag að
opna verslun í félagi við vinkonu
sína sem nú er farin til annarra
verka.
„Við opnuðum í fyrrasumar
þrátt fyrir eldgos, flóð og lokaðan
hringveg. Hér í kring eru margir að
framleiða fjölbreytt handverk sem
fæst hér í búðinni ásamt ýmsum
matvörum. Við stefnum á að selja
meiri mat en höfum m.a. boðið upp
á Klaustursbleikju, gæs, ís frá Fossi
í Mýrdal og Brunnhóli í Austur-
Skaftafellssýslu og ýmsar sultur.
Viðtökurnar hafa verið góðar,“ segir
Kristín sem auk verslunarstarfanna
vinnur hlutastarf hjá Arion-banka á
Klaustri. Hún er með sveigjanlegan
opnunartíma en segist hafa opið
þegar fólk er á svæðinu. Kristín leigir
húsnæðið af hreppnum en áður var
þarna m.a. rekinn leikskóli, sólbaðs-
stofa og líkamsræktarstöð, þó ekki
séu fermetrarnir margir.
/TB
Handverk og búvörur í
Sveitabragganum
Kristín Bjarnveig Böðvarsdóttir verslunarkona með sambýlismanni sínum,
Antoni Kára Halldórssyni, og tíkinni Nótt.
Mynd: TB
Sveitamarkaðurinn í
Eyjafjarðarsveit
Sumardagur á sveitamarkaði í
Eyjafjarðarsveit hefur nú göngu
sína sjöunda sumarið.
Eins og áður er markaðurinn á
blómum prýddu torgi Gömlu garð-
yrkjustöðvarinnar við Jólagarðinn.
Óhætt er að segja að á markaðnum
sé fjölbreyttur varningur í boði.
Má þar nefna brodd, brauð og
kökur af ýmsu tagi, sultur og saftir.
Einnig allskonar handverk svo sem
prjónavörur, þæfða ull, vörur úr
mokkaskinni, dúkkuföt, skartgripi
og ótal margt annað.
Notalegt er að setjast niður og
gæða sér á nýbökuðum vöfflum með
rabarbarasultu beint úr pottinum og
rjúkandi kaffi. Seljendur eru flestir
heimamenn og úr nágrannasveitum
eða hagleiksfólk sem á leið um og
staldrar við með vöru sína. Þetta
skapar skemmtilega fjölbreytni sem
markaðurinn er þekktur fyrir.
Samstarfshópurinn Fimmgangur
heldur utan um sveitamarkaðinn og
leggur mikið upp úr að varningurinn
sem boðinn er sé heimaunninn eða
falli vel að umhverfinu og sveita-
lífinu.
Fyrsti markaður sumarsins verður
nú á sunnudag, 15. júlí, og svo alla
sunnudaga í sumar til og með 19.
ágúst. Sveitamarkaðurinn er opinn
frá kl. 11 til 17.
Fleiri ferðamenn utan hins hefðbundna ferðamennskutíma
Sumarið fer vel af stað hjá
ferðaþjónustubændum
og bjart framundan
Um þriðjungur gistinátta í dreifbýli
er innan vébanda Ferðaþjónustu
bænda. Það er ekki víst að allir
átti sig á því hversu gríðarlega
umfangsmikil ferðaþjónusta er
rekin á landsbyggðinni undir
formerkjum bænda.
Sævar Skaptason er fram-
kvæmdastjóri Ferðaþjónustu bænda.
Bændablaðið tók hús á Sævari og
spurði hann fyrst út í hvernig ferða-
mennskan liti út nú í byrjun júlí.
„Sumarið hefur farið mjög vel af
stað. Við erum að horfa á sambæri-
legar tölur eins og leit út fyrir sum-
arið 2010, fyrir gos. Þessu er auð-
vitað misskipt milli svæða, á stöðum
sem eru lengra frá suðvesturhorninu
fer ferðamennskan yfirleitt seinna af
stað. Hins vegar er allt komið í fullan
gang núna. Það lítur út fyrir að þetta
verði gott ferðasumar, alla vega hvað
varðar erlenda ferðamenn.“
Eldgosið farið að skila
ferðamönnum
Eldgosið í Eyjafjallajökli árið 2010
olli bændum á Suðurlandi verulegum
búsifjum og erfiðleikum. Það átti við
um ferðaþjónustubændur eins og
aðra. Sævar segir að nú séu afleið-
ingar gossins að mestu hættar að vera
neikvæðar fyrir ferðaþjónustuna.
„Menn fundu fyrir afleiðingum
gossins í fyrra. Það voru sérstak-
lega Íslendingar sem voru seinir til
að fara inn á svæðið til að gista þar.
Ég held hins vegar að núna sé það
búið og gagnvart erlendu ferðamönn-
unum séum við nú farin að uppskera
auglýsingagildi eldgossins. Þeir vilja
fræðast og helst sjá gosstöðvarnar.
