Morgunblaðið - 04.06.2002, Blaðsíða 43

FRÉTTIR
MORGUNBLAÐIÐ ÞRIÐJUDAGUR 4. JÚNÍ 2002 43
MENNTASKÓLANUM í Reykjavík
var slitið í 156. sinn 31. maí síðastlið-
inn. Brautskráðir voru 133 stúd-
entar, 7 úr fornmáladeild, 17 úr ný-
máladeild, 48 úr eðlisfræðideild og
61 úr náttúrufræðideild. 6 nem-
endur hlutu ágætiseinkunn og hæstu
einkunn á stúdentsprófi náði Martin
Ingi Sigurðsson, eða 9,34, og er
hann dúx árgangsins. Semidúxinn er
Katrín Guðlaugsdóttir og hlaut hún
einkunnina 9,26. Höskuldur Pétur
Halldórsson, nemandi í 3. bekk, fékk
hæstu einkunn á ársprófi, ágætis-
einkunn 9,9 og er hann dux scholae í
ár. Fjölmargir nemendur voru
heiðraðir fyrir framúrskarandi ár-
angur og við athöfnina söng Kór
Menntaskólans í Reykjavík.
Í skólaslitaræðu sinni vék Yngvi
Pétursson, rektor Menntaskólans í
Reykjavík, að húsnæðisvanda skól-
ans. Í máli hans kom fram að 15.
apríl síðastliðinn stóðu Skólafélag
MR, Framtíðin og foreldrafélag MR
fyrir fjölmennum fundi um húsnæð-
ismál skólans í Ráðhúsi Reykjavíkur
að viðstöddum menntamálaráð-
herra, borgarstjóra og borg-
arfulltrúum. Þar voru stjórn-
málamenn hvattir til að slíðra
sverðin og leita leiða til að fjár-
magna framkvæmdir og var meðal
annars vísað til þess að menningar-
söguleg verðmæti lægju undir
skemmdum auk þess sem skólinn
væri stærsti vinnustaðurinn í mið-
borg Reykjavíkur. Sagði Yngvi það
vera ánægjuefni að sjá foreldra og
nemendur leggja skólanum lið með
þessum hætti, en pattstaða hefur
verið í málinu um skeið vegna
ágreinings ríkis og borgar um þátt-
töku í kostnaði. Í vetur samþykkti
borgarstjórn tillögu borgarstjóra
um styrk til skólans og er það von
Yngva að þar með hafi verið stigið
fyrsta skref til sátta.
Morgunblaðið/Ásdís
133 stúdentar brautskráðir frá
Menntaskólanum í Reykjavík
UMFERÐIN gekk vel
fyrir sig. Lögreglan hafði
eftirlit með ölvunarakstri
og voru 12 ökumenn
grunaðir um ölvun við akstur.
Alls voru 42 teknir fyrir hraðakst-
ur um helgina. Á Suðurlandsvegi var
einn ökumaður tekinn á 125 km
hraða og annar á 113 km hraða.
Þessa helgina hafði lögregla afskipti
af 24 ökumönnum sem gátu ekki
framvísað ökuskírteini.
Á sunnudag var strætisvagni ekið
aftan á fólksbifreið á gatnamótum
Hringbrautar og Njarðargötu, á leið
til vesturs. Við áreksturinn kastaðist
fólksbifreiðin yfir gatnamótin.
Hemlaför eftir vagninn mældust
tæplega 30 metrar. Engin alvarleg
meiðsl urðu á fólki við áreksturinn.
Hjólaði út í Elliðaá
Lögreglan aðstoðaði hjólreiða-
mann í Öskjuhlíðinni sem hafði dott-
ið af hjóli sínu á höfuðið og rotast við
það en hann var ekki með reiðhjóla-
hjálm. Hann hafði farið kollhnís
fram fyrir sig. Maðurinn var fluttur
á slysadeild. Öðrum hjólreiðamanni
varð á um helgina er hann fór ekki
nægilega gætilega og hafnaði út í
Elliðaá. Meiddist hann lítilsháttar á
höfði og var fluttur á slysadeild.
Nokkuð var um innbrot um
helgina. Á föstudagsmorgni var
brotist inn í fyrirtæki í austurbæn-
um og þar var m.a. myndavél stolið.
Á svipuðum tíma var brotist inn í
nokkur fyrirtæki í miðborginni og
þaðan stolið tölvum, ýmsum tölvu-
búnaði, myndavél og síma. Brotist
var inn í skartgripaverslun, hurð
spennt upp með kúbeini og töluverð-
um verðmætum stolið. Í Breiðholt-
inu var lögreglan kvödd til aðstoðar
þar sem hópur unglinga grýtti eggj-
um í nemendur. Höfðu þeir yfirgefið
skólann þegar lögreglan kom á vett-
vang en rætt var við foreldra þeirra.
