Skólavarðan - 01.10.2008, Blaðsíða 19
SKóLASTjóRAFéLAG íSLANdS
SKÓLAVARÐAN 6.TBL. 8. ÁRG. 2008
19
griðastaður nemenda – þeir eiga að finna
til öryggis og njóta bernsku sinnar í öllu
starfi á vegum skólans. Guðni reifaði ýmsar
nýjungar í lögunum og fjallaði um aukinn
sveigjanleika og samfellu milli skólastiga
auk þess sem hann upplýsti að ný námskrá
væri í undirbúningi. Hann áréttaði að grunn-
skólar útskrifuðu nemendur sína hér eftir
sem hingað til og ekkert hefði breyst í þeim
efnum. Þá varpaði hann fram til umhugsunar
að mat og eftirlit á skólastarfi gæti leitt til
bættrar þjónustu og betri skóla.
Sameiginleg framtíðarsýn fyrir
grunnskólastarfið 2007-2020
Síðari dag námstefnunnar kynnti Hrönn
Pétursdóttir verkefnisstjóri þá framtíðarsýn
sem var mótuð síðastliðið ár af Skólastjóra-
félagi Íslands, Félagi grunnskólakennara og
Sambandi íslenskra sveitarfélaga. Í erindi
sínu fór Hrönn yfir hvað þessi stefna þýðir
fyrir stjórnendur í grunnskólum og hvernig
hún nýtist í stjórnun menntastofnana. Unnið
var á þann hátt að stefna var færð inn í
svokölluð stefnukort og skorkort sem auðvelda
jafnframt yfirsýn. Þessar tvær gerðir korta
eru lykiltæki í stefnumiðuðu árangursmati
sem hefur rutt sér til rúms á undanförnum
árum. Að sögn Hrannar inniheldur stefnu-
kortið grunnstefnuna og hjálpar okkur að
forgangsraða, en skorkortin auðvelda okkur
að fara yfir markmiðin, athuga hvort við
höfum náð þeim og velja þau markmið
sem við setjum okkur næst. Hrönn nefndi
að þetta væri í fyrsta sinn sem allir aðilar
sem sjá um grunnskólahald kæmu sér
saman um sameiginlega sýn; sveitarfélög,
kennarar og stjórnendur. Stefnan er tæki
til að hafa umræðu um grunnskólann í
samfélaginu málefnalega og hún er líka
leið til sameiginlegrar hagsmunagæslu þar
sem samhugur er hjá ríki og sveitarfélögum
um rekstur skólans og stoðþjónustu fyrir
nemendur.
Glæra úr fyrirlestri Hrannar
Pétursdóttur:
Áhrif stefnunnar á skólastarf í landinu
• Sameiginleg sýn sveitarfélaga og skóla á
þróun skólastarfsins.
• Faglegur umræðu- og samstarfsgrunnur
rekstrar- og framkvæmdaaðila.
• Grunnur að stefnumótun sveitarfélaga og
grunnskóla.
• Leiðarvísir í ákvörðunum um nýtingu
fjármagns, mannafla, tíma og annarra
bjarga.
• Grundvöllur málefnalegrar umfjöllunar í
samfélaginu um skólastarf.
• Sameiginleg hagsmunagæsla.
Að erindi Hrannar loknu var opnað fyrir um-
ræður og talsvert var rætt um mikilvægi
skýrrar stefnumótunarvinnu. Vinnuhópar
tóku til starfa og glímdu við tvær spurningar:
1) Hvað þarf að gera til þess að koma þess-
ari stefnu í framkvæmd?
2) Hvað þarf að hafa til þess að geta gert
þetta?
Hópar kynntu niðurstöður sínar og þær
voru síðan sendar Kennarasambandinu til
skoðunar hjá framkvæmdanefnd. Helstu
niðurstöður úr hópastarfi voru að mikilvægt
væri að forgangsraða, taka lítil skref og
hafa aðgerðaáætlun. Þá væri fyrirsjáanlegt
að breyting þyrfti að verða á viðhorfum og
kennsluháttum auk þess sem fjölbreytt
fagþekking skipti meginmáli í ferlinu.
Í námstefnulok fór Ingileif Ástvaldsdóttir
yfir helstu atriði hennar og nefndi þau atriði
sem upp úr stóðu; sveigjanleika, ábyrgð,
forgangsröðun og samvinnu. „Við megum
þó ekki missa sjónar á kjarnastarfsemi
skólastarfsins, sem er vellíðan og samvera
allra í skólanum,“ sagði Ingileif ennfremur.
Ársfundur SÍ var haldinn í beinu framhaldi
af námstefnunni.
keg
Á vefsíðu Skólastjórafélags Íslands, si.ki.is, eru
glærur fyrirlesara og fundargerð námstefnu og
ársfundar.
Stefnukort