Ljósmæðrablaðið - 01.07.2017, Blaðsíða 28
28 Ljósmæðrablaðið - júlí 2017
Soffía og Maja mamma hennar
uppspretta visku og þekkingar
Á síðasta ári var tekið í notkun nýtt og glæsilegt færnisetur
Hjúkrunarfræðideildar í Eirbergi. Af því tilefni gafst kostur á að
endurnýja að hluta til tækjakost deildarinnar til færniþjálfunar og
hermikennslu. Námsbraut í ljósmóðurfræði hefur lengi vantað
vandaðar æfingadúkkur til að nýta við þjálfun og kennslu nema
í almennum handbrögðum við fæðingu, sem og sérhæfðari
handbrögðum við frávik í fæðingu. Úr mörgu var að velja og voru
kennarar námsbrautarinnar sammála um að freista þess að fá keyptar
æfingadúkkur úr silikoni sem líkja mun betur eftir raunverulegum
gangi fæðingar en eldri æfingadúkkur hafa gert. Íslenskar
ljósmæður hafa fengið að kynnast slíkum dúkkum á ráðstefnum
erlendis og hrifist mjög af þeim námstækifærum sem þær bjóða upp
á. Um áramót bárust námsbrautinni síðan æfingadúkkurnar sem frá
framleiðanda voru kallaðar „Soffía og mamma hennar“.
Æfingadúkkurnar hafa þegar verið notaðar til að kenna
ljósmæðranemum á fyrsta ári almenn handtök við fæðingu og
spangarstuðning og ljósmæðranemar á öðru ári hafa fengið
að spreyta sig á flóknari handtökum við axlarklemmur og
sitjandafæðingar. Einnig hafa ljósmæður sem sinna klínískri
kennslu og sí- og endurmenntun starfandi ljósmæðra fengið að
þjálfa sig í notkun æfingadúkkanna. Þær mæðgurnar rötuðu meira
að segja á fréttamiðla Háskólans og Ríkisútvarpsins, en við þau
tækifæri var eftir því tekið að móðurdúkkan hafði komið nafnlaus
í okkar hendur og hafði enn ekki verið fundið sómasamlegt nafn.
Stúlkubarnið litla, hún Soffía, kom til okkar fullnefnd og fékk
að halda því nafni sem framleiðendur hennar völdu henni, enda
valið ekki af verri endanum. Nafnið Soffía fær merkingu sína úr
forngrísku, en þar þýðir það viska eða þekking. Flestir þekkja þessa
merkingu orðsins úr samsetta orðinu yfir heimspeki, philosophie,
sem þýðir vinur viskunnar. Við treystum því að Soffía litla muni
bera nafn með rentu og vera uppspretta visku og þekkingar.
Það þótti ekki úr vegi að leita móður Soffíu litlu nafns á
svipuðum slóðum. Svo skemmtilega vill til að ein þekktasta
ljósmóðir sögunnar er móðir Sókratesar, sem sjálfur er talinn einn
af feðrum vestrænnar heimspeki. Þegar hann lýsti störfum sínum
líkti hann sér gjarnan við móður sína þar sem hans hlutverk væri
að vera ljósmóðir þekkingarinnar. Sjálfur hefði hann litla þekkingu
fram að færa en hjálpaði samferðamönnum sínum að fæða þá
þekkingu sem þeir byggju yfir. Nafn móður Sókratesar, Phaenarete,
er ekki sérlega þjált í íslenskum munni en það þýðir merkilegt nokk
„sú sem færir ljósinu dyggð sína.“ Almenna heitið yfir ljósmóður í
Grikklandi á þessum tíma var hins vegar „maia“, og því þótti kjörið
að okkar nýfengna móðir þekkingarinnar fengi íslenska nafnið
Maja.
Við óskum ljósmæðrum til hamingju með viðbótina og vonumst
til að þær mæðgur Soffía og Maja, viskan og ljósmóðirin, muni
færa bæði nemum og ljósmæðrum nýja og gamla þekkingu um
ókomin ár.
Berglind Hálfdánsdóttir
Tekið á móti undir styrkri leiðsögn yfirljósmóðurinnar.
Handtökin kennd.
Félag brjóstagjafaráðgjafa á Íslandi í samstarfi við Ljósmæðrafélag Íslands heldur námskeið um brjóstagjöf
föstudaginn 27. október 2017 frá kl. 8:30 – 16:00 á Nauthól.
Fyrirlesari verður Catherine Watson Genna sem er sjálfstætt starfandi brjóstagjafaráðgjafi í New York.
Hún er hjúkrunarfræðingur BSc. og brjóstagjafaráðgjafi IBCLC.
Námskeiðið verður í formi fyrirlestra og vinnusmiðju og mun nýtast ljósmæðrum í heimaþjónustu og á
sængulegudeildum, brjóstagjafaráðgjöfum og hjúkrunarfræðingum í ungbarnavernd.
NÁMSKEIÐ UM BRJÓSTAGJÖF