Golf á Íslandi - 01.06.2017, Blaðsíða 90

DÓMARASPJALL
Hörður Geirsson
hordur.geirsson@gmail.com
Reglur í golfi eru á margan hátt sérstakar, í samanburði við aðrar íþróttir. Ein sérstaðan felst í því að skv.
golfreglunum er ekki nauðsynlegt að golfvöllur sé afmarkaður á neinn hátt. Til að útbúa golfvöll þarf í raun ekkert
annað en teigmerki og holur. Allt annað er valfrjálst.
Nú til dags gera kylfingar ákveðnar kröfur um gæði flata, teiga og
brauta. Því má yfirleitt ganga að því vísu að við þekkjum þessi svæði
vallarins, þótt mörk t.d. brauta og karga kunni að vera óljós á vorin.
Af hverju eru mörk golfvalla þá skilgreind? Í reglu 33-2 segir að það
sé ein skylda umráðamanna golfvallar eða mótsstjórna í golfmótum
að skilgreina völlinn nákvæmlega og hvað sé út af. Einfaldasta
leiðin til að uppfylla þetta skilyrði er að segja einfaldlega að engin
mörk séu á vellinum. Ef vallarmörk eru á annað borð skilgreind ætti
að vera fyrir því einhver ástæða.
Ástæðurnar geta verið nokkrar:
1. Umráðasvæði golfklúbbsins er takmarkað og klúbburinn
vill ekki að kylfingar séu að leik á landi annarra. Þetta er
líklega algengasta ástæða vallarmarka í heiminum.
2. Völlurinn liggur að sjó eða stöðuvatni og klúbburinn
telur betra að skilgreina vallarmörk við sjóinn eða
vatnið frekar en að um hliðarvatnstorfæru sé að ræða.
Á Íslandi er algengast að vallarmörk séu skilgreind
undir þessum kringumstæðum en víða í heiminum eru
hliðarvatnstorfærur skilgreindar við brautir sem liggja
að sjó, sbr. t.d. Pebble Beach í Kaliforníu og Brautarholt á
Kjalarnesi.
3. Vallarmörkum er ætlað að gera leik á tilteknum holum
erfiðari en ella. Þetta kann að skipta máli varðandi
vallarmat og forgjafarreglur.
4. Með vallarmörkum er reynt að flýta leik þannig að
kylfingar eyði ekki miklum tíma í leit að boltum langt
utan brauta. Sem dæmi um þetta má nefna 1. og 2. holu í
Leirunni.
5. Með vallarmörkum er reynt að fæla kylfinga frá því
að leika inn á svæði þar sem hætta getur skapast
af golfboltum. Oft eru vallarmörk af þessu tagi sett
umhverfis golfskála eða æfingasvæði, sbr. vallarmörk
vinstra megin við 9. holu á Hvaleyrinni.
Með vallarmörkum er komið í veg fyrir að kylfingar „stytti sér leið“
eða forðist hættur sem þeim er ætlað að mæta. Þetta er líklega
algengasta ástæðan fyrir „innri vallarmörkum“, þ.e. vallarmörkum
sem eru skilgreind innan golfvallarins þegar tilgreindar holur eru
leiknar, sbr. t.d. 16. braut í Leirdalnum.
Ef vallarmörk eru á annað borð skilgreind er afskaplega mikilvægt
að þau séu ótvíræð, þannig að aldrei leiki vafi á því hvort
bolti er innan vallar eða utan. Ef sérstaklega þarf að auðkenna
vallarmörkin ætlast golfreglurnar til að það sé gert með hvítum
stikum eða hvítum línum. Þó má nota hvað sem er til að skilgreina
vallarmörkin og fyrir golfklúbba er hagkvæmast að nýta aðra hluti
sem fyrir eru, ef þess er kostur, svo sem brúnir malbikaðra stíga eða
girðingar. Ef slíku er ekki til að dreifa er sjálfsagt að velta fyrir sér
hvort einfaldlega megi sleppa vallarmörkunum að einhverju leyti og
spara þar með vinnu við viðhald þeirra.
Vallarmörk
V E L K O M I N
HJARTANLEGA
Af öllu hjarta facebook.com/kringlan.iskringlan.is
GJAFAKORT
KRINGLUNNAR
er frábær gjöf sem
hentar við öll tækifæri
90 GOLF.IS - Golf á Íslandi
Dómaraspjall