Golf á Íslandi - 01.06.2017, Side 138

„Margir af vinum mínum og fjölskyldumeðlimum eru
í golfi og mér finnst gaman að spila með þeim. Svo er
þetta bara svo hrikalega skemmtilegt sport sem gerir
helling fyrir mig. Félagsskapurinn úti á vellinum með
góðu fólki gerir þessa íþrótt gríðarlega skemmtilega,“
segir Helgi Reynir Guðmundsson úr Stykkishólmi en
hann kynntist golfinu í gamla heimabænum þegar
hann var krakki. Helgi Reynir er félagi í Golfklúbbi
Mosfellsbæjar og einnig í Golfklúbbnum Jökli frá
Ólafsvík en hann hefur samt sem áður ekki náð að
komast í sterkt lið GJÓ á Íslandsmóti golfklúbba.
„Ætli ég hafi ekki byrjað 10 ára gamall
að spila golf þegar ég var að alast upp í
Stykkishólmi. Við vorum nokkrir æsku
vinirnir sem fengum bakteríuna og höfum
meira og minna verið að spila reglulega
golf síðan. Við höldum hópinn enn í dag
og förum t.d. árlega eina helgi á sumrin og
spilum á „Golfmóti Snillinganna“ sem er
alltaf jafn gaman.“
Helgi segir að hefðbundið golfsumar sé með
ýmsum hætti hjá honum. Spilamennskan
hefur aukist jafnt og þétt á undanförnum
árum.
„Það er nú allur gangur á því hvernig þetta
hefur verið. Ég spila kannski ekki eins mikið
og áður fyrr þótt það hafi aðeins aukist
undanfarin ár. Fer nú reglulega á mót en
þá oftast með félögum mínum úr GJÓ sem
ég hef spilað töluvert með sl. ár. Er samt
ekki orðin nógu góður til að komast í þessa
stormsveit sem þeir hafa á að skipa núna, en
maður veit samt aldrei.“
Þú kepptir á Íslandsmótinu á Jaðarsvelli
á Akureyri í fyrra. Hvað varð til þess
að þú tókst þátt og hvernig var að vera
meðal þeirra bestu?
„Ég hafði nokkrum sinnum hugleitt að skrá
mig á Íslandsmótið en aldrei látið verða
af því. Það var svo 2015 þegar mótið var á
Akranesi að ég lét vaða eftir að konan mín
hvatti mig til þess. Hún bauðst svo til að
draga kerruna í þokkabót og þá var ekki um
annað ræða en að skrá sig. Fór svo aftur í
fyrra á Akureyri sem var ótrúlega gaman.
Að spila á Íslandsmóti með þá umgjörð
sem er í kringum það mót er virkilega
skemmtileg upplifun. Vera í kringum þá
bestu og spila á sama móti gerir helling fyrir
mig. Það er alls ekki ólíklegt að ég muni
skrá mig einhvern tímann aftur.“
Hvað er skemmtilegast við golfið?
„Að takast á við sjálfan sig í golfi getur verið
mjög skemmtilegt og lærdómsríkt. Þótt
árangurinn sé misjafn eru þetta endalausar
áskoranir þar sem maður lærir helling.
Svo er það auðvitað félagsskapurinn sem
fylgir þessu, alltaf gaman að taka hring með
skemmtilegu fólki.“
Hvað er það eftirminnilegasta sem
hefur gerst hjá þér í golfi?
„Ég varð vitni að ótrúlegu atviki í
Vestmannaeyjum fyrir nokkrum árum.
Við vorum að ganga af flötinni á að mig
minnir 15. holu og félagar okkar voru á
teignum á sömu holu. Þegar við vorum að
ganga af flötinni sló Pétur Pétursson frá
Malarrifi, sem var í ráshópnum á eftir okkur,
upphafshögg. Það vildi ekki betur en svo
að kúlan lenti ofan í vasanum hjá æskuvini
mínum Sigtryggi Birki Jónatanssyni sem
var með mér í ráshóp. Við vissum ekki
hvaðan á okkur stóð veðrið þegar Sigtryggur
öskraði af sársauka, greip um lærið á sér og
vissi ekkert hvað gerðist, ekkert frekar en
við hinir. Eftir smá tíma þegar hann náði
áttum fór hann í buxnavasann og fann tvo
bolta, sinn eiginn og boltann sem Pétur sló
af teignum.“
Hvert er vandræðalegasta atvikið á
golfvellinum hjá þér?
„Gleymi seint þegar ég var ca. 14 ára gamall
á mínu fyrsta Íslandsmóti unglinga sem var
haldið í Grafarholti. Ég og æskuvinur minn
Lýður Vignisson fórum saman á mótið úr
Stykkishólmi og ég mætti í jogging-galla á
fyrsta teig - algjör sveitamaður! Menn voru
ekkert að fara neitt sérstaklega yfir þessa
hluti með manni fyrir brottför. Svipurinn
sem ég fékk frá fólki er eftirminnilegur, en
ég fékk séns fyrsta daginn með því skilyrði
að koma í viðeigandi klæðnaði daginn eftir.
Ég spilaði því fyrsta daginn á mínu fyrsta
Íslandsmóti í jogging-galla og fannst ég bara
helvíti flottur. En þessu var svo reddað og
ég mætti í flottustu golfbuxum sem hafa sést
í Grafarholtinu daginn eftir.“
Draumaráshópurinn?
Michael Jordan, Charles Barkley og Steven
Gerrard.
Uppáhaldsgolfvöllurinn og hvers
vegna?
„Eins og staðan er í dag myndi ég segja
Hlíðavöllur í Mosó. Eftir þessar viðbætur
sem þeir hafa gert finnst mér völlurinn
orðinn virkilega skemmtilegur. Flottar nýjar
holur sem setja skemmtilegan svip á heildar
upplifunina að spila völlinn. Er meira að
segja búinn að skrá mig í klúbbinn hjá þeim
og mun taka völlinn enn betur út í sumar.“
Hvaða þrjár golfholur eru í uppáhaldi hjá
þér og hvers vegna?
Hola nr. 17 í Eyjum, umhverfið og
fílingurinn að standa á teignum með
sjóinn fyrir framan sig og allt þetta fallega
umhverfi er magnað.
Hola nr. 1 í Brautarholti er virkilega flott,
að standa á teignum og horfa yfir brautina
er skemmtileg upplifun. Innáhöggið upp á
klettana er svo alltaf ákveðin stemming.
Hola nr. 6 í Stykkishólmi er svo alltaf
skemmtileg. Maður stendur uppi á flöt og
horfir yfir Breiðafjörðinn í allri sinni dýrð,
gerist ekki mikið betra. Teigur-sjór-flöt,
þetta samspil gerir eitthvað fyrir mig.“
„Fannst ég vera flottur
í jogging-gallanum“
– Helgi Reynir Guðmundsson byrjaði
í golfi 10 ára gamall í Hólminum
138 GOLF.IS - Golf á Íslandi
„Fannst ég vera flottur í jogging-gallanum“