Rit Mógilsár - apr 2002, Qupperneq 2

2
1 SAMANTEKT

Lárus Heiðarsson 2001. Hæðarvaxtarföll fyrir rússalerki (L.
sukaczewii Dylis) á Fljótsdalshéraði. Rit Mógilsár Rannsóknastöðvar
Skógræktar nr.11./2002. 27 s.

Tilgangur rannsóknarinnar var að búa til hæðarvaxtarföll fyrir
rússalerki (L. sukaczewii Dylis) sem nota mætti við gróskuflokkun
rússalerkiskóga á Fljótsdalshéraði. Í rannsókninni voru mæld 34 tré,
valin af handahófi í lerkiteigum á Hallormsstað og í Mjóanesi á
Fljótsdalshéraði. Hjá þessum trjám var ferill hæðarvaxtar rakinn með
árhringjagreiningu (á sænsku: stamanalys). Í rannsókninni var notuð
hrein meðalhæð og notagildi fallanna takmarkast við innanvert
Fljótsdalshérað.

Það fall sem best lýsti ferli meðalhæðarinnar styðst við lífaldur og
meðalhæð við 100 ára aldur (H100). Fallið er ólínuleg
aðhvarfsgreining þar sem stikarnir eru reiknaðir út með ítrun (e.
iteration process). Sloboda (1971) hefur skrifað tvö FORTRAN forrit
þar sem þetta er gert með hjálp stigulsaðferð (e. gradient method)
sem fylgir reglum um minnstu tvíveldasummu (e. least sum of
squares).

Niðurstöður rannsóknarinnar sýna að lerkiskógar á Hallormsstað
ættu að geta náð 25 metra meðalhæð við góð vaxtarskilyrði á 100
árum og 17 metra meðalhæð á sama tíma við lakari skilyrði.

Lykilorð: Hæðarvaxtarfall, rússalerki.