Morgunblaðið - 13.03.2020, Qupperneq 13

FRÉTTIR 13Erlent
MORGUNBLAÐIÐ FÖSTUDAGUR 13. MARS 2020
Atli Steinn Guðmundsson
skrifar frá Ósló
Ríkisstjórn Noregs ákvað í gær að
grípa til þess sem Erna Solberg for-
sætisráðherra kallar mesta inngrip í
líf þjóðarinnar á friðartímum þegar
atvinnulífi landsins voru settar um-
fangsmiklar skorður auk þess sem
heilbrigðisstarfsfólki var bannað að
yfirgefa Noreg fram til loka apríl-
mánaðar.
Bent Høie heilbrigðisráðherra
kynnti meginhluta nýju reglnanna en
Camilla Stoltenberg, forstöðumaður
Lýðheilsustofnunar Noregs, talaði
einnig á fundinum. Frá klukkan 18 í
gærkvöldi að norskum tíma var öllum
skólastofnunum landsins gert að loka
dyrum sínum í tvær vikur og auk þess
fjölda annarra fyrirtækja; líkams-
ræktarstöðvum, húðflúrstofum, hár-
greiðslu- og snyrtistofum, sundlaug-
um og vínveitingahúsum sem ekki
bjóða upp á mat.
2,2 milljónir gætu smitast
„Við skulum hafa hugfast hverra
við erum að gæta. Þess vegna getum
við ekki leyft öfum og ömmum í
áhættuhópum að passa börnin,“ sagði
Erna Solberg á fundinum og kynnti
um leið þá lausn að ríkið myndi út-
vega fólki í lykilstöðum barnapössun
svo því yrði kleift að sinna störfum
sínum. Tala smitaðra í Noregi fór yfir
700 í gær.
Spár Lýðheilsustofnunar gera ráð
fyrir því að allt að 2,2 milljónir Norð-
manna geti sýkst af kórónuveirunni
fari allt á versta veg. Einkenni flestra
verði þó lítil, jafnvel engin, að sögn
Stoltenberg.
Í Danmörku höfðu 674 greinst með
smit síðdegis í gær að sögn heilbrigð-
isyfirvalda þar. Hafa Danir einnig
lokað fjölda samkomustaða, hvort
tveggja veitingahúsum og líkams-
ræktarstöðvum. Íþróttasambandið
DGI, sem hefur 1,6 milljónir iðkenda
á sínum snærum, tilkynnti í gær að
öllum viðburðum og keppnum á veg-
um þess fram til 30. mars væri frest-
að eða aflýst.
„Við berum ábyrgð gagnvart þeim
íþróttafélögum sem tilheyra sam-
bandinu. Nú ríður á að við fylgjum
þeim línum sem yfirvöld hafa lagt og
við styðjum fullkomlega þær aðgerðir
sem nú hefur verið gripið til,“ sagði
Charlotte Bach Thomassen, formað-
ur DGI, í fréttatilkynningu í gær.
Óvissa hjúkrunarnema
Samtímis þessu vita danskir hjúkr-
unarfræðinemar ekki í hvorn fótinn
stíga skuli eftir að Magnus Heunic-
kes heilbrigðisráðherra tilkynnti í
byrjun vikunnar að nemendur heil-
brigðisvísinda mættu reikna með að
vera kallaðir til starfa fyrirvaralaust.
Á miðvikudaginn bárust hins vegar
þau boð frá Mette Frederiksen for-
sætisráðherra að allir nemar fengju
frí frá starfsnámi og skyldu halda sig
heima þar til annað yrði tilkynnt.
Sænskir fjölmiðlar tilkynntu um
660 kórónusmitaða undir kvöld í gær.
Eins og annars staðar í heiminum
hefur kórónufaraldurinn komið
harkalega niður á ferðaþjónustu og
tilkynnti hótelkeðjan Scandic, sú
stærsta í Skandinavíu, um uppsagnir
2.000 starfsmanna sinna í Svíþjóð í
gær, sem er um það bil helmingur
starfsmanna keðjunnar þar í landi.
Svíar hafa þó ekki enn tekið
ákvörðun um að leggja skólahald af
vegna veirunnar og sagði Anders
Tegnell sóttvarnalæknir í samtali við
sænska ríkisútvarpið SVT í gær að sú
ákvörðun að loka skólum hefði veru-
leg áhrif á vinnumarkað alls sam-
félagsins. „Að loka skólum gæti alveg
eins haft þau áhrif að smitum fjölgaði
frekar en að þeim fækkaði,“ sagði
Tegnell.
Læknar aflýsa ráðstefnu
Í Finnlandi höfðu 109 manns smit-
ast af veirunni um kvöldmatarleytið í
gær. Meðal hinna smituðu er hjarta-
skurðlæknir í Helsinki en auk hans
sitja nú 15 læknar og 13 hjúkrunar-
fræðingar í finnsku höfuðborginni í
einangrun. Finnsk stjórnvöld hafa
mælst til þess að samkomum fleiri en
500 þátttakenda verði aflýst og öðr-
um samkomum frestað svo sem kost-
ur er, en enn sem komið er hafa boð
og bönn ekki einkennt viðbrögð
Finna.
Sanna Marin forsætisráðherra bað
landsmenn þess lengst allra orða að
fara eftir því sem mælst væri til varð-
andi ferðalög almennings og takast
ekki á hendur önnur ferðalög en
nauðsynleg væru. Finnska utanríkis-
ráðuneytið tekur í sama streng og
biður borgarana að meta hvort ferða-
lög til annarra landa séu nauðsynleg.
Til stóð að 3.000 finnskir læknar
kæmu saman á ráðstefnu í Tampere
en í gær bárust fréttir af því að
ákveðið hefði verið að aflýsa henni
vegna smithættu.
Mega ekki fara frá Noregi
 Mesta inngrip í norskt þjóðlíf á friðartímum  „Skulum hafa hugfast hverra við erum að gæta“
 Íþróttakappleikjum frestað í Danmörku  Scandic-hótelkeðjan segir upp 2.000 starfsmönnum
Kórónuveirufaraldurinn: Síðustu atburðir
Ítalía: 2.300 ný
tilfelli síðasta sólarhring.
Fyrsta dauðsfallið
í Grikklandi.
Tilfellum á Spáni
fjölgaði í 2.140.
Ráðherrar í Frakklandi,
Spáni og Bretlandi smitaðir
Í Ástralíu:
Kvikmyndastjarnan Tom Hanks
og kona hans í einangrun.
Formúlu 1 kappakstri aflýst
eftir að keppandi smitaðist
Japanar segja
„óhugsandi”að
aflýsa Ólympíuleikum
Ferðamannastaðir í
Shanghæ opnaðir á
ný eftir að nýjum til-
fellum í Kína fækkar
til muna
Bandaríkin
Trump forseti
setur mánaðarlangt
bann á ferðir frá
meginlandi Evrópu.
Bretland og Írland
undanskilin
Hlutabréf og
olía falla í verði
en fjárfestar óttast að al-
þjóðlegt samdráttarskeið sé
framundan vegna ferða-
banns Bandaríkjanna og
yfirlýsingarWHO um
heimsfaraldur
Útbreiðsla
kórónuveiru
12.mars kl. 17
Tilfelli greind
í 115 löndum
127.863 tilfelli
4.718 dauðsföll
Staðfest
tilfelli
Dauðsföll
Íranir óska
eftir láni frá
Alþjóðagjaldeyrissjóðnum
í fyrsta skipti í sex áratugi.
Þar hafa 429 látist
Tveir bandarískir hermenn og einn
breskur létust í árás á Taji-herstöð-
ina norður af Baghdad, höfuðborg
Íraks, í gær. Heimildarmenn breska
ríkisútvarpsins BBC staðfestu vígið í
gær og sögðu nöfn hinna látnu enn
ekki hafa verið látin uppi.
Mikil spenna hefur ríkt milli
stjórnvalda í Íran og herafla Vest-
urlanda í Írak, einkum Bandaríkja-
hers, síðan íranski hershöfðinginn
Qasem Soleimani var ráðinn af dög-
um í drónaárás Bandaríkjamanna 3.
janúar.
Hóta maklegum málagjöldum
Í gær fékkst staðfest að 18 flug-
skeyti hefðu hæft Taji-herstöðina
um klukkan hálfátta í gærkvöld að
staðartíma í Írak og væri rannsókn á
atvikinu hafin. Breska varnarmála-
ráðuneytið sagði í yfirýsingu í gær,
að breski hermaðurinn sem lét lífið
hefði verið sjúkraliði.
„Okkur mun seint gleymast fórn-
fýsi hinna látnu og við ábyrgjumst að
þeir sem frömdu þessi fólskuverk
munu fá að svara til saka,“ sagði í yf-
irlýsingu frá ráðuneytinu auk þess
sem Ben Wallace varnarmálaráð-
herra sagði árásina „heigulsverk
undirmálsmanna“.
Breski forsætisráðherrann Boris
Johnson fordæmdi árásina enn
fremur. „Utanríkisráðherra [Bret-
lands] hefur rætt málið við starfs-
bróður sinn í Bandaríkjunum og við
munum taka málið upp við tengiliði
okkar á alþjóðavettvangi til að öðlast
skilning á því hvað býr að baki þess-
ari viðurstyggilegu árás,“ sagði
Johnson í yfirlýsingu í gær. Víga-
menn með tengsl við Íran hafa legið
undir grun ráðamanna í Washington
fyrir ámóta árásir sem átt hafa sér
stað, meðal annars á svæðum nálægt
landamærum Íraks og Sýrlands.
Fórust í flug-
skeytaárás í Írak
 Hinir ábyrgu fái að svara til saka
AFP
Líkfylgd Bandarískir hermenn bera
félaga sinn sem lést í Írak um
helgina um borð í flugvél heim.
Pantaðu borð í síma 483 4700 | hverrestaurant.is
Breiðumörk 1 C, 810 Hveragerði
ÞÚ BORÐAR
VEL Á HVER
OPIÐ
11:30–22:00
ALLADAGA
Fjölbreyttur og spennandi matseðill,
notaleg þjónusta og hagstætt verð.