Dagfari - okt. 2017, Blaðsíða 12

12
ICAN og friðarverðlaun Nóbels
Þau gleðitíðindi bárust í haust að alþjóðlegu baráttusamtökin ICAN
hefðu hlotið friðarverðlaun Nóbels árið 2017. Þetta eru sérdeilis
ánægjulegar fréttir fyrir félaga í Samtökum hernaðarandstæðinga, enda
er um hálft ár frá því að SHA gengu formlega í ICAN.
Samtök þessi hafa verið leiðandi í baráttunni fyrir að sett verði
alþjóðlegt bann við kjarnorkuvopnum. Ástæðan er áhugaleysi
kjarnorkuveldanna á að framfylgja þeim ákvæðum gildandi
afvopnunarsamninga sem gera ráð fyrir að kjarnavopnum sé útrýmt.
Ýmsir töldu fullreynt að berjast innan marka sáttmála á borð við NTP
(sáttmálinn um bann við útbreiðslu kjarnorkuvopna) en vildu þess í stað
horfa til þess að banna vopnin beint á vettvangi Sameinuðu þjóðanna.
Fyrirmyndin að þessari leið eru samningar á borð við bann við
jarðsprengjum og efnavopnum, sem í fyrstu voru einungis undirritaðir af
ríkjum sem ekki höfðu yfir slíkum vopnum að ráða og í öþökk hinna, en
unnu sér með tímanum þegnrétt og almenna viðurkenningu.