Morgunblaðið - 24.11.2021, Síða 23

ENGLAND
Kristján Jónsson
kris@mbl.is
Breytt eignarhald hjá enska knatt-
spyrnufélaginu Newcastle United
vakti mikið umtal á dögunum enda
yfirvöld í Sádi-Arabíu hinir nýju
eigendur félagsins. Tíminn á eftir
að leiða í ljós hversu miklum fjár-
munum verður velt inn í rekstur fé-
lagsins en eigendur geta verið stór-
tækir á leikmannamarkaðnum ef
þeir kæra sig um. Margt bendir til
þess að til standi að setja mikla fjár-
muni í að byggja upp sterkt lið hjá
Newcastle sem nú situr í botnsæti
úrvalsdeildarinnar. Framundan er
fall í næstefstu deild nema spila-
mennska liðsins taki miklum breyt-
ingum eftir áramót.
Sádunum virðist vera tekið opn-
um örmum hjá stuðningsmönnum
Newcastle ef marka má fréttaflutn-
ing. Þar sáust stuðningsmenn fagna
fyrir utan leikvanginn en sú fram-
setning gæti svo sem verið einföld-
un. Ekki eru allir jafn ánægðir og
Gary Hoffman, stjórnarformaður
ensku úrvalsdeildarinnar, sagði
starfi sínu lausu á dögunum eftir að
atkvæðagreiðsla innan samtakanna
sýndi að meirihluti stjórnarmanna
vildi losna við hann. Fulltrúar félag-
anna í deildinni eru margir hverjir
ósáttir við að Sádarnir séu komnir
inn í deildina. Eigendur Newcastle
höfðu áður reynt að eignast félagið
en þá stóðust þeir ekki þau skilyrði
sem sett eru til að eignast lið í
ensku úrvalsdeildinni. Eitthvað
varðandi umsóknina breyttist í
þetta skiptið því nú uppfylltu kaup-
endurnir skilyrðin. Félagið PCP
Capital Partners kom að kaupunum
en fyrirtækið aðstoðaði einnig
Sheikh Mansour við kaupin á Man-
chester City árið 2008.
Fáir enskir eigendur
Hér er ekki meiningin að vera
með tæmandi umfjöllun um kaupin
á Newcastle United heldur að fara
aðeins yfir heildarmyndina varðandi
eignarhaldið á ensku liðunum sem
svo margir Íslendingar fylgjast
grannt með. Óhætt er að segja að
eigendur liðanna í úrvalsdeildinni
komi úr ýmsum áttum.
Jafnt og þétt hefur orðið erfiðara
að finna Englendinga í tengslum við
félögin í ensku úrvalsdeildinni.
Þeim hefur farið fækkandi á meðal
leikmanna og knattspyrnustjór-
anna. Nú er svo komið að hjá fjór-
um félögum eru Englendingar
meirahlutaeigendur. Þekktasta fé-
lagið er Tottenham Hotspur en
einnig eru það Brentford og Brig-
hton & Hove Albion. Hjá Norwich
eiga svo Englendingur og Wales-
verji rúman meirihluta.
Í meðfylgjandi lista yfir félögin
má sjá einfalda útgáfu af helstu eig-
endum og þar má sjá þjóðerni
þeirra. Bandaríkjamenn eiga þrjú
mjög þekkt félög: Arsenal, Man-
chester United og Liverpool.
Bandaríkjamenn má víðar finna á
meðal eigenda enskra félaga þótt
þeir séu ekki alltaf aðaleigendurnir.
Tvö félög eru í eigu ítalskra kaup-
sýslumanna en það hefur ekki endi-
lega verið áberandi í umræðunni.
Eru það Leeds United og Watford.
Asíubúar hafa verið fyrirferðar-
miklir. Ekki bara arabarnir heldur
einnig frá Kína og Taílandi. Kín-
verjar eiga Wolves og Taílendingar
eiga Leicester City en það var vita-
skuld mjög áberandi vegna harm-
leiksins árið 2018. Eigandi félags-
ins, Vichai Srivaddhanaprabha, beið
þá bana í þyrluslysi á bílastæðinu
fyrir utan leikvang Leicester. Auk
þess er aðaleigandi Everton Farhad
Moshiri frá Íran en er einnig með
breskt vegabréf. Hann gerir ekki
upp á milli landanna og býr bara í
Mónakó.
Eigendur úrvalsdeildarliðanna
koma frá fjórum heimsálfum því Af-
ríka á einnig fulltrúa. Egyptinn
Nassef Sawiris er stjórnarformaður
Aston Villa og í eigendahópnum.
