Sjómannablaðið Víkingur - 01.04.2019, Side 24

Ltd í Beverley á Englandi árið 1920 fyrir
Fiskiveiðahlutafélagið Kára í Reykjavík.
Lengd 41,45 m., breidd 7,44 m., dýpt
3,44 m., brl. 343,91, knúinn 600 hö.
gufuvél. Skipstjóri, Gunnlaugur Illuga-
son.
Á árinu 1924 flytur Kárafélagið að-
stöðu sína úr Reykjavík, út í Viðey við
það fær skipið skráningarstafina GK-153.
Útvegsbanki Íslands er eigandi togarans
frá árinu 1931 eftir að Kárafélagið í Við-
ey fór í þrot. Á árinu 1933 kaupir hf All-
iance í Reykjavík skipið og nefndi Kára
RE-111. Fiskvinnufélag A/S í Klaksvík
Færeyjum keypti skipið í ágúst árið 1946
og nefndi og nefndi Barmur KG-363. Fór
í brotajárn til Odense í Danmörku árið
1955.
„Bylting í sjónmáli“
- segir Hjörtur Erlendsson forstjóri Hampiðjunnar
Menn hafa ýmsar skoðanir á kvótakerfinu en um eitt eru þó allir á einu máli. Nefnilega hinn stóra galla kerfisins
sem er að fiskurinn við Íslandsstrendur veit ekki að hann skal veiðast í ákveðnu magni yfir árið. Nú mun brátt
verða á þessu breyting.
Ég veit, þetta hljómar eins og einhver firra eða kannski
kaldhæðni. Aulabrandari ef til vill eða hrein og klár
heimska. Enda er þetta ekki alveg sannleikanum sam-
kvæmt. Fiskurinn á ekki eftir að læra neitt um aflamark Ís-
lendinga en tæknin á hins vegar eftir að gera sjómönnum
kleift að velja úr fiska er rata í trollið, sleppa sumum en
fanga aðra. Ótrúlegt!
– Já, en satt, staðhæfir Hjörtur Erlendsson, forstjóri
Hampiðjunnar. Innan fárra ára munu skipstjórar standa í
því að flokka lifandi afla. Þeir munu fylgjast með því á skjá-
um hvaða fiskar koma í trollið, tegund þeirra, stærð og
ásigkomulagi. Vilji útgerðin í það sinnið bara þorsk þá mun
öðrum villuráfandi tegundum sleppt úr trollinu, líka undir-
málsfiskum og golþorskum sem eru mun duglegri að
hrygna en smærri fiskurinn.
*
Í mínum eyrum hljómar þetta eins og vísindaskáldskapur sem allir sjómenn hafa að vísu látið sig dreyma um
en enginn talið mögulegt að yrði nokkru sinni að veruleika. Fyrr en núna. Eða fer forstjórinn kannski með ýkjur?
– Nei, alls ekki, svarar Hjörtur og brosir góðlátlega að furðusvipnum á viðmælanda sínum sem á erfitt með að
dylja efasemdir sínar. Gerir þó sitt besta.
– Sjáðu til, útskýrir Hjörtur. Höfuðlínukaplarnir sem við notum í dag og flytja ratsjármyndir í brúna eru úr kop-
ar og hafa mjög takmarkaða flutningsgetu. Við ætlum að skipta út þessum koparþráðum og setja í staðinn ljós-
leiðarakapal, DynIce Optical Data. Við þessa breytingu - eða öllu heldur byltingu – verður gagnaflutningsgetan
nánast ótakmörkuð. Við blikkum auga og einn ljósleiðari getur flutt bíómynd á 1,6 sekúndu, svo ég nefni nær-
tækt dæmi. Og við verðum með þrjá ljósleiðara í kaplinum svo þú getur rétt ímyndað þér flutningsgetuna.
En er þetta ótrúlega snilldartæki komið í skipin?
– Nei, ekki enn svarar Hjörtur. Þú verður að gæta að því að hér ræðir um mikla þróunarvinnu. Sjálfur ljós-
leiðarinn er ekki annað en glerþráður, grennri en fínasta mannshár. Já, það er rétt hjá þér, hann er afskaplega
viðkvæmur en okkur hefur tekist að koma honum þannig fyrir í kaplinum að hann þolir mikið álag, bæði högg
og beygjur. Það hefur því kostað okkur mikinn tíma og fjármagn hjá Hampiðjunni að þróa kapal til að leggja í
þennan viðkvæma þráð sem ljósleiðarinn er. Tækniþróunarsjóður Rannís hefur lagt okkur lið og við erum í nánu
samstarfi við Síldarvinnsluna og Simrad um prófun á fyrsta ljósleiðarakaplinum. Fyrsti ljósleiðarakapallinn var
prufaður um borð í Beiti NK en í fyrstu prófun kom ýmislegt í ljós sem þurfti að betrumbæta í tækjabúnaðinum
í kring um DynIce Optical Data kapalinn. Nýr kapall bíður nú þess að vera settur á kapalvinduna og Naust Mar-
ine hefur bæst í hóp þeirra fyrirtækja sem vinna að þessu verkefni með því að leggja til tölvustýrða röðun á kapl-
inum á tromluna. Hún ætti að vera tilbú-
in til notkunar eftir nokkrar vikur. Beitir
er vel útbúinn í slíkar tilraunir því það eru
tvær kapalvindur um borð og skip-
stjórarnir Sturla Þórðarsson og Tómas
Kárason eru mjög áhugasamir og styðja
þetta mikilvæga brautryðjendaverkefni
með ráðum og dáð. Og það er sannfær-
ing mín, segir Hjörtur Erlendsson að lok-
um, að þessi nýi ljósleiðarakapall eigi í
framtíðinni eftir að nýtast með jafnvel
enn fjölbreytilegri hætti en við sjáum fyrir
okkur í dag. Og eru þó væntingar okkar
til DynIce Optical Data miklar, svo ekki sé
dýpra í árinni tekið.
Hjörtur kynnir DynIce.
Hjörtur og Jón Atli Magnússon vöruþróunarstjóri með kapalinn góða.
24 – Sjómannablaðið Víkingur