Borgfirðingabók - 01.12.2009, Síða 153

15Borgfirðingabók 2009
Eins og áður sagði fara
elstu bekkirnir í raun út á
vinnumarkaðinn. Við búum
svo vel í Varmalandsskóla að
sveitungarnir eru jákvæðir út
í skólann og líta á það sem
sjálfsagt mál að taka á sig þá
aukasnúninga sem því fylgir
að taka nemendur okkar
að sér í 3-4 daga. Þetta er
ómetanlegt viðhorf sem ber
að þakka sérstaklega fyrir.
Það má segja að val á
vinnustað og verkefnum
sé eins einstaklingsmiðað
og hægt er. Þegar líður að
vori fara kennarar að athuga hvað krakkarnir hafa áhuga á að gera
í Sérstöðunni. Í sumum tilfellum óska nemendur eftir að fara heim
til sín og taka þátt í því starfi sem þar fer fram. Aðrir vilja fara í
vinnu sem þeir þekkja minna til. Nokkuð stór hluti nemenda er á
Bifröst. Stefnt er að því að útvega þeim sveitastörf a.m.k. einu sinni á
skólagöngunni. Það eykur tengsl milli sveitarinnar og íbúa Bifrastar
og stuðlar þar með að því að ekki myndist veggur á milli þessara
tveggja hópa. Þegar allir nemendur eru komnir með samastað þá fara
kennarar að útbúa verkefnamöppu fyrir hvern og einn. Hver nemandi
skilar síðan möppunni með dagbók, þar sem greint er frá störfum og
öðru sem fengist hefur verið við þessa daga ásamt þeim verkefnum
sem hann hefur fengið úthlutað. Í möppunni þarf einnig að vera útfyllt
matsblað frá vinnuveitandanum þar sem hann metur ýmsa þætti, svo
sem hvort nemandi sé áhugasamur, vandvirkur og fljótur að koma
sér að verki. Sumir nemendur leggja mikla vinnu í lausn verkefna
og skila möppunni með ljósmyndum, sem sýna staðhætti og störf.
Seinna meir verða slíkar möppur dýrmæt heimild um starfshætti
liðinna tíma. Einkunn sem byggð er á umsögn vinnuveitanda, dagbók
og lausn verkefna er færð inn á einkunnaspjaldið sem afhent er við
skólalok.
Skólinn á nú orðið töluvert safn af verkefnum og sparar það
heilmikla vinnu við undirbúning fyrir Sérstöðuna. Þó er það svo að
Daníel Ólafsson á Sámsstöðum ásamt
félögum sínum við grisjun á skógarlund-
inum við Varmaland.