Eftir meiru að slægjast en áður
Þróunin á síðustu árum sýnir svo
ekki verður um villst að eftirsókn-
arverðara þykir en áður að eignast
ensk knattspyrnulið. Áður þótti það
ekki fýsilegur kostur fyrir þá sem
höfðu hagnast í viðskiptalífinu. Í
stað þess að hagnast á fjárfesting-
unni þurftu eigendurnir þvert á
móti að dæla fé inn í reksturinn til
að láta dæmið ganga upp.
Upphæðirnar sem fást fyrir sjón-
varpsréttinn hafa hækkað mjög og
væntingar eru um að slíkt muni
halda áfram. Auk þess er unnið að
því að auka vinsældir deildarinnar í
Asíu og Norður-Ameríku. Þeir sem
eiga fræg lið í ensku úrvalsdeildinni
í dag geta því vonast eftir að eignin
verði verðmætari á næstu árum og
áratugum.
Ýmislegt fleira getur hangið á
spýtunni þegar kemur að kaupum
erlendra fjárfesta á ensku liðunum.
London er jú ein af helstu við-
skiptaborgum heimsins. Fólk alls
staðar að úr heiminum lifir þar og
starfar. Algengt er að stórefnað fólk
frá Asíu, Rússlandi og víðar búi í
London eða sé þar með aðsetur. Þar
af leiðandi er kannski ekki óeðlilegt
að það láti til sín taka í úrvalsdeild-
inni sem ennþá er kölluð enska úr-
valsdeildin. Slíkt getur flýtt fyrir
því að stækka tengslanetið í við-
skiptum og stjórnmálum á enskri
grundu.
Eigendur Newcastle
bætast í litríkan hóp
- Eigendur ensku knattspyrnufélaganna koma frá fjórum heimsálfum
AFP
Newcastle Stuðningsmenn Newcastle United í leik Newcastle og Tottenham á St James’ Park í Newcastle.
ÍÞRÓTTIR 23
MORGUNBLAÐIÐ MIÐVIKUDAGUR 24. NÓVEMBER 2021
_ Norska handknattleikskonan Nora
Mörk, sem lengi hefur verið í hópi
þeirra bestu í heiminum, flytur frá
Noregi til Danmerkur næsta sumar.
Hún hefur leikið með Vipers Kristian-
sand frá sumrinu 2020 en spilaði áður
með CSM Búkarest í Rúmeníu, Györ í
Ungverjalandi og lengi með Larvik í
Noregi en var kornung í röðum Aal-
borg DH í Danmörku í stuttan tíma.
Mörk, sem er þrítug, hefur nú samið
við danska stórliðið Esbjerg sem hefur
lengi verið í fremstu röð í Danmörku
og í evrópskum handbolta en liðið fékk
silfur í EHF-bikarnum bæði 2014 og
2019 og varð danskur meistari 2016,
2019 og 2020, í tvö seinni skiptin með
Rut Jónsdóttur sem leikmann. Nú
þegar leika sex norskar landsliðskonur
með Esbjerg.
_ LeBron James hefur verið úrskurð-
aður í leikbann í NBA-deildinni í körfu-
knattleik eftir að hafa verið rekinn af
velli í leik Los Angeles Lakers og
Detroit Pistons. James fékk eins leiks
bann en hann gaf Isaiah Stewart oln-
bogaskot og fékk Stewart skurð fyrir
ofan augað. Stewart brást illa við og
missti stjórn á skapinu í kjölfarið. Fyrir
vikið hefur hann verið úrskurðaður í
tveggja leikja bann.
_ Magdeburg, toppliðið í þýska hand-
boltanum í karlaflokki, getur ekki spil-
að þessa dagana eftir að kór-
ónuveirusmit komu upp í herbúðum
þess. Leik liðsins við N-Lübbecke sem
fram átti að fara á sunnudaginn var
frestað af þessum sökum og einnig
leik gegn Sävehof í Evrópudeildinni
sem fram átti að fara í Svíþjóð í gær-
kvöldi. Landsliðsmennirnir Ómar Ingi
Magnússon og Gísli Þorgeir Krist-
jánsson leika með Magdeburg. Ekki er
ljóst hvenær þessir frestuðu leikir
verða spilaðir.
