Borgfirðingabók - 01.12.2009, Side 128

128 Borgfirðingabók 2009
skilja, því þá var ekki farið að steypa brýr og dróst það enn í 16 ár, og
ekki heldur járnbrýr enda erfiðleikum bundið að flytja svo þungt efni
inn í afdali með þeirra tíma tækjum og samgöngum.
Barnafossbrúin er um það bil 18 metra löng og nær vel upp á bæði
lönd, því gljúfrið er bæði djúpt og þröngt með afar fláalitlum veggjum.
En áin fossar undir í ógnar djúpi og fer þar með flugferð og foráttu
löðri og er allófrýnileg í flóðum, en umhverfið er mjög aðlaðandi
og fagurt. Hraunlindarnar heimsfrægar blasa þarna við, ásar vafðir
vænum birkiskógi og blómgresi, fjöllin blá og jökulhettur í austri ber
fagurlega við bláan himingeiminn í blækyrru og björtu veðri. Og svo
eru enn bændabýlin þekku í búsældar sveitum. Til dæmis sjást allir
bæir í Hvítársíðu af ásnum fyrir ofan fossana nema Kalmanstunga, en
hún sést ekki frá neinu byggðu bóli, og þarna af Hraunsásnum telja
ýmsir fegursta útsýn sem til er í Borgarfirði.
Þarna má oft sjá hjarðir á beit með lagði síðum, því þar eru sauðlönd
góð og hyggnir fjárhirðar. Þarna hefir margur gæðingurinn tekið vel
til fótanna, því hestakost hafa Hálssveitungar haft góðan um langan
aldur og ekki hefir skort metnað og kapp bæði manns og hests.
Það er furðu erfitt að kynna sér mál brúar á Barnafossi fyrir og
um 1890. Kunnugustu menn telja að reikningar og önnur gögn séu
Brúin, sem nú er á Hvítá við Barnafoss, var byggð árið 1954.