Morgunblaðið - 13.01.2022, Blaðsíða 16

16 FRÉTTIR
Innlent
MORGUNBLAÐIÐ FIMMTUDAGUR 13. JANÚAR 2022
Reykjavík, 13. janúar 2022
Tilnefningarnefnd
auglýsir eftir tilnefningum
eða framboðum
til stjórnar
Tilnefningarnefnd Eikar fasteignafélags hf. auglýsir eftir tillögum hluthafa að fram-
bjóðendum til stjórnarkjörs sem og framboðum annarra til stjórnar félagsins, vegna
aðalfundar hluthafa sem stendur til að halda 31. mars 2022.
Tilkynning um framboð skal vera á sérstöku eyðublaði sem tilnefningarnefnd félagsins
lætur í té og unnt er að nálgast á heimasíðu félagsins https://www.eik.is/hluthafar/.
Tillögur hluthafa og framboð skulu send á netfangið tilnefningarnefnd@eik.is
eða í lokuðu umslagi á skrifstofu félagsins, eigi síðar en 4. febrúar 2022.
Rökstudd tillaga nefndarinnar skal kynnt með fundarboði aðalfundar og vera
aðgengileg hluthöfum á heimasíðu félagsins a.m.k. þremur vikum fyrir aðalfund.
Starfsemi tilnefningarnefndar takmarkar ekki heimildir til þess að skila inn fram-
boðum til stjórnar minnst sjö sólarhringum fyrir aðalfund í samræmi við 3. mgr. 20. gr.
samþykkta félagsins.
VIÐTAL
Andrés Magnússon
andres@mbl.is
Magnús Örn Guðmundsson, bæj-
arfulltrúi á Seltjarnarnesi, sækist
eftir því að leiða lista Sjálfstæð-
isflokksins í komandi kosningum, en
Ásgerður Halldórsdóttir, núverandi
oddviti flokksins og bæjarstjóri,
leitar ekki endurkjörs.
„Sjálfstæðisflokkurinn þarf aug-
ljóslega að styrkja stöðu sína í kom-
andi kosningum. Hann fékk um og
yfir 60% atkvæða í sveitarstjórna-
kosningum hér áður fyrr en dalaði
2014 og enn meira síðast, þegar það
kom fram framboð, sem kalla mátti
klofningsframboð frá okkur og fékk
10% atkvæða.
Það er verkefnið nú, að auka fylg-
ið verulega á ný, ég hef fulla trú að
það takist og ég vil leiða þá baráttu.
Ég finn það, að það eru margir
áhugasamir um að koma til liðs við
okkur, bæði fólk sem vill gefa sig að
störfum fyrir bæinn okkar og aðrir
sem vilja styðja okkur, vilja kjósa
okkur, til góðra verka. Ég geri mér
því vonir um að eftir prófkjörið í lok
febrúar verðum við með mjög
sterka sveit í framboði og framtíðin
björt.“
Margt nýtt fólk?
„Já, mér sýnist það og ég held að
úr geti orðið spennandi hópur. Það
hafa margir lýst vilja til þess að gefa
kost á sér og nú er lag, því það eru
sæti að losna. Ég vil sjá samheldinn
hóp, sem er til í að vinna vinnuna og
gera Seltjarnarnes að því fyrir-
myndarsveitarfélagi til framtíðar,
sem við höfum átt að venjast og eig-
um að ætlast til.“
Og þú finnur meðbyr?
„Já, við finnum það. Það er búið
að endurreisa Sjálfstæðisfélagið hér
á Nesinu og mikill kraftur í starfinu.
Það er mikið af ungu fólki, sem hef-
ur verið að flytja hingað, borg-
aralega sinnað fólk með skoðanir á
skólunum, leikskólunum og þjónust-
unni í bænum, og vill beita sér.“
Höfum góða sögu að segja
Hefur eitthvað vantað upp á að
það hafi verið til fyrirmyndar?
„Það hefur auðvitað á ýmsu geng-
ið hér, eins og víðar, undanfarinn
áratug, en í stórum dráttum höfum
við góða sögu að segja. Það er hins
vegar margt sem má geta betur og
svo er það nú þannig að í blómlegu
bæjarfélagi eru verkin aldrei búin.“
Hefur ekki vantað svolítið upp á
samstöðuna? Nú fyrir skömmu gekk
einn bæjarfulltrúinn ykkar til liðs
við minnihlutann og samþykkti út-
svarshækkun, sem óhætt er að segja
að hafi mælst misvel fyrir.
