Húnavaka - 01.05.2010, Side 167

H Ú N A V A K A 165
Pálína Halla Ásmundsdóttir
frá Ásbúðum
Fædd 30. maí 1921 – Dáin 11. maí 2009
Pálína Halla var fædd í Ásbúðum á Skaga í Austur-Húnavatnssýslu. Foreldrar
hennar voru Steinunn Sveinsdóttir og Ásmundur Árnason, bændur í Ásbúðum.
Þau hjón eignuðust fimm börn, fjóra syni, sem allir eru látnir og Pálínu Höllu
sem var yngst systkinanna. Auk bræðranna átti
hún yngri hálfsystur, samfeðra.
Pálína Halla ólst upp heima í Ásbúðum, þar
var stundaður fjárbúskapur en einnig sjósókn og
hlunnindabúskapur. Reki var nýttur og rækt lögð
við æðar varp. Hún kynntist því í uppvexti sínum
búskaparháttum fyrri tíma og lærði til verka af
þeim sem eldri voru.
Leifur Gíslason, sem ólst upp að Kleif í Skefils-
staðahreppi á Skaga, kom sem vinnumaður að
Ás búðum. Pálína Halla og hann felldu hugi
saman og gengu í hjónaband þann 22. nóvember
árið 1940. Þau hjón eignuðust tvo syni, þá
Baldvin og Ásmund.
Pálína Halla og Leifur bjuggu í Ásbúðum til
ársins 1965 en þá brugðu þau búi og fluttu í Kópavog og þar áttu þau heimili
sitt alla tíð síðan. Leif, mann sinn, missti Pálína Halla árið 1998.
Eftir að Pálína Halla og Leifur fluttu suður fóru þau árum saman norður til
að nýta og hugsa um æðarvarpið og njóta dvalar á heimaslóð. Í Ásbúðum voru
gömlu göturnar hennar, þær sem hún gekk á vori bernskunnar og fram á
fullorðinsár. Þeirra var ávallt gott að vitja, minnast liðinna yndisstunda og
eignast nýjar.
Pálína Halla var listræn og mikil hannyrðakona. Hún saumaði mikið út og
sú iðja veitti henni sanna gleði. Fjöldi hagan lega gerðra útsaumsverka eru til
eftir hana. Hún prjónaði einnig mikið.
Heilsa Pálínu Höllu var oft á tíðum ekki sem skyldi og síðustu misserin
dvaldi hún í Hjúkrunarheimilinu Sunnuhlíð í Kópavogi þar sem hún lést.
Útför Pálínu Höllu Ásmundsdóttur var gerð frá Kópavogskirkju þann 20.
maí.
Sr. Ægir Fr. Sigurgeirsson.