Í austurhluta borgarinnar var
drengur laminn af fimm skólafélög-
um, áverkar voru við auga, á baki og
hruflaðist hann á hendi.
Á laugardagskvöldi var tilkynnt
um nokkra unglinga sem höfðu farið
inn í nýbyggingu til að taka upp
kvikmynd. Krökkunum var vísað út
þar sem þeir höfðu ekki tilskilið leyfi.
Ekki leyfi fyrir framhalds-
skólaskemmtun
Um helgina var fjölmenni í mið-
borginni, veður var gott og nýút-
skrifaðir stúdentar voru áberandi
með hvítu kollana. Aðfaranótt
sunnudags var lögreglu tilkynnt um
samkvæmi í miðbænum og vísaði frá
framhaldsskólanemendum þar sem
leyfi lá ekki fyrir skemmtuninni.
Tveimur stúlkum var vísað út af vín-
veitingahúsi þar sem þær voru undir
aldri. Móðir annarrar stúlkunnar fór
með stúlkurnar heim.
Dyraverðir óskuðu aðstoðar lög-
reglu vegna gruns um að gestir inni
á staðnum væru með fíkniefni. Á öðr-
um gestinum fannst fíkniefni og var
hann færður á lögreglustöð. Nokkuð
var kvartað yfir hávaða í heimahús-
um um helgina. Í einu slíku útkalli
var lögreglan kvödd í Seljahverfið
aðfaranótt laugardags. Þegar lög-
reglan knúði dyra og ræddi við þá
sem voru innandyra komu þeir auga
á áhöld til fíkniefnaneyslu í íbúðinni
en engin efni fundust.
Á laugardagsmorgni tilkynnti
verktaki í miðborginni að undanfarn-
ar helgar hefði hann orðið fyrir því
að rúður væru brotnar í vinnuvélum,
olíulok brotin upp á þeim og möl sett
í eldsneytistanka svo fátt eitt sé
nefnt. Framkvæmdir á lóðinni munu
standa yfir í allt sumar.
Á sunnudagsmorgni hafði maður
samband við lögreglu og sagðist hafa
verið rændur í Vesturbænum af
tveimur mönnum. Skömmu síðar
náði lögreglan öðrum manninum í
húsagarði rétt hjá og var hann vist-
aður í fangageymslu lögreglunnar.
Hins mannsins er leitað.
Úr dagbók lögreglu 31. maí–3. júní
Margir nýstúdentar
með hvíta kolla
EKKI verður sagt að veiði hafi byrj-
að vel í Norðurá, en á hádegi í gær
luku fyrstu hollin veiðum eftir tvo og
hálfan dag. Stjórn SVFR náði aðeins
fjórum löxum og hópur sem veiddi í
Stekknum og Munaðarnesi tók tvo
laxa. Haraldur Eiríksson leiðsögu-
maður, sem var á neðra svæðinu með
nokkrum þaulvönum köppum, sagði
umhugsunarefni hversu lítið væri af
laxi í ánni.
Mjög kalt var framan af í Norður-
árdalnum og sérstaklega erfitt að
veiða fyrsta daginn, en síðan hlýnaði
og sjatnaði í ánni. En allt kom fyrir
ekki. Einn stór slapp í Stekknum, 16
til 18 punda fiskur að mati Haraldar.
Dró bátinn „á haf út“
Veiðifélagar tveir sem veiddu í
Þingvallavatni úr tveggja manna kaj-
ak á föstudagskvöldið lentu í því að
stórurriði tók fluguna hjá öðrum
þeirra. Rauk ferlíkið síðan „á haf út“
eins og því var lýst uns draga tók af
honum. Fiskurinn þreyttist fljótt með
hlassið í eftirdragi og eftir nokkra
stund var 11 punda urriði dreginn
upp. Félagarnir veiddu einnig tíu
vænar bleikjur. Frést hefur af öðrum
stórurriða, 9,5 punda, úr Þingvalla-
vatni, en vantar upplýsingar um hvar
hann veiddist. Hann mun hafa veiðst
á maðk.