„Jú, það var afleitt og þar gekk
hann beinlínis gegn loforðum okkar
sjálfstæðismanna til kjósenda, sem
ég get ekki enn skilið hvernig hann
fékk af sér að gera. Og það hefði
ekki tekið minnihlutann nema fimm
mínútur að eyða öllum peningnum,
hefðu tillögur hans í kjölfarið náð
fram að ganga! Einmitt þess vegna
er svo mikilvægt að við bjóðum fram
samhentan, heiðarlegan og ábyrgan
hóp, sem stendur við stóru orðin og
vindur ofan af svona mistökum.“
Svo þið munið lækka útsvars-
prósentuna aftur?
„Já, engin spurning. Það verður
grundvallarmál hjá okkur og helst
hönd í hönd við fyrirheit okkar um
ábyrgan rekstur sveitarfélagsins.“
Fyrsta verk þitt sem bæjarstjóri
ef allt gengur eftir hjá þér?
„Það er auðvitað ekkert gefið, en
ég gef kost á mér til þess að vera
pólitískur leiðtogi og hafa sigur. Ég
get tekið að mér að verða bæj-
arstjóri; oddviti í meirihluta er í
stöðu til þess. Það er samt ekki
þannig að ég sé að bjóða mig fram til
þess að leita mér að vinnu og ég tel
koma til greina að ráða faglegan
bæjarstjóra, vanan rekstrarmann.“
Tækifærin, eru þau næg?
„Já, það er ný byggð við Gróttu,
þar sem innviðirnir eru í raun til-
búnir, við erum að fara að byggja
nýjan leikskóla svo að við getum
lækkað inntökualdur niður í 12 mán-
uði á kjörtímabilinu, en þá er sveit-
arfélagið nánast fullbyggt. Við höf-
um öll tækifæri til þess að gera
góðan bæ betri.
Í því ljósi var þetta óvænta útspil
um hækkun útsvarsins óskiljanlegt,
því fjárþörfin er ekki aðkallandi hjá
bæjarfélaginu. Jú, atvinnuleysið fór
í ríflega 10%, líka á Seltjarnarnesi,
sem leiddi til hallareksturs, auk upp-
safnaðra lífeyrisskuldbindinga, en
það er engan veginn óviðráðanlegt.
En fyrir íbúana, sem hafa orðið fyrir
búsifjum í heimsfaraldrinum, að fá
þá yfir sig skattahækkun, það var
áfall fyrir marga. Segir sína sögu að
til þess hefur ekki verið gripið í
nokkru öðru sveitarfélagi.“
Vill nútímlegri rekstur
Þú nefndir að styrkja þurfi rekst-
urinn og bæjarstarfsmönnum hefur
fjölgað örar en bæjarbúum; er
reksturinn í ólagi?
„Nei, það er ekki þannig. En það
má bæta hann og gera nútímalegri.
Við lifum í breyttu þjóðfélagi og eig-
um að notfæra okkur það; höfum
tækifæri til að gera reksturinn skil-
virkari og betri. Þau þurfum við að
grípa, bæði til að bæta þjónustuna
og nýta fjármuni bæjarbúa betur.
Við erum með kröfuharða kjós-
endur og þrátt fyrir að útsvarshlut-
fallið hafi verið lágt, þá borga þeir
mikið í útsvar, með 4. hæsta útsvar á
íbúa á landinu. Við veitum frábæra
þjónustu, við löðum að okkur frá-
bæra kennara, skilum af okkur nem-
endum í fremstu röð samkvæmt öll-
um mælikvörðum, við tökum mun
yngri börn inn í leikskólana en ger-
ist í Reykjavík – þess vegna streym-
ir ungt fólk úr Reykjavík hingað…“
Streymir það til ykkar? Það er nú
ekki miklu húsnæði til að dreifa?
„Nei, það bætist ekki mikið við af
nýju húsnæði, en eldra fólkið hefur
verið minnka við sig og flytja, svo
hér hefur talsvert losnað af einbýlis-
húsum og raðhúsum, sem fjöl-
skyldufólk sækir í.“
Og allt byggingarland upp urið?
„Já. Það er staðan. Ég er stuðn-
ingsmaður verndar vestursvæðanna
og ég held að það sé almenn sátt um
það, að raska ekki meira landi hér.
Það eru þéttingareitir hér og þar, en
við viljum ekki stækka óendanlega,
lítum svo á að Nesið verði fullbyggt
eftir Gróttubyggð.“
En það er ekki sátt um alla hluti?
