Skessuhorn - 23.11.2022, Page 31

MIÐVIKUDAGUR 23. NÓVEMBER 2022 31
Eftir dauf tvö ár er starfsemi
íþrótta­ og tómstundafélaga víðs
vegar um landið að komast vel í
gang. Boccía og ringó, pútt og mar­
gar fleiri greinar sem 50+ stunda
eru komnar í fullan gang. Æfingar
eru nokkuð vel sóttar og samskipti
við félaga, sem áður voru mikil eru
þessar vikurnar að hefja starfsemi á
fullu og taka á sig fyrri mynd.
Nú nýverið buðu Garð bæingar
til boccíamóts í íþróttahúsinu
Ásgarði. Þar komu 16 sveitir til
leiks, þar af þrjár frá Akranesi og
þrjár úr Borgarbyggð. Sveitunum
af Vesturlandi gekk vel og Skaga­
menn gerðu sér lítið fyrir og stóðu
uppi sem sigurvegarar. Þeir áttu tvö
lið í undanúrslitum og lentu þau í
1. og 4. sæti.
Ringó er afbrigði af blaki. Í stað
bolta er spilað með gúmmíhringi.
Hér á Vesturlandi er íþróttin
einungis stunduð í Borgarbyggð,
en vonandi reyna fleiri fyrir sér í
þessari skemmtilegu íþrótt. Fyrir
skemmstu buðu félagar í FaMos
til ringómóts í íþróttamiðstöð
Lágafellsskóla. Alls mættu sjö lið
til keppni og reyndu með sér. Alls
voru leiknir 21 leikur, jafnir og
skemmtilegir. Borgfirðingar sendu
tvo lið í Mosfellsbæ og þau náðu
góðum árangri, höfnuðu í 1. og 3.
sæti.
Vesturlandsmót í boccía fór
fram í Stykkishólmi 17. nóvem­
ber síðast liðinn og sáu félagar í
Aftanskini um framkvæmd þess.
Mótið var vel sótt; fjögur lið úr
Grundarfirði, þrjú úr Stykkis­
hólmi, þrjú úr Borgarbyggð, fjögur
af Akranesi og tvö úr Mosfellsbæ.
Eftir spennandi riðlakeppni stóðu
fjögur lið uppi sem sigurvegarar og
háðu þau síðan keppni um titilinn
Vesturlandsmeistari 2022. Í undan­
úrslitum sigruðu Borgarbyggð og
FEBAN/Akranes andstæðinga sína,
Grundfirðinga, og háðu skemmti­
lega úrslitarimmu um sigur. Eftir
sex lotu leik stóðu liðin jöfn 5 – 5
og þá var gripið til bráðabana sem
náðist að sigra með síðasta bolta.
FEBAN 1 Akranesi eru Vestur­
landsmeistarar 2022. Lið þeirra
skipa: Böðvar Jóhannsson, Eiríkur
Hervarsson og Hilmar Björnsson.
Flemming Jessen
Nágrannarnir ÍA og Skallagrímur
áttust við í 1. deild karla í
körfuknattleik á föstudagskvöldið
og fór leikurinn fram í íþróttahús­
inu á Vesturgötu. Vel yfir hundrað
áhorfendur mættu á leikinn sem
er góð mæting miðað við að leik­
urinn var sýndur í beinni á ÍATV.
Stuðnings menn liðanna létu vel í sér
heyra og góð stemning var í húsinu.
ÍA kynnti til leiks nýjan leikmann,
Marko Jurica, sem fékk félagaskipti
frá Vestra í liðinni viku og er 26 ára
bakvörður sem hefur einnig leikið
með Sindra hér á landi.
Eins og við var að búast af
nágrannaslag var vel tekist á strax
frá byrjun og liðin skiptust á að ná
forystu. Um rúman miðjan fyrsta
leikhluta var staðan 10:10 og þegar
honum lauk var munurinn aðeins
tvö stig, 19:21 gestunum í vil.
Skallagrímur byrjaði betur í öðrum
leikhluta og var kominn með tíu
stiga forystu eftir tæpan fimm
mínútna leik, 23:33. Þá vöknuðu
heimamenn aðeins, minnkuðu
muninn jafnt og þétt fyrir lok fyrri
hálfleiks og forskot Skallagríms
aðeins eitt stig í hálfleik, 40:41.
Skagamenn áttu fyrsta orðið
í þriðja leikhluta þegar Gabriel
Adersteg setti niður þrist en síðan
fóru gestirnir í gang, skoruðu tólf
stig gegn aðeins einu stigi ÍA og
staðan 44:53 eftir tæpar fimm mín­
útur. ÍA náði síðan að koma til baka
á ný og minnkaði forskot gestanna í
fimm stig en Skallagrímur átti síð­
asta orðið og síðustu sjö stigin í
leikhlutanum, staðan 50:62 og allt
útlit fyrir sigur Skallagríms. En
svo var aldeilis ekki, eftir aðeins
þriggja mínútna leik í fjórða leik­
hluta var staðan orðin jöfn,
63:63, og spennustigið var í hærri
kantinum það sem eftir lifði leiks.
