Dagblaðið Vísir - DV - 01.07.2014, Blaðsíða 19

Vikublað 1.–3. júlí 2014 Skrýtið 19
Bölvun á tökustað
n 7 kvikmyndir þar sem allt gekk á afturfótunum við framleiðslu n Dauðsföll og hamfarir
Leikstjórinn
varð fyrir bíl
The Omen
Útgáfuár: 1976 Leikstjóri: Richard Donner
n Það kann svo sem ekki góðri lukku að
stýra að framleiða yfirnáttúrulega mynd
um bandarískan sendiherra, sem kemst
að því að barnið hans er Antikristur. Enda
er ekki hægt að segja að lukkan hafi leikið
við framleiðendur myndarinnar. Við upphaf
framleiðslunnar gerðist það að leikarinn
Gregory Peck og handritshöfundurinn, David
Seltzer, urðu báðir fyrir því að fljúga með
flugvélum (hvor sinni vélinni) sem urðu fyrir
eldingum á leið á áfangastað. Leikstjórinn
varð fyrir því að IRA gerði árás á hótelið sem
hann dvaldi á auk þess sem hann varð svo
fyrir bíl. The Silver Screen Critic hefur greint
frá því að nokkrir lykilmenn úr tökuliðinu hafi
lifað af alvarlegt bílslys á fyrsta tökudegi
og flugvélin, sem tökuliðið hafi upphaflega
ætlað að fara með, hefði farist með þeim
afleiðingum að allir sem voru um borð létust.
En þrátt fyrir allt þetta meiddist enginn úr
hópnum alvarlega. Það var lán í óláni.
Costner nærri
drukknaður
Waterworld
Útgáfuár: 1995
Leikstjórn: Kevin Reynolds
og Kevin Costner
n Strax frá fyrsta degi varð ljóst að
fjármagnið sem hafði verið ætlað
til verksins myndi hrökkva skammt.
Myndin átti að kosta minna en fimm
milljónir dollara en kostaði á endanum
í kring um 200 milljónir dollara. Ekki
bætti úr skák að kvikmyndin féll
ekki í kramið hjá gagnrýnendum og
aðsóknin var dræm. Tekjurnar námu
aðeins 88 milljónum dollara, árið 1995.
Bókhaldið er eitt. Tökurnar annað.
Eins og flestir vita var myndin tekin
upp á hafi úti. Sjóveiki reyndist tökuliði
og leikurum erfiður ljár í þúfu og margir
urðu mjög veikir. Einn flekinn (hluti
sviðsmyndarinnar) sökk auk þess
sem vindur gerði það að verkum að
vatnaveröldin rak ítrekað langt á haf
út. Leikarar urðu fyrir árás marglyttna
og starfsfólkið fór á endanum í hart.
Lög um vinnuaðstæður voru þverbrot-
in. Það alvarlegasta sem gerðist var
þó líklega þegar aðalleikarinn, Kevin
Costner, var hársbreidd frá drukknun í
einu atriðanna.
Jesús varð
fyrir eldingu
Passion of the Christ
Úgfáfuár: 2004 Leikstjóri: Mel Gibson
n „Þremur sekúndum áður en atriðið átti að
hefjast varð ég fyrir eldingu,“ sagði leikarinn
Caviezel í viðtali við Fox News, eftir að
hafa orðið fyrir eldingu við tökur á atriðinu
Sermon on the Mount, einni þekktustu senu
Jesú Krists. „Ég var búinn að finna á mér
að þetta myndi gerast.“ Þetta er ekki eina
ógæfan sem helltist yfir leikarann við tökur
á myndinni. Hann varð fyrir ofkælingu, fór úr
axlarlið, fékk sýkingu í lunga og lungna-
bólgu, að því er vefsíðan Movie Fone greinir
frá. Caviezel þurfti einnig að gangast undir
átta tíma förðun fyrir hlutverk sitt. Við það
fékk hann höfuðverk og sýkingar í húð. Að
auki varð hann í nokkur skipti fyrir svipum
og öðrum verkfærum við tökur á myndinni;
sem varð til þess að hann fékk sár víðs vegar
um líkamann.
Flóð
eyðilögðu
búnaðinn
The Man Who
Killed Don Quixote
Útgáfuár: Óútkomin
Leikstjóri: Terry Gilliam
n Hversu mikið þarf að ganga á svo
framleiðslu kvikmyndar sé einfaldlega
hætt? Svarið er að finna hér. Þegar
ákveðið var að festa ævintýri Don
Kíkóta á filmu óraði leikstjórann, Terry
Gilliam, ekki fyrir því sem í vændum
var. Hann réði Jean Rochefort í aðal-
hlutverkið og Johnny Depp til að leika
Sancho Panza. Miklar væntingar voru
gerðar til myndarinnar, en segja má að
allt hafi farið á versta veg. Fyrst gerð-
ist það að Rochefort meiddist á baki
og þurfti að draga sig út úr verkefninu.
