Morgunblaðið - 16.10.2019, Page 12

12 FRÉTTIRErlent
MORGUNBLAÐIÐ MIÐVIKUDAGUR 16. OKTÓBER 2019
Seljavegur 2 | Sími: 511-3340 | Fax: 511-3341 | www.reyap.is | reyap@reyap.is
Apótekið þitt
í gamla Héðinshúsinu við Seljaveg 2
Afgreiðslutími:
9-18:30 virka daga
10-16:00 laugardaga
Reykjavíkur Apótek býður upp á allar tegundir lyfja. Mikið og fjölbreytt úrval af
heilsuvörum, bað- og ilmvörum, gjafavörum auk ýmissa annarra góðra kosta.
Reykjavíkur Apótek er sjálfstætt starfandi apótek sem leggur áherslu á
persónulega þjónustu og hagstætt verð.
• Öryrkjar og eldri borgarar njóta sérkjara hjá okkur
• Frí heimsendingarþjónusta
Bogi Þór Arason
bogi@mbl.is
„Hvílíkt klúður. Oft líða mánuðir eða
ár þar til skaðlegar afleiðingar af-
glapa í utanríkismálum skjóta upp
kollinum en skaðinn af þeirri ákvörð-
un Donalds Trumps forseta að flytja
bandaríska hermenn frá norðan-
verðu Sýrlandi kemur nú fram nán-
ast í rauntíma,“ segir í forystugrein
The Wall Street Journal um átökin í
landinu. Blaðið segir að viðvaranir
þeirra, sem gagnrýndu ákvörðun
Trumps, hafi nú þegar orðið að veru-
leika. Hún hafi m.a. orðið til þess að
tyrkneski herinn hafi ráðist inn í
norðurhluta Sýrlands og Kúrdar,
sem voru bandamenn Bandaríkja-
hers í baráttunni gegn samtökunum
Ríki íslams, hafi gripið til þess ráðs
að semja við einræðisstjórnina í Sýr-
landi til að verjast innrásinni. Enn-
fremur sé hætta á að liðsmenn Ríkis
íslams sleppi úr fangelsum Kúrda og
hefji að nýju baráttu sína fyrir stofn-
un íslamsks ríkis.
„Enginn treystir Trump“
Margir fréttaskýrendur hafa tekið
í sama streng frá því að Trump til-
kynnti ákvörðun sína um brottflutn-
ing hermannanna eftir símasamtal 6.
þessa mánaðar við Recep Tayyip Er-
dogan, forseta Tyrklands.
Robert Malley, formaður hugveit-
unnar International Crisis Group,
segir að ákvörðun Trumps hafi verið
fyrirsjáanleg í ljósi þess að forsetinn
hafi tilkynnt í desember að hann
hygðist kalla bandaríska herliðið í
Sýrlandi heim en síðan dregið í land
með það vegna andstöðu embættis-
manna í stjórn hans og meðal repú-
blikana á þinginu. „Þetta er hins
vegar gert á þann hátt að ákvörð-
unin hefur allar verstu afleiðing-
arnar sem hægt var að hugsa sér,“
hefur fréttaveitan AFP eftir Malley.
Elizabeth Dent, ráðgjafi banda-
ríska utanríkisráðuneytisins í bar-
áttunni gegn Ríki íslams, sagði að
ákvörðun Trumps gæti orðið til þess
að samtökin risu úr öskustónni og
stjórn Bandaríkjanna hefði þurft að
undirbúa brottflutning herliðsins
betur til að tryggja að liðsmenn sam-
takanna slyppu ekki úr fangelsum
Kúrda.
Joshua Landis, sérfræðingur í
málefnum Sýrlands við Oklahoma-
háskóla, sagði að afskipti banda-
rískra stjórnvalda af stríðinu í Sýr-
landi hefðu alltaf verið ruglingsleg
og orðið til þess að Kúrdar hefðu
gert sér of miklar vonir um ávinning
af samstarfinu við Bandaríkin.
