Húnavaka - 01.05.2010, Síða 55

H Ú N A V A K A 53
Svona leið sumarið
Seinna um sumarið var farið niður í mýrar og torf skorið með þar til gerðum
torfljá. Voru torfræmurnar látnar þvers yfir hrygginn á hestunum, alveg
rennandi blautar og fluttar þannig heim. Tíð var ágæt og miðaði heyskap vel
og vel tókst að fylla í tóftirnar við fjósið sem Stebbi taldi hæfilegt kúafóður
næsta vetur. Að lokum var strigi spenntur yfir til bráðabirgða. Svo var byrjað
að slá norðurtúnið. Þar var grasspretta öllu lélegri.
Í rigningum vorum við oft að slá móakarga með orfi og ljá og var það
kalsaverk mikið, grasið var blautt og þungt og erfitt að eiga við það. Var það
rakað saman og flutt heim á tún og þurrkað.
Nú var farið að líta á tóftirnar við fjárhúsin. Þær voru í lélegu ástandi og
þörfnuðust mikilla viðgerða. Við fluttum nú staurinn úr fjóstóftunum í
fjárhústóftirnar. Síðan var farið að draga sátur að fjárhúsunum á
norðurtúninu.
Einu sinni þegar við vorum að taka saman hey á norðurtúninu fældist Mósi
allt í einu. Ég var á rakstrarvélinni og þegar ég sleppti upp greiðunni kom
mikill smellur. Mósi tók mikinn kipp og þaut af stað heim að bæ. Hann tók
með sér 3-4 sátur sem Stebbi var búinn að búa til. Ég ríghélt mér í sætið svo
ég dytti ekki af. Mósi stoppaði svo heima á hlaði. Stebbi kom hlaupandi á eftir
og var það í eina skiptið sem ég sá Stebba reiðan. Hann greip í taumana á
hestinum og hreinlega skammaði hann.
Svona leið sumarið og þegar kom fram í ágúst var heyskapur á heimatúninu
búinn. Þá var farið að leita að slægjum utan túns. Fórum við víða um á
hestunum að leita að slægjum og fundum nokkrar á mýrunum niður við Laxá.
Þar slógum við smáskika hér og þar. Svolítið var hægt að slá með sláttuvélinni
en það mesta var slegið með orfi og ljá. Síðan var heyið tekið saman í bagga
sem voru bundnir með reipi og fluttir heim að bæ í klyfjum á hestunum. Þar
var heyinu dreift og það þurrkað. Ekki var þetta hey sérlega gott fóður, helst
handa hestunum.
Fyrst var að rista torfið
Í júní fórum við að taka mó úr mýrunum niður við Laxá. Þar voru mógrafirnar.
Stebbi var lengi að velja tökustaðinn og gekk víða um og athugaði aðstæður en
loksins ákvað hann sig og gröftur hófst. Fyrst var að rista torfið ofan af, um 50
sentimetra þykkt og þá var komið niður á móinn. Mórinn var stungin upp í
kögglum. Kögglunum var svo raðað upp í hestakerruna og hún dregin upp á
mela. Það var mitt verk. Ég hvolfdi svo úr kerrunni á melana. Rauður var mest
látinn draga kerruna. Stebbi sagði að Mósi þyrfti að hvíla sig og gekk hann nú
frjáls í haga. Ég var líka í að kljúfa kögglana í flögur með stunguskóflu.