Það er ekki til sá erlendi ferðamaður
sem hingað kemur sem ekki veit af
gosinu.“
Fjölbreytnin er styrkleikinn
Fjölbreytnin er mikil í gistimögu-
leikum og afþreyingu á meðal
félaga innan Ferðaþjónustu bænda.
„Styrkleiki okkar er fjölbreytnin.
Við erum með gömlu, góðu gildin,
hefðbundna heimagistingu þar sem
boðið er upp á tvö, þrjú herbergi eða
þar um. Svo erum við með millistóra
staði og upp í stóra staði þar sem
bændur hafa byggt upp heilu sveita-
hótelin. Það er algengt að ferðamenn
vilji blanda þessu saman, komast í
návígi við bændur á litlum stöðum
þar sem hægt er að spjalla við bænd-
ur um lífið og tilveruna í sveitinni.
Á því hafa ferðamenn áhuga. Svo
gista þeir kannski aðrar nætur á
stærri stöðum sem gefa ekki eins
mikla möguleika á návígi en bjóða
þá upp á aðra hluti. Ferðamennirnir
sem eru að ferðast um landið á bíla-
leigubílum hafa áhuga á að fræðast
meira um landið en lesa má í ferða-
handbókunum og bændurnir okkar
eru þar í lykilaðstöðu. Það sem
skiptir máli í þessu er að gestunum
finnist vel tekið á móti sér, að þeir
séu velkomnir.“
Sævar segir að ferðamennskan
hafi tekið miklum breytingum
síðustu ár. „Við erum að sjá betri
nýtingu á jaðarsvæðunum, svæð-
unum sem eru lengra frá hinum
hefðbundnu túristastöðum. Við erum
sömuleiðis að sjá að fleiri ferðamenn
eru á ferðinni utan hins hefðbundna
ferðamennskutíma, á jaðartímum.
Auðvitað eigum við hins vegar langt
í land með að ná ásættanlegri nýtingu
á jaðartímum, við þurfum að lengja
í báða enda.“
Yfir sumartímann eru erlendir
ferðamenn allt að níutíu prósent
gesta, að sögn Sævars. Íslendingar
nýta jaðartímann betur og þar eru
enn frekari sóknarfæri. „Vorverkin í
sveitinni, til að mynda, vekja athygli
Íslendinga. Sömu sögu má segja um
haustin: berjatínslu, göngur og réttir.
Þarna eru klárlega markaðstækifæri
framtíðarinnar innanlands.“
Létt undir með bændum
Ferðaþjónusta bænda hefur verið í
fararbroddi í markaðssetningu og
sölu á netinu. Síðustu ár hefur verið
unnið markvisst í þeim efnum og
hefur verið byggt upp bókunarkerfi
sem aðilar í Ferðaþjónustu bænda
geta nýtt. „Við erum hins vegar
í harðri samkeppni við erlendar
bókunarsíður sem ekki borga neina
skatta eða gjöld hér á landi. Það
stökkva margir gistiaðilar til og
skella sínum herbergjum inn á þessar
síður, sem selja vissulega nokkuð
vel. Til að bregðast við þessu höfum
við greitt bændum sem selja sína
gistingu með okkar bókunarkerfi
bónus eftir árið. Það fá menn
ekki frá erlendu bókunarsíðunum.
Sömuleiðis höfum við greitt bændum
fyrirfram 20 prósent af væntanlegum
viðskiptum sumarsins síðustu þrjú
ár. Þetta höfum við gert til að létta
bændum reksturinn þegar pyngjan er
létt og þetta fá menn ekki frá erlendu
fyrirtækjunum,“ segir Sævar.
Sævar segir að næsta verkefni
sé að selja afþreyingu en ekki bara
gistingu hjá bændum. „Við höfum
unnið markvisst að því síðustu
tvö ár með bændum að þróa og
markaðssetja sérstöðu þeirra. Það er
alveg ljóst að það er framtíðarstefið
í þessu. Eftir nokkur ár held ég að
Ferðaþjónusta bænda verði afar
öflugur aðili þar sem sérstaðan og
afþreyingin verða í forgrunni og
gistingin kemur þar á eftir.“
Sævar segir að mikilvægasta
verkefni næstu missera sé að sameina
krafta aðila í landbúnaðinum og
ferðaþjónustunni. „Ferðaþjónusta
bænda, Opinn landbúnaður, Beint frá
býli, hestamenn og aðrir aðilar þurfa
að taka saman höndum og horfa með
sameiginlegri sýn á landsbyggðina.
Menn eru að vinna svolítið hver í
sínu horni og því þurfum við að
breyta. Ferðaþjónusta bænda er til
í þennan slag, við höfum tólin og
tækin til þess og verðum að einhenda
okkur í þetta.“
/fr
Mikilvægasta verkefni næstu missera er að sameina krafta aðila í landbúnaði
og ferðaþjónustu, segir Sævar Skaptason. Mynd: FR