Austurglugginn - 05.12.2019, Page 2

2 Fimmtudagur 5. desember AUSTUR · GLUGGINN
Kosið verður til sveitarstjórnar
í nýju sameinuðu sveitarfélagi
Borgarfjarðarhrepps, Djúpavogs-
hrepps, Fljótsdalshéraðs og
Seyðisfjarðarkaupstaðar fyrsta
laugardag eftir páska, þann 18.
apríl. Sameiningin gengur formlega
í gildi í kjölfar kosninganna.
Búið er að skipa undirbúningsstjórn,
sem fundar næst á mánudag. „Það
er verið að kortleggja vinnuna fram
að kosningum. Það verða myndaðir
starfshópar. Þeir eru ekki fullmótaðir
en þeir munu undirbúa stjórnsýslu
nýs sveitarfélags.
Það þarf að kortleggja og skoða
fjárhagslegan samruna, sameina
bókhaldskerfi og skjalastjórnun,
horfa til rafrænu stjórnsýslunnar,
hugbúnaðar og tölvumála. Þetta er
mikil vinna sem við munum nota
desember til að teikna upp. Ég á ekki
von á að starfshóparnir taki til starfa
fyrr en í janúar.
Við í undirbúningsstjórninni
erum byrjuð að vinna samþykktir
fyrir nýtt sveitarfélag og svo er
spurning hvernig verður staðið að því
að velja nafn á nýja sveitarfélagið,“
segir Björn Ingimarsson, bæjarstjóri
Fljótsdalshéraðs og formaður
undirbúningsstjórnarinnar.
Fundað var með starfsfólki
stjórnsýslu og stjórnendum stofnana
sveitarfélaganna í lok nóvember.
„Fundurinn var mjög vel sóttur og
nær allir starfsmennirnir mættir.
Við hvöttum starfsfólk til að koma
á framfæri áhyggjum eða öðrum
ábendingum. Andinn var góður og
umræðurnar líka,“ segir Björn.
GG
Ríflega þrítugur Austfirðingur,
Sigurður Sigurðsson, hefur verið
dæmdur í sex ára fangelsi fyrir
lífshættulega og heiftúðuga árás á
karlmann á heimili þess síðarnefnda
í Neskaupstað í júlí. Sigurður var
dæmdur fyrir að hafa stungið
manninn margsinnis með tveimur
eldhúshnífum. Hnífana hafði
Sigurður með sér af heimili sínu og
hélt með þá í gegnum bæinn, um
1,5 km leið, fór inn á ólæst heimili
mannsins og réðist að honum.
Fórnarlambið komst undan yfir til
nágranna síns sem gerði lögreglu
viðvart.
Lögregla handtók Sigurð skammt
frá vettvangi, með blóð á höndum og
fótum. DNA greining leiddi í ljós að
blóðið væri úr fórnarlambinu.
Við yfirheyrslur sagðist Sigurður
ekkert muna eftir árásinni, hann
myndi eftir því þegar hann hélt frá
húsi fórnarlambsins og er lögregla
handtók hann. Hann neitaði því sök
en viðurkenndi að rannsóknargögnin
bentu til sektar hans.
Mennirnir þekktust lítið en
unnusta fórnarlambsins hafði áður
átt í ástarsambandi við Sigurð. Í
málinu kom fram að hann hefði
tekið sambandsslitum þeirra illa og
haft í hótunum í kjölfar þeirra.
Fórnarlamb árásarinnar missti
mikið blóð sem læknar sögðu hafa
valdið því að hann hefði verið í
lífshættu, hefðu ekki komið til skjót
viðbrögð nærstaddra. Að mati læknis
sem fyrstur sinnti um fórnarlambið
réði það úrslitum hversu stutt var á
sjúkrahús. Dómari sagði árásina hafa
verið lífshættulega og heiftúðlega,
auk þess sem brotaviljinn hefði verið
einbeittur. Sigurður var því dæmdur
í sex ára fangelsi. Honum var að
auki gert að greiða fórnarlambinu
tæpar tvær milljónir í miska- og
skaðabætur og hátt í sex milljónir
í málskostnað.
GG
Nýr veruleiki blasir við
Mjófirðingum eftir að ljósleiðara-
tenging við Brekkuþorp komst á í
síðustu viku. Þorpið varð þar með
síðasti byggðakjarninn á Íslandi til
að fá slíka tengingu.