„Nei, það er mikill munur á okk-
ur og vinstriflokkunum. Þeir vilja
gera allt fyrir alla, sem áreiðanlega
er af góðum huga, en ekki í takt við
raunveruleikann. Við erum lítið
sveitarfélag, þannig að ef illa tekst
til með einhverja eina framkvæmd
getur það haft hrikaleg áhrif; líttu
bara á öldulaugina á Álftanesi.
Það kallar þess vegna á aðra
nálgun. Líttu t.d. á fimleikahúsið,
þar sem 75% iðkenda eru Reykvík-
ingar, sem kallaði á að við settumst
niður með Reykjavíkurborg og
sömdum um sanngjarna leigu til 20
ára. Svipaða sögu er að segja um
hjúkrunarheimilið gagnvart ríkinu,
en það borgar 85% Þetta eru dýr
mannvirki og þau skekkja skulda-
stöðuna, en þá er ekki tekið með í
dæmið að við erum að fá tryggar
leigutekjur fyrir stórum hluta
kostnaðarins.“
Svo skuldaviðmiðin eru í lagi?
„Já, þau eru í raun undir 70% en
mega fara í 150%. Sem manni sýn-
ist raunar að Reykjavíkurborg fari
yfir á næsta ári.“
En hvað með gagnrýni um að
Seltjarnarnes og önnur sveitarfélög
í nágrenni borgarinnar standi sig
ekki í félagslegri þjónustu af ýmsu
tagi, sem síðan lendi á borginni?
„Mér finnst það óréttmæt gagn-
rýni. Við höfum reynt að standa
okkur vel varðandi uppbyggingu á
félagslegu húsnæði. Við höfum hins
vegar tekið þátt í verkefnum með
Reykjavíkurborg, t.d. varðandi
húsnæðislausa og greitt okkar
hlut.“
Eruð þið þá að flytja vandann út
fyrir bæjarmörkin?
„Nei, við erum ekki að því. Ef
það væri mikil og brýn þörf hér, þá
myndum við bregðast við því með
öðrum hætti. Við látum ekki okkar
eftir liggja í félagsþjónustu, eins og
sést á því að um 20% útgjaldanna
eru til félagslegra mála.
Hið sama á við dellu um að við
séum ekki að borga það sem okkur
ber í öðrum málaflokkum, við borg-
um allt sem okkur ber í þessum
byggðasamlögum, við borgum í
réttu hlutfalli við íbúatölu.“
En jöfnunarsjóðurinn, sem nú er
mest til umræðu?
„Ég er bara ekki sammála því
tali. Ég lít á greiðslur úr honum
sem sanngjarnt framlag vegna mál-
efna fatlaðra, en svo má ekki
gleyma því að við erum einnig að
greiða heilmikið inn í jöfnunarsjóð-
inn.“
Fyrirhyggja til framtíðar
Þú nefnir að það megi bæta
reksturinn og það er eilítil upp-
bygging eftir, en hver er framtíð-
arstefnan?
„Við höfum haft þá stefnu að hafa
grunnþjónustu og grunnskyldur
sveitarfélagsins eins góða og kostur
er, alveg í fremstu röð, en látið
gæluverkefni vera. Við höfum horft
til þarfa fjölskyldufólks – ég nefni
íþróttaaðstöðu og útivistarsvæði –
en sérstaklega hvað varðar skólana.
Ég er íhaldssamur að því leyti.
Það sem við tökum okkur fyrir
hendur eigum við að gera vel, helst
með framúrskarandi hætti. En við
þurfum líka að gæta hófs í verk-
efnavali, það er ekki þannig að bær-
inn eigi að vera að vasast í hverju
sem er. Það sem við gerum, það
verðum við að gera af skynsemi,
fyrirhyggju og ráðdeild. Við sjáum
hvað mörg sveitarfélög hafa lent í
ógöngum vegna óvarkárni og jafn-
vel óráðsíu, en sveitarstjórnarfólk
er einmitt kosið til þess að vera eft-
irlitsmenn með sameiginlegum
fjármunum almennings í bænum.
Við verðum að standa undir
þeirri ábyrgð, því þannig byggjum
við gott bæjarfélag til framtíðar.“
Útsvarslækkun grundvallarmál
- Magnús Örn Guðmundsson vill 1. sæti sjálfstæðismanna á Seltjarnarnesi - Vill styrkja stöðu
flokksins á ný - Væntir nýrra frambjóðenda á lista - Þarf að gera rekstur bæjarins nútímalegri
Morgunblaðið/Árni Sæberg
Nesið Magnús Örn Guðmundsson bæjarfulltrúi gefur kost á sér í oddvitasæti sjálfstæðismanna á Seltjarnarnesi.