Ljósmæðrablaðið - 01.07.2017, Blaðsíða 39

39Ljósmæðrablaðið - júlí 2017
Á dögunum gafst íslenskum ljósmæðrum tækifæri til að sækja eitt
af hinum vinsælu Gynzone námskeiðum í Reykjavík og á Akureyri
undir stjórn dönsku ljósmóðurinnar og frumkvöðulsins Dr. Söru
Kindberg. Það var upplifun í sjálfu sér að eyða deginum með
þessari kraftmiklu konu sem hefur augljóslega einstakt lag á því að
leiðbeina öðrum á þann hátt að flókin verkefni verða yfirstíganleg og
spennandi áskorun. Henni tókst ekki bara að kenna reynsluboltum
ný trikk og skátaforingja að hnýta nýja hnúta, heldur kvað hún líka
kjaftforustu ljósmæðurnar í kútinn með beittum húmor sínum og
kostulegum frásögnum.
Sara er klínískur sérfræðingur í viðgerðum á spangarrifum eftir
fæðingu. Fyrir níu árum síðan stofnaði hún Gynzone sem byrjaði
sem vefsíða með kennsluefni, myndböndum og upplýsingum um
nýjustu rannsóknir á sviðið spangarviðgerða en er í dag fyrirtæki
sem vinnur að því með fjölbreyttum hætti að auka fagmennsku og
gæði í öllu því sem við kemur spangaráverkum, viðgerðum og heilsu
kvenna í því samhengi. Þau útbúa metnaðarfull kennslumyndbönd,
halda námskeið og kenna í ljósmæðra- og læknadeildum út um víðan
völl við miklar vinsældir. Árið 2011 var Sara heiðruð fyrir störf sín
og útnefnd kvenfrumkvöðull ársins í heimalandi sínu.
Það var fróðlegt að heyra hvernig unnið er að hámarka gæði
þjónustunnar og hæfni starfsfólksins á sjúkrahúsinu í Árósum þar
sem Sara starfar. Þar er öllum konum boðið að koma í eftirskoðun
nokkrum dögum eftir fæðingu og ef rifur hafa gróið illa eða verið
saumaðar á rangan hátt saman er þeim boðið að láta lagfæra
viðgerðina. Rannsóknir sýna að með því að gera við rifurnar á fyrstu
vikunum eftir fæðingu eru líkurnar á árangursríkri viðgerð mjög
miklar eða um 90%, en eftir að þrjár vikur eru liðnar eru aðeins
helmingslíkur á góðum árangri. Sara leggur líka áherslu á að það
sé nauðsynlegt að við lærum af mistökunum sem við gerum og í
Árósum er því bæði ljósmæðrum og læknum sem hafa endurtekið
gert mistök boðið upp á frekari þjálfun og eftirfylgni og þannig
unnið markvisst að því að styðja við starfsfólkið og auka þannig
gæði þjónustunnar.
Óvísindaleg könnun undirritaðrar leiddi í ljós að ljósmæðurnar
voru hæst ánægðar með daginn og bæði nýútskrifaðar og þær sem
eru flestum hnútum kunnugar lærðu eitthvað nýtt og skerptu á
mikilvægum atriðum. Frábært námskeið í alla staði.
Við bendum áhugasömum á að hægt er að nálgast upplýsingar um
Gynzone og þeirra starf á heimasíðu þeirra: www.gynzone.net.
Rut Guðmundsdóttir
Ljósmæður á saumanámskeiði
Kennararnir frá Danmörku.
Lærdómurinn á fullu.