Lögmannablaðið - 01.06.2009, Blaðsíða 19
LÖGMANNABLAÐIÐ – 2 / 2009 > 19
Formannspistill
Ályktun sem stjórn Lögmannafélags
Íslands sendi frá sér á dögunum vakti
talsverð viðbrögð. Er um viðbrögðin þó
einkum skírskotað til umræðna á
spjallvefjum þar sem menn fóru oft
mikinn og vildu sumir hverjir meina að
oftar en ekki væru annarleg sjónarmið
sem byggju að baki því þegar lögmenn
teldu ástæðu til að álykta með þessum
hætti. Ég kveinka mér ekki undan
gagnrýni þótt mér finnist þessi nálgun
ómakleg en bendi þó á að í ályktuninni
var fyrst og fremst minnt á nokkur
grundvallaratriði réttarríkis líkt og
stjórn félagsins hefur gert nokkrum
sinnum frá því bankakerfið í landinu
hrundi í október sl. og sem stjórnir
félagsins hafa auðvitað gert margsinnis
áður.
Ég tel að það geti aldrei verið nema til
góðs að rifja upp reglulega slík grund-
vallarréttindi og þá kannski sérstaklega
á miklum óvissu- og óróatímum. Lög-
manna félag Íslands mun fyrir sitt leyti
halda því áfram í hvert sinn sem ástæða
þykir til.
Hitt er einnig mjög mikilvægt að ef við
Íslendingar teljum að gera þurfi
einhverjar eða eftir atvikum meiriháttar
breytingar á réttarkerfi okkar og þá
einkum refsivörslunni, eins og mest
hefur verið rætt um undanfarið, þá
verður sú umræða að vera yfirveguð og
upplýst. Grundvallarbreytingar hafa í
gegnum tíðina orðið á löggjöf og
stjórnskipan þjóða eftir mikil áföll eða
átök. Ég er þess fullviss að þegar mesta
rykið er sest og við sjáum loksins til
sólar eftir þessar efnahagslegu hamfarir
sem á okkur hafa dunið þá eigi eftir að
halda áfram og ef eitthvað er, aukast
umræða um það lagaumhverfi sem við
höfum búið okkur og það hvernig það
hefur þá nýst okkur til að bregðast við
og leysa úr þeim úrlausnarefnum sem
blasa við allt um kring.
Umræðan
Lárentsínus Kristjánsson hrl.