Hinsegin dagar í Reykjavík - Aug 2017, Page 58

Yfirlýsing
Samtakanna ‘78:
Mannréttindi nær
og fjær
Þann 5. maí stóðu Samtökin ‘78 fyrir mótmælum
fyrir framan rússneska sendiráðið til að minna
á alvarleika ástandsins í Tsjetsjeníu, þar sem
einhverjar alvarlegustu ofsóknir gegn hinsegin fólki
í seinni tíð standa nú yfir. Í ræðu sinni sagði María
Helga Guðmundsdóttir, formaður Samtakanna ‘78,
meðal annars:
„Í Tsjetsjeníu er verið að hneppa homma og
tvíkynhneigða karla í fangabúðir, svelta þá, berja
og pynta, þvinga upp úr þeim upplýsingar um
meðbræður sína og hvetja fjölskyldur þeirra til að
drepa þá. Að minnsta kosti þrír menn hafa látið lífið:
einn af áverkunum sem hann hlaut í haldi og tveir
fyrir hendi fjölskyldna sinna. Aðrir hafa óskað eftir
hjálp við að komast undan en síðan horfið sporlaust.
Hinsegin samtökin Russian LGBT Network vinna
hörðum höndum að því að koma fólki í öruggt skjól en
ástandið fer versnandi.

Við höfum séð þetta allt áður. Við höfum séð
það þegar þýskir menn sem grunaðir voru um
samkynhneigð voru settir í útrýmingarbúðir og
merktir með bleikum þríhyrningum eins og þeim sem
við berum í dag. Við höfum séð það þegar yfirvöld um
víða veröld ætluðu að halda að sér höndum og leyfa
alnæminu að útrýma hommum. Við höfum séð það
þar sem lög eru sett sem gera okkur réttdræp, sem
gera tilvist okkar að lögbroti, sem meina okkur að tjá
okkur. En árið er 2017 og nú er nóg komið. Hingað og
ekki lengra!

Við skorum á fulltrúa íslenskra stjórnvalda að nýta
krafta sína til knýja fram inngrip í ástandið, bæði
á alþjóðlegum vettvangi og í beinum samskiptum
við rússnesk stjórnvöld. Þessa glæpi þarf að stöðva,
rannsaka og refsa fyrir. Og það verður að tryggja
að þolendur komist í öruggt skjól. Gefum það
skýrt út að við fordæmum hómófóbíu og hin grófu
mannréttindabrot sem eiga sér stað á grundvelli
hennar!

Í mannréttindayfirlýsingu Sameinuðu þjóðanna
segir: „Enginn skal sæta pyndingum, grimmilegri,
ómannlegri eða vanvirðandi meðferð eða refsingu.“
Rússland hefur samþykkt þá yfirlýsingu – yfirlýsingu
sem er nú fótum troðin. Rússnesk yfirvöld verða að
grípa inn í tafarlaust, rannsaka þessa glæpi til hlítar og
draga hina seku til ábyrgðar.
Afstöðuleysi er afstaða með óbreyttu ástandi.
Takið afstöðu. Virðið skuldbindingar ykkar.
Burt með hómófóbíu!“

Samtökin ‘78 fagna þeim lagalegu sigrum sem hafa
áunnist á síðustu áratugum. Á sama tíma þurfum
við að vera meðvituð um að Ísland er að dragast
aftur úr í evrópskum samanburði á réttindum
hinsegin fólks, þar sem mörg lönd eru komin með
betri löggjöf. Við erum nú í 17. sæti af 42 þjóðum á
Regnbogakorti ILGA-Europe og uppfyllum aðeins
47% uppsettra skilyrða.