„Bandaríkjamenn ætluðu aldrei að
vera í Sýrlandi til langframa og
hjálpa Kúrdum að stofna hálfsjálf-
stætt ríki. Það voru draumórar,“
hefur AFP eftir Landis. Hann telur
hins vegar að ákvörðun Trumps
verði vatn á myllu klerkastjórnar-
innar í Íran og Vladimírs Pútíns
Rússlandsforseta sem hafa stutt ein-
ræðisstjórnina í Sýrlandi. „Hluta-
bréf í Trump forseta hafa snarlækk-
að í verði í Mið-Austurlöndum en
hlutabréf í Pútín hafa rokið upp
vegna þess að enginn treystir
Trump – ráðamenn ríkjanna telja að
hann ætli að kippa Bandaríkjunum
út úr Mið-Austurlöndum og láta þau
sjá um sig sjálf.“
„Heimsbyggðin hlær að
forseta Bandaríkjanna“
The Wall Street Journal segir að
Trump hafi gert illt verra með því að
heimila refsiaðgerðir gegn nokkrum
tyrkneskum embættismönnum og
varnarmálaráðuneyti og orkumála-
ráðuneyti Tyrkalands. Forsetinn
kvaðst einnig ætla að stöðva við-
ræður um nýjan viðskiptasamning
við Tyrkland og hækka tolla á inn-
flutt tyrkneskt stál í 50%. Blaðið
segir að þetta hafi orðið til þess að
Trump hafi leiðst út í deilu sem hann
hafi viljað forðast. „Hefði ekki verið
einfaldara að segja einfaldlega við
Erdogan í frægu símasamtali þeirra
að Bandaríkin liðu ekki hernað
Tyrkja gegn Kúrdum og myndu
beita herþotum sínum til að hindra
hann? Erdogan hefði þurft að gefa
eftir og halda áfram að semja við
Kúrda og Bandaríkjamenn um ör-
yggissvæði í Sýrlandi.“
Trump gerir einnig illt verra með
tilraunum sínum til að réttlæta
ákvörðun sína, að mati The Wall
Street Journal. „Leyfum Sýrlend-
ingum og Assad [Sýrlandsforseta]
að vernda Kúrda og berjast við
Tyrki um land sitt,“ sagði Trump á
Twitter í fyrradag. „Allir sem vilja
hjálpa Sýrlendingum að vernda
Kúrda mega það mín vegna, hvort
sem þeir eru Rússar, Kínverjar eða
Napoleon Bonaparte. Ég vona að
þeim vegni öllum vel, við erum 7.000
mílur í burtu.“
„Við göngum út frá því að orð
hans um Napoleon hafi verið brand-
ari, en heimsbyggðin hlær nú að for-
seta Bandaríkjanna,“ segir The Wall
Street Journal og rekur ákvörðun
Trumps til einangrunarstefnu í
utanríkismálum. „Þetta er
einfeldnisleg einangrunarstefna og
skilaboð til þrjóta heimsins um að
forseti Bandaríkjanna hafi engan
hug á að láta til sín taka í þágu
bandamanna eða hagsmuna Banda-
ríkjanna. Vinum á borð við Ísraela
og Sáda er brugðið og Íranar, Rúss-
ar og Hizbollah-menn trúa því varla
að Trump hafi hlaupist frá skuld-
bindingum Bandaríkjanna og banda-
mönnum þeirra með svo skýrum
hætti.“
Utanríkisstefnan tvíþætt:
viðskiptabönn og refsitollar
The Wall Street Journal segir að
líta megi svo á að stefna Trumps í
utanríkismálum sé fólgin í tveimur
vopnum – viðskiptabönnum og refsi-
tollum. Hann beiti þeim nauðugur
viljugur gegn bandamönnum jafnt
sem óvinum.
Blaðið spáir því að ákvörðun
Trumps komi honum í koll heima
fyrir. „Repúblikanar sem hafa stutt
hann í deilunni um Rússlandsmálið
og fleira efast nú um dómgreind
hans sem yfirmanns hersins í heimi
sem er að verða hættulegri. Nú þeg-
ar ákæra til embættismissis er yfir-
vofandi hefur hann ekki efni á því að
styggja fleiri vini.“
Ákvörðun Trumps sögð klúður
 The Wall Street Journal gagnrýnir Bandaríkjaforseta fyrir að flytja bandaríska hermenn frá norðan-
verðu Sýrlandi  Segir forsetann aðhyllast „einfeldnislega einangrunarstefnu“ og gera sig að athlægi
AFP
Flýja blóðsúthellingar Sýrlenskar fjölskyldur flýja frá átakasvæði nálægt bænum Ras al-Ain við landamærin að
Tyrklandi. Hörð átök hafa geisað þar milli hersveita Kúrda og Tyrklandshers og sýrlenskra bandamanna hans.
Ætla að hindra átök milli
Tyrkja og Sýrlandshers
» Rússar ætla að sjá til þess
að ekki komi til átaka milli her-
sveita Tyrkja og Sýrlandshers í
norðanverðu Sýrlandi, að sögn
Alexanders Lavrentjevs, sendi-
manns rússnesku ríkisstjórn-
arinnar í málefnum landsins.
» Lavrentjev var í heimsókn í
Sameinuðu arabísku fursta-
dæmunum og sagði að innrás
Tyrkja og bandamanna þeirra í
norðurhluta Sýrlands væri
„óviðunandi“.
» Rússneskir hermenn hafa
verið í Sýrlandi til að styðja
einræðisstjórn landsins frá
árinu 2015.
» Innrás Tyrkja varð til þess
að hersveitir Kúrda sömdu um
samstarf við stjórnarher Sýr-
lands. Kúrdar segja að hann
eigi að hjálpa þeim að ná aftur
yfirráðum yfir svæðum sem
her Tyrkja nái á sitt vald.
Vopnabræður Tyrkneskir hermenn og bandamenn þeirra safnast saman í
grennd við sýrlenska bæinn Manbij, nálægt landamærunum að Tyrklandi.