Byrjar vel á urriðasvæðunum
Þær Hólmfríður Jónsdóttir á Arn-
arvatni, umsjónarmaður urriðasvæð-
is Laxár í Mývatnssveit, og María
Kristjánsdóttir, ráðskona í veiðihús-
inu í Laxárdal, voru sammála um að
urriðaveiðin hefði farið vel af stað og
fiskur væri feitur og fallegur. Í gær-
morgun var búið að bóka 60 urriða í
Laxárdal síðan á laugardag og taldi
María vanta a.m.k. helmingi meira,
því margir veiðimenn ættu eftir að
skrá afla sinn. Sama var uppi á ten-
ingnum hjá Hólmfríði, 60 voru þar
bókaðir, en margir óskráðir þar eð
margir veiðimenn hafa þann sið að
skrá alla fiska í lok ferðar á meðan
aðrir skrá allt jafnóðum.
Púpur veiddar andstreymis og
straumflugur voru að gefa nokkuð
jöfnum höndum, Black Ghost, Rektor
og Pheasant tail voru nefndar.
Stærstu fiskar hjá Hólmfríði voru 5
punda, en rúmlega 4,5 pund hjá Mar-
íu.
Laxi landað í Norðurá sl. laugardag.
Róleg
byrjun í
Norðurá
ERU
ÞEIR AÐ
FÁ’ANN?
Morgunblaðið/Guðmundur Guðjónsson
LANDVERND heldur fund í dag,
þriðjudaginn 4. júní, til að fjalla um
umhverfisáhrif fyrirhugaðs uppi-
stöðulóns í Þjórsárverum, sk. Norð-
lingaöldulón, á Grand hóteli Reykja-
vík kl. 16.30. Fundurinn er opinn og
aðgangur ókeypis.
Erindi halda Arnþór Garðarsson
prófessor í dýrafræði við Háskóla Ís-
lands og Hörður Kristinsson grasa-
fræðingur við setur Náttúrufræði-
stofnunar Íslands á Akureyri og
Gerður Steinþórsdóttir bókmennta-
fræðingur og áhugamaður um úti-
vist. Fulltrúar sveitarfélaganna
vestan og austan Þjórsár greina frá
viðhorfum heimamanna til áform-
aðra virkjanamannvirkja.
Veggspjöld með upplýsingum frá
framkvæmdaraðila um framkvæmd-
ina verða á staðnum, segir í frétta-
tilkynningu.
Fundur um
áformað Norð-
lingaöldulón
SIGLINGASTOFNUN veitir árlega
viðurkenningar á sjómannadaginn
til eigenda og áhafna skipa sem tald-
ar eru hafa sýnt góða framkvæmd á
öryggisreglum og umhirðu á undan-
förnum árum. Á sjómannadaginn
hafa öryggismál ávallt verið ofarlega
á baugi og því tilhlýðilegt að veita
viðurkenninguna á þeim degi.
Hún á að vera hvatning fyrir
áhafnir og eigendur skipa að halda
öryggismálum í sem bestu horfi.
Á sjómannadaginn 2. júní sl. var
útgerð Haraldar Böðvarssonar hf.,
Akranesi, og áhöfnum og eigendum
skipanna Óskar KE 5, Sóleyjar SH
124, Brimness BA 800, Súlunnar EA
300, Jóns Kjartanssonar SU 111 og
Dala Rafns VE 508 veitt viðurkenn-
ing.
Viðurkenningar
til skipa
FRANSK-íslenska verslunarráðið,
Austurbakki hf., Karl K. Karlsson
hf. og Bourgogne standa fyrir kynn-
ingarviku hvítvína frá Búrgund í
Frakklandi, hinn 4.-11. júní, á Vín-
barnum, Kirkjutorgi 4.
Vínáhugamenn munu geta kynnt
sér hina ríku vínræktarhefð Bourg-
ogne og smakkað mikil gæðavín frá
héraðinu, segir í fréttatilkynningu.
Frekari upplýsingar má nálgast á
www.vin.is.
Bourgogne-
vínsmökkun
MIÐVIKUDAGINN 5. júní nk. kl.
16.00 mun Sonja Richter, verkfræð-
ingurá lagnadeild Rb, halda erindi í
Lagnakerfamiðstöð Íslands á
Keldnaholti um rafefnafræðilegar
tæringarmælingar. Fyrirlesturinn
er liður í Ph.D.-námi Sonju Richter
við Háskóla Íslands. Sonja mun
fjalla um notkun rafefnafræðilegra
aðferða til tæringarmælinga, annars
vegar í tilraunastofu og hins vegar í
raunverulegum kerfum. Að fyrir-
lestrinum loknum verður gestum
boðið upp á að skoða aðstöðuna sem
komið hefur verið upp í Lagnakerfa-
miðstöð. Leiðbeinendur Sonju eru
dr. Ragnheiður I