Íbúar á staðnum sjá fram á aukið
öryggi, bætt atvinnuskilyrði og
fjölbreyttari afþreyingu. Til þessa
hefur allt síma- og gagnasamband
farið fram milli senda við bæinn
Brekku og á Mjóafjarðarheiði. Það
hefur verið stopult á vetrum og hefur
þá allt símasamband í firðinum fallið
niður. „Þetta breytir mjög miklu,
einkum upp á öryggið. Nú höfum
við öruggan venjulegan heimasíma
og getum hringt örugglega milli
bæja ef við þurfum,“ segir Erna Ólöf
Óladóttir, íbúi á Mjóafirði.
Ljósleiðarastrengurinn liggur
frá Seyðisfirði til Mjóafjarðar og
sá RARIK að mestu um lagningu
hans. Samhliða þessu var lagður
rafstrengur sem lokið verður við
næsta sumar. Að auki komu að
verkinu sveitarfélögin Fjarðabyggð
og Seyðisfjarðarkaupstaður, ríkið
í gegnum Fjarskiptasjóð, Míla og
Neyðarlínan. Hin 17 km langa leið
var á köflum erfið yfirferðar og
lögðu klifrarar hluta ljósleiðarans
utan í þverhníptum klettum
Mjóafjarðarmegin.
GG
Vilja stríðminjar austur
Safnanefnd Fjarðabyggðar
hefur falið bæjarstjóra og
starfsfólki Safnastofnunar
sveitarfélagsins að fara þess
á leit við Þjóðminjasafnið
að Íslenska stríðsárasafnið á
Reyðarfirði fái til sýningar
og vörslu þá muni sem eru á
Þjóðminjasafninu og tengjast
árum síðari heimsstyrjaldarinnar
á Íslandi. Í bókun ráðsins er
bent á að Stríðsárasafnið á
Reyðarfirði sé eina íslenska
safnið sem hafi sérhæft sig í að
segja sögu stríðsins frá íslensku
sjónarhorni. Því fari vel á að það
gegni þessu hlutverki. Minnt
er á að á næsta ári eru 80 ár
liðin frá hernámi Íslands og
vill Stríðsárasafnið gera þeim
tímamótum skil í sýningu sinni
og fá fleiri muni til sýningar sem
tengjast tímabilinu.
Fimm mínútna aðalfundur
Aðalfundur Skólaskrifstofu
Austurlands, sem haldinn var í
síðasta mánuði, tók aðeins fimm
mínútur samkvæmt fundargerð.
Fundurinn hófst klukkan 13:40
og var lokið 13:45. Á fundinum
var farið yfir ársreikning síðasta
árs, þar sem hálfrar milljónar
króna afgangur var eftir
fjármagnsliði og fjárhagsáætlun
næsta árs en samkvæmt henni
verður sex milljóna króna halli
á rekstrinum. Fundinn sóttu
bæjar- og sveitarstjórar sex
austfirskra sveitarfélaga, en þeir
höfðu einnig setið stjórnarfund
skrifstofunnar skömmu áður
þar sem fjármálin voru einnig
á dagskrá. Sá fundur tók 40
mínútur.
Vilja tíðavörur í skóla
og félagsmiðstöðvar
Ungmennaráð Fljótsdalshéraðs
leggur til að grunnskólar
sveitarfélagsins, auk félags-
miðstöðvarinnar Nýungar og
ungmennahússins Vegahússins
hafi tíðavörur til boða á
salernum. Þetta kemur fram í
bókun frá síðasta fundi ráðsins.
Jafnframt leggur ráðið áherslu á
að valdar verði umhverfisvænstu
vörurnar.
Útgáfa Austurgluggans
í desember
Austurglugginn kemur ekki út
í næstu viku. Næsta tölublað
kemur út eftir tvær vikur og
verður þar á ferðinni veglegt
jólablað. Engin útgáfa verður
milli jóla og nýárs en fyrsta
tölublað Austurgluggans á nýju
ári kemur út fimmtudaginn
9. janúar. Fréttavakt verður á
Austurfrétt að vanda alla virka
daga og oftar, kalli aðstæður á
það.
MOLARKosið í nýju sveitarfélagi 18. apríl
Sex ára fangelsi fyrir lífshættulega árás
Mjóifjörður ljósleiðaratengdur
Frá talningu atkvæða 26. október. Mynd: GG
Sigurður hefur setið í gæsluvarðhaldi frá 11. júlí. Mynd: GG