_ Mohamed Salah, sóknarmaður
enska knattspyrnufélagsins Liverpool,
mun að öllum líkindum skrifa undir
nýjan langtímasamning við félagið á
næstu dögum. Það er TEAMtalk sem
greinir frá þessu. Framtíð egypska
sóknarmannsins hefur verið mikið í
umræðunni undanfarnar vikur en nú-
verandi samningur hans við Liverpool
rennur út sumarið 2023. Salah, sem er
29 ára gamall, gekk til liðs
við Liverpool frá Roma
sumarið 2017 og hefur
verið einn
besti leik-
maður liðsins
síðan. Hann hefur skor-
að ellefu mörk í tólf
leikjum í ensku úrvals-
deildinni á tímabilinu
og er markahæsti leik-
maður deildarinnar en
alls á hann að baki 219
leiki fyrir Liverpool í öll-
um keppnum þar sem
hann hefur skorað
141 mark.
Eitt
ogannað
HANDKNATTLEIKUR
Úrvalsdeild karla, Olísdeildin:
TM-höllin: Stjarnan – ÍBV ....................... 18
KÖRFUKNATTLEIKUR
Úrvalsdeild kvenna, Subway-deildin:
HS Orkuhöll: Grindavík – Breiðablik. 18.15
Dalhús: Fjölnir – Njarðvík .................. 19.15
Origo-höll: Valur – Skallagrímur ........ 20.15
Í KVÖLD!
Kristján Örn Kristjánsson skoraði
fimm mörk fyrir Aix þegar liðið tók
á móti Gorenje í C-riðli Evrópu-
deildarinnar í handknattleik í
Frakklandi í gær. Leiknum lauk
með 26:26-jafntefli en Kristján Örn
var markahæsti leikmaður síns liðs
ásamt Karl Konan. Aix leiddi með
einu marki þegar 30 sekúndur voru
til leiksloka en Gorenje tókst að
jafna metin á lokasekúndunum. Aix
er í neðsta sæti C-riðils með eitt stig
eftir fjórar umferðir en á þó enn
möguleika á að komast upp úr riðl-
inum.
Markahæstur í
Evrópudeildinni
AFP
5 Kristján Örn skoraði fimm mörk
gegn Gorenje í Evrópudeildinni.
Ekkert verður af tveimur vináttu-
landsleikjum U19 ára liða Íslands
og Svíþjóðar í knattspyrnu kvenna
sem fram áttu að fara í Kórnum og
Akraneshöll í lok nóvember. Svíar
tilkynntu KSÍ í gær að þeir væru
hættir við að koma vegna stöðu
kórónuveirufaraldursins hér á
landi. Í gær var kynntur 20 manna
hópur Íslands fyrir leikina tvo og
KSÍ skýrði frá því að liðið myndi
engu að síður æfa saman og spila
æfingaleik við Breiðablik á laug-
ardag. Til stendur að leikirnir við
Svía fari fram á næsta ári.
Hættu við
vegna veirunnar
Ljósmynd/Jón Helgi Pálmason
Sókn Andrea Rut Bjarnadóttir er í
U19-ára landsliðshópnum.
Arsenal Stan Kroenke (Bandaríkjunum)
Aston Villa Nassef Sawiris (Egyptalandi) og Wesley Edens (Bandaríkjunum)
Brentford Matthew Benham (Englandi)
Brighton Tony Bloom (Englandi)
Burnley ALK Capital (Bandaríkjunum)
Chelsea Roman Abramovich (Rússlandi)
Crystal Palace Steve Parish (Englandi)
Everton Farhald Moshiri (Íran og Bretlandi)
Leeds United Andrea Radrizzani (Ítalíu)
Leicester City Srivaddhanaprabha-fjölskyldan (Taílandi)
Liverpool John W. Henry og Tom Werner (Bandaríkjunum)
Manchester City Abu Dhabi United Group (Sameinuðu furstadæmum)
Manchester United Glazer-fjölskyldan (Bandaríkjunum)
Newcastle United Public Investment Fund (Sádi-Arabíu)
Norwich City Delia Smith (Englandi) og Michael Wynn-Jones (Wales)
Southampton Gao Jisheng (Kína)
Tottenham Hotspur Joe Lewis og Daniel Levy (Englandi)
Watford Gino Pozzo (Ítalíu)
West Ham United David Sullivan (Wales), Daniel Kretinsky (Tékklandi) og David
Gold (Englandi)
Wolves Guo Guangchang, Liang Xinjun og Wang Qunbin (Kína)
_ Hér eru birt nöfn einstaklinga og hópa sem fara fyrir þeim sem eiga meirihluta í
knattspyrnufélögunum í úrvalsdeildinni. Margir fleiri geta verið í eigendahóp-
unum með minni eignarhlut.
Eigendur úrvalsdeildarfélaga