Á lokamínútunni var staðan enn
jöfn, 79:79, og ansi margt eftir að
gerast í leiknum. Keith Jordan Jr.
kom gestunum einu stigi yfir með
vítaskoti áður en Gabriel Ader­
steg tók góðan snúning í teignum
og setti boltann í körfuna auk þess
að fá víti í kaupbæti. Skallagríms­
maðurinn Keith Jordan missti
síðan boltann klaufalega frá sér í
næstu sókn og Lucien Christofis
setti niður víti þegar 13 sekúndur
voru eftir af leiknum, staðan 83:80.
Skagamenn höfðu boltann en fengu
á sig dæmdar fimm sekúndur fyrir
að koma ekki boltanum í leik og þá
tók Skallagrímur leikhlé til að ráða
ráðum sínum. Eftir það rauk Björg­
vin Hafþór Ríkharðsson upp völl­
inn með boltann og inn í teig sem
var frekar skrýtin ákvörðun þar sem
Skallagrími vantaði þrjú stig til að
jafna leikinn. Þar missti hann bolt­
ann eftir árekstur við leikmann ÍA,
ekkert var dæmt og Gabriel Ader­
steg gulltryggði síðan sigur ÍA með
flottri troðslu á lokasekúndunni við
mikinn fögnuð heimamanna, loka­
staðan 85:80 ÍA í vil.
Atkvæðamestur hjá ÍA var Marko
Jurica með 18 stig, Gabriel Ader­
steg var með 17 stig, Lucien
Christofis með 15 stig, Þórður
Freyr Jónsson með 14 stig og Jaleen
Dupree með 13 stig og 14 fráköst.
Hjá Skallagrími var Björgvin Haf­
þór Ríkharðsson með 22 stig, Keith
Jordan Jr. með 16 stig og Davíð
Guðmundsson með 12 stig.
Næstu leikir liðanna eru næsta
föstudagskvöld og hefjast klukkan
19.15. Skallagrímur tekur á móti
Ármanni í Borgarnesi og ÍA fer í
langferð austur í leik gegn Sindra á
Höfn í Hornafirði.
vaks
Snæfell og Breiðablik b áttust við í
1. deild kvenna í körfuknattleik síð­
asta þriðjudag í liðinni viku og var
leikurinn í Stykkishólmi. Gengi
liðanna í deildinni hefur til þessa
verið mjög ólíkt, Snæfell vann á
þriðjudaginn sinn áttunda leik í röð
á meðan b lið Breiðabliks er enn án
sigurs eftir tíu leiki. Það var strax
ljóst í leiknum að mikill munur
er á getu liðanna, Snæfellskonur
komust í 8:0 og staðan var 20:2 fyrir
Snæfelli eftir fimm mínútna leik
í fyrsta leikhluta. Næstu mínútur
juku heimakonur forskotið enn
meira og staðan 34:7 þegar flautan
gall. Það var hins vegar ansi lítið
að frétta í öðrum leikhluta því þar
skoruðu liðin samtals alls tólf stig,
Snæfell átti átta af þeim og staðan
breyttist því ekki mikið, hálfleiks­
tölur 42:11 Snæfelli í vil.
Í þriðja leikhluta var ekki mikill
munur á stigaskori liðanna, Snæ­
fell vann leikhlutann 16:12 og var
með 35 stiga forystu fyrir lokaleik­
hlutann, 58:23. Í fyrri hluta hans
fundu bæði lið alls ekki fjölina og
staðan eftir fimm mínútna leik,
65:27. Þá stigu heimakonur aðeins
fastar á bensíngjöfina og skildu
gestina eftir í reyk, lokatölur 79:30
fyrir Snæfelli.
Snæfell nýtti bekkinn sinn vel að
þessu sinni og fengu allir tólf leik­
menn liðsins að spila tíu mínútur
eða lengur í leiknum og komust
allir á blað nema tveir í leiknum.
Atkvæðamest hjá Snæfelli var
Minea Takala með 19 stig, Cheah
Rael Whitsitt var með 14 stig og 17
fráköst og Rebekka Rán Karlsdóttir
með 13 stig. Hjá Breiðablik b var
Hera Magnea Kristjánsdóttir með
15 stig eða helming stiga liðsins
og þær María Sánchez­Brunete og
Eyrún Ósk Alfreðsdóttir voru með
5 stig hvor.
Næsti leikur Snæfells er í kvöld á
móti Þór Akureyri fyrir norðan og
hefst klukkan 19.15.
vaks
Skagamenn með sigur gegn Skallagrími í spennuleik
Nýr leikmaður ÍA, Marko Jurica, var stigahæstur á móti Skallagrími. Ljósm. vaks
Snæfell fór létt
með Breiðablik b
Af boccía og ringó íþróttunum
Keppendur á Vesturlandsmótinu í boccia.
Lið Skagamanna varð í fyrsta sæti, Borgfirðingar í öðru og Grundfirðingar í þriðja.
Keppnisfólk frá Akranesi en því gekk vel á bocciamótinu í Garðabæ.