Austurglugginn - 05.12.2019, Qupperneq 8

8 Fimmtudagur 5. desember AUSTUR · GLUGGINN
Yfir 90% þeirra nemenda sem
útskrifuðust frá Menntaskólanum
á Egilsstöðum á árunum 2014-
2016 segja upplifun sína af náminu
í skólanum hafa verið jákvæða og
þeir geti mælt með skólanum við
aðra. Mikil ánægja mælist með
spannakerfið í nýrri könnun.
„Það vilja allir skólar fá jákvæð
viðbrögð á sitt starf og kerfi. Þessi
könnun er sjálfsskoðun, við vildum
fá fólkið okkar til að meta hvað
skólinn hefði gefið því,“ segir Jón
Ingi Sigurbjörnsson, sem vann
könnunina ásamt Degi Skírni
Óðinssyni, en báðir kenna þeir
félagsfræði við skólann.
Sendur var spurningalisti á
stúdentana sem voru 183 árin
þrjú. Alls bárust 142 svör sem
gerir svarhlutfallið 78%. Þeim var
fylgt eftir með viðtölum við 10
nemendur sem endurspegluðu
þýðið. Niðurstöður könnunarinnar
voru fyrst opinberaðar á 40 ára
afmælishátíð skólans í lok október.
Í henni var meðal annars spurt út
í ánægju með skólann og námið,
reynslu af spannakerfi og hvert
leið nemenda hefði legið eftir
stúdentspróf. Svör voru greind eftir
bæði kyni og námsbrautum.
Spannakerfið mælist vel
fyrir
Sem fyrr segir sögðu 94% nemenda
upplifun sína af því að vera nemandi
í ME jákvæða eða mjög jákvæða og
rúm 90% sögðu líklegt eða mjög
líklegt að þau myndu mæla með
skólanum við einhvern sem væri á
leið í framhaldsskóla.
Fyrir um áratug var svokallað
spannakerfi tekið upp í skólanum.
Hver spönn varir í átta vikur
og eru nemendur á þeim tíma
í færri áföngum en á 16 vikna
hefðbundnum önnum. Tæplega
94% svarenda sögðu reynslu sína af
spannakerfinu hafa verið jákvæða
eða mjög jákvæða. „Þessi ánægja
kemur mér ekki á óvart. Við veltum
spannakerfinu mikið fyrir okkur
áður en við fórum í það. Við sjáum
meðal annars í viðtölunum að það
hjálpar nemendum sem eiga erfitt
með að einbeita sér að ákveðnu
viðfangsefni, það er betra að vera
í færri áföngum en hlaupandi á
milli sex áfanga. Við heyrum hins
vegar líka gagnrýni, sem við vorum
viðbúin, um að spannakerfið henti
ekki ákveðnum þungum áföngum
eins og í stærðfræði,“ segir Jón Ingi.
Dagur bendir á að nemendum í
fjarnámi við ME hafi fjölgað, meðal
annars vegna spannakerfisins. Slíkt
sé skólanum dýrmætt á sama tíma og
nemendum í dagskóla fækki meðal
annars vegna styttingu námstíma til
stúdentsprófs.
Í könnuninni var spurt út í
námstíma stúdentanna en þeir
hófu allir nám meðan miðað var
við fjögurra ára námstíma. Um 45%
luku námi á fjórum árum, um 10% á
þremur árum og um 20% á þremur og
hálfu ári. Um tíu prósent voru fimm
ár eða lengur í skólanum. Jón Ingi
bendir á að skólar með áfangakerfi,
eins og ME, hafi alltaf boðið upp
á sveigjanleika í námi og yfirleitt
hafi um 10% nemenda útskrifast á
þremur árum. Algengur námstími
sé enn þrjú og hálft ár þó eftir eigi
að meta áhrif styttingarinnar. Hins
vegar virðist sem þátttaka nemenda
í félagslífi fari dvínandi.
Flestir í nám í
heilbrigðisvísindum
Í könnuninni var spurt út í hvaða
leið nemendur hefðu valið eftir
stúdentspróf og hversu meðvitaðir
þeir hefðu verið um framtíð sína
þegar þeir hófu nám í ME. Rúmur
helmingur valdi ekki námsbraut
með framhaldsnám í huga. Það er
þó misjafnt eftir brautum, yfir 60%
nemenda á náttúrufræðibraut valdi
hana með ákveðið framhaldsnám
í huga. Stúdentar af þeirri braut
virðast skiptast nokkuð jafnt milli
raungreina og heilbrigðisvísinda í
framhaldsnámi en nemendur af
félagsfræðibraut dreifast mun víðar.
Athygli vekur hve mikilla vinsælda
nám í heilbrigðisvísindum nýtur
meðal stúdenta frá ME. Flestar
þeirra stúlkna sem útskrifast frá
skólanum, eða rúmur fjórðungur,
velur það og það er í öðru sæti á eftir
raungreinanámi meðal drengja, en
15% þeirra völdu heilbrigðisnámið.
Jón Ingi bendir á að það kunni að
hafa áhrif að hægt sé að fara í slíkt
nám við Háskólann á Akureyri, bæði
í staðar- og fjarnámi. Þetta sé hins
vegar breyting því fyrir 20 árum hafi
menntavísindi verið vinsælust meðal
stúdenta úr ME. „Við framleiddum
mikið af kennurum. Það eru allar
kennarastofur fjórðungsins fullar af
fyrrverandi ME-ingum,“ segir hann.
Þrátt fyrir að nemendur hafi ekki
vitað hvert þau stefndu þegar þau
hófu nám segja yfir 67% að námsleið
þeirra í ME hafi undirbúið þau vel
eða nokkuð vel fyrir frekara nám.
„Framhaldsskólaárin eru mikil
mótunarár og eins og kemur fram
þá skrá krakkarnir sig oft bara á
einhverja braut fyrst,“ segir Jón Ingi.
Í viðtölunum var smæð skólans og
mikil nánd við kennara, starfsfólk og
aðra nemendur nefnd sem kostur.
„Yfirgnæfandi meirihluti segir góða
hluti um skólann og þetta eru þeir
kostir sem flestir nefndu. Sumir
töldu spannakerfið útflutningsvöru.
Þessar niðurstöður segja okkur að
kerfin okkar virki og skólinn standi
sig í að undirbúa nemendur fyrir
áframhaldandi nám. Hins vegar
erum við alltaf í naflaskoðun og ME
hefur alltaf verið óhræddur við að
fara sínar eigin leiðir,“ segir Jón Ingi.
GG
Menntaskólinn á Egilsstöðum
Yfirgnæfandi meirihluti stúdenta
ánægður með námið
Mynd: GG