Því næst kom það upp úr krafsinu að
tökustaðurinn reyndist vera í næsta
nágrenni við virkt æfingasvæði
herdeilda NATO. Á löngum köflum var
ekki hægt að heyra mannsins mál. Til
að bæta gráu ofan á svart urðu flóð til
þess að stærsti hluti búnaðarins, sem
nota átti við tökurnar, eyðilagðist. Það
var þá sem framleiðendur fengu nóg
og ákváðu að leggja árar í bát. „Ég trúi
eiginlega enn þann dag í dag ekki því
sem gerðist. Verkefnið var krefjandi
frá fyrsta degi en það sem gekk á var
súrrealískt. Ég er enn í öngum mínum.“
The Hollywood Reporter hefur reyndar
greint frá því að Gilliam sé til í slaginn
á nýjan leik. Tökur eigi að hefjast í lok
september, á Kanaríeyjum. Vonandi
gengur það eftir.
Borguðu leikurum tvöfalt
Town and Country
Útfáfuár: 2001 Leikstjóri: Peter Chelsom
n Þegar tökur hófust á þessari rómantísku gamanmynd voru við hana bundnar nokkrar væntingar. Í henni léku stjörn-
ur á borð við Warren Beatty, Goldie Hawn, Diane Keaton, Garry Shandling og Andie MacDowell. Tökur hófust í árs-
byrjun 1998 en illa gekk að ljúka við handritið. Uppkast eftir uppkast var skrifað og framleiðslan dróst sífellt lengur.
Beatty var þess utan erfiður á tökustað og krafðist þessa að hver senan á fætur annarri yrði tekin upp aftur. Ári síðar
bólaði ekkert á myndinni. Leikararnir hrökkluðust hver af öðrum frá borði og illa gekk að skipuleggja tökurnar, eftir
alla seinkunina. Framleiðandinn þurfti á endanum að borga leikurunum launin í tvígang. Myndin leit loksins dagsins
ljós árið 2001 og hafði þá farið gróflega fram úr fjárhagsáætlunum. Hún floppaði algjörlega og þótti misheppnuð.
Time segir að tapið hafi numið 124 milljónum dollara.
Hjartaáfall og offita
Apocalypse Now
Útgáfuár: 1979 Leikstjóri: Francis Ford Coppola
n Allt gekk á afturfótunum við tökur á Apocalypse Now, sem hófust árið 1976. Harvey Keitel átti upphaflega að fara
með aðalhlutverkið í myndinni. Coppola ákvað í miðjum klíðum að reka hann og ráða Martin Sheen. Sheen varð svo
fyrir því að fá hjartaáfall við tökur á myndinni, að því er MSN Entertainment hefur greint frá. Coppola var svo öllum
lokið þegar Marlon Brando mætti á staðinn, miklu feitari en ráð hafði verið fyrir gert. Coppola neyddist til að nota
aðdráttarlinsur við tökurnar á atriðum þar sem Brando kom fyrir, svo andlitið sæist bara. Grennri staðgengill var svo
notaður til að þykjast vera Brando í fjarlægð. Tökum lauk árið 1977 en eftirvinnslan varð svo mikil að hún var ekki
sýnd fyrr en tveimur árum síðar.
Dauðsföll og veikindi
The Matrix
Útgáfuár: 1999 Leikstjórn: Wachowski-bræður
n Það er óhætt að segja að mikið hafi gengið á þegar þessi
vinsæla kvikmynd var framleidd. Keanu Reeves missti konu sína
og barn. Á meðan tökur stóðu yfir fæddi Jennifer Syme, kærasta
hans, andvana barn. Parið skildi eftir það og í kjölfarið lést Syme í
hræðilegu bílslysi. Það er ekki allt, þótt nóg sé. Aaliyah, leikkonan
sem fór með hlutverk Zee í kvikmyndinni, lést í flugslysi á meðan
myndin var í framleiðslu. Það seinkaði útgáfu hennar um nokkra
mánuði. Ógæfunni voru engin takmörk sett því Gloria Foster, sem
lék véfréttina (The Oracle) lést einnig nokkru síðar. Reeves, sem átti
um sárt að binda eftir áföllin, lenti á sjúkrahúsi eftir að hafa slasast
í mótorhjólaslysi. Þegar hann sneri aftur á tökustað meiddist hann
á fæti og þurfti aftur á sjúkrahús. Til að bæta gráu ofan á kolsvart,
greindist systir leikarans á ný með hvítblæði, sem seinkaði tökum
enn frekar. Kostnaðurinn sem hlaust af öllum þessum áföllum var
kominn úr öllu hófi og Reeves féllst á að afsala sér 24 milljónum
dollara af launum sínum, til þess að hægt væri að ljúka við myndina,
að því er vefsíðan List Verse greinir frá. Myndin gekk hins vegar vel
og varð vinsæl.