Feykir - 28.08.2019, Blaðsíða 8

Það er til fullt af fólki í heiminum, og
enginn eins. En nánast allir eiga eitthvað
eitt sameiginlegt, þó ekki endilega það
sama. Það var mörgum sem fannst „Game
of thrones“ skemmtilegt, aðrir sem finnst
golf skemmtilegt og einhverjir eru með
blá augu. En það er til hópur af fólki (og
örugglega nokkrir) sem kallar sig ekki hóp
því þau auglýsa sig ekki og hafa ekkert
sameiginlegt áhugamál.
Ég vil kalla þau góða og gáfaða fólkið, það
er fólkið sem tekur hlutina skrefinu lengra
en kurteisa fólkið og segir engum frá því
hvað það gerir, hvorki á samfélagsmiðlum
eða í daglegu tali, eða allavega ekki oft og
það er ekki ástæðan fyrir því að verkið var
framkvæmt. Þau leggja bílnum vel og rétt
í stæði, bíða stillt og þolinmóð í röðum,
taka utan af rúmum þar sem þau gista svo
húsráðandi þurfi ekki að gera það, segja
viðmælanda frá því þegar hann er með
rjóma eða súkkulaði í munnvikinu, taka
langa króka á leið sína til þess að keyra
fullt fólk heim af böllum, spyrja um ofnæmi
hjá fólki sem ætlar að koma í mat, gefur
stefnuljós þegar má taka fram úr, tína upp
rusl á förnum vegi henda því þar sem við á.
Þessi listi er ótæmandi sem og svo margir
aðrir upptalningalistar og mér mun aldrei
detta í hug öll þau atriði sem eiga við.
Það þarf bara að framkvæma einn af
þessum hlutum eða öðrum í líkingu þeirra
til þess að komast inn í þennan hóp. Ekki
að það sé til neinn formlegur hópur svo ég
viti og ef svo væri veit ég ekki alveg hvernig
árshátíð hjá þeim hópi gæti verið, en líklega
skemmtileg og allir kæmust heilir heim.
Heimurinn er fullur af svona fólki, það sést
út um allt og finnst í öllum löndum. En það
sést enginn munur á því og þessum sem
henda rusli út í náttúruna eða leggja illa,
sem mættu klárlega bæta sig.
Mig langaði bara aðeins að skrifa um þau
og þakka þeim fyrir að vera til. Veröldin er
betri staður með ykkur.
Ég skora á vin minn Jón Frey Gíslason til
að skrifa næsta pistil. Vonandi dettur þér
eitthvað sniðugt í hug.
Góða og gáfaða fólkið
Helga Rún Jóhannsdóttir Bessastöðum
ÁSKORANDINN palli@feykir.is
Helga Rún Jóhannsdóttir. MYND: AÐSEND
Málefni fatlaðra á Norðurlandi vestra
Húnaþing vestra klýfur sig frá samstarfi
Þann 1. janúar 2016 tók gildi samningur milli
sveitarfélaga á Norðurlandi vestra; Akrahrepps,
Blönduósbæjar, Húnavatnshrepps, Húnaþings vestra og
Skagastrandar við Sveitarfélagið Skagafjörð um að það
verði leiðandi sveitarfélag í málefnum fatlaðra á
Norðurlandi vestra. Samningurinn felur í sér að fötluðu
fólki, sem á lögheimili í aðildarsveitarfélögum, sé veitt sú
þjónusta sem kveðið er á um í lögum. Nú í árslok rennur
samningurinn út og hefur Húnaþing vestra ákveðið að
endurnýja ekki núgildandi samning og hefur falið
sveitarstjóra að hefja vinnu við næstu skref við yfirtöku
málaflokksins.
„Það er rétt að árétta, líkt og kemur fram í bókun
Byggðaráðs, að Húnaþing vestra er ekki að slíta samstarfi
við Skagafjörð um málefni fatlaðra. Heldur er
samningurinn við Skagafjörð að renna út og hyggst
Húnaþing vestra ekki óska eftir endurnýjun samningsins.
Eins og kemur fram í bókun byggðarráðs þá mun
sveitarfélagið taka yfir málaflokkinn og mun leitast við að
efla þá þjónustu sem þegar er í boði og telur sveitarfélagið
sig geta veitt góða samræmda þjónustu til allra íbúa óháð
stöðu þeirra. Þar sem ég er nýkomin til starfa hef ég ekki
haft tök á að sökkva mér ofan í hvernig staðið verður að
yfirfærslunni en mun gera það á næstu vikum,“ segir
Ragnheiður Jóna Ingimarsdóttir, sveitarstjóri Húnaþings
vestra.
Sú ákvörðun Húnaþings vestra að endurnýja ekki
samninginn, hefur leitt til þess að öll sveitarfélögin, sem
voru aðilar að núgildandi samkomulagi, hafa þurft að
endurmeta stöðuna. Á fundi byggðarráðs Sveitarfélagsins
Skagafjarðar í síðustu viku kom fram að ráðið telji allar
forsendur til þess að Sveitarfélagið Skagafjörður annist
þjónustu við fatlað fólk, hvort sem er í samstarfi við önnur
sveitarfélög eða eitt og sér.
Akrahreppur, Blönduós og Skagaströnd óska eftir
áframhaldandi samstarfi um þjónustu við fatlað fólk en
Sveitarstjórn Húnavatnshrepps hefur ekki tekið formlega
afstöðu til málsins.
„Núgildandi samningur byggir á jafnræði í þjónustu innan
alls svæðisins, eða eins og segir í núgildandi
samstarfssamningi: Þjónusta innan svæðisins er veitt á
jafnræðisgrundvelli og byggja ákvarðanir um veitingu
hennar á mati á þjónustuþörf. Sá sem metinn er í mestri
þörf fyrir þjónustu skal að öllu jöfnu hafa forgang að
þjónustu, óháð búsetu. Þá gilda sömu viðmið um
þjónustustig á svæðinu öllu. Eðlilega er mismunandi
þjónustuþörf á hverju svæði fyrir sig, á hverjum tíma fyrir
sig, enda breytist þjónustan í takt við ríkjandi þörf á
hverjum tíma. Það er því ekki hægt að segja að
samningurinn sé góður eða slæmur fyrir eitthvert eitt
sveitarfélag innan svæðisins,“ segir Sigfús Ingi Sigfússon,
sveitarstjóri Svf. Skagafjarðar.
Samstarfssamningurinn kveður á um þjónustu sem veitt er
samkvæmt lögum um þjónustu við fatlað fólk með
langvarandi stuðningsþarfir og bera sveitarfélögin ábyrgð á
skipulagi og veitingu almennrar félagsþjónustu á
forsendum laga um félagsþjónustu sveitarfélaga. „Þar geta
áherslur sveitarfélaganna varðandi skipulag og veitingu
þjónustu verið ólíkar, s.s. varðandi samþætta þjónustu,“
segir Sigfús Ingi. /PF
Ragnheiður Ásta Jóhannsdóttir, Jónína G. Gunnarsdóttir og Gréta Sjöfn Guðmundsdóttir í skynörvunarherbergi Iðju á Sauðárkróki 2017.
Mynd: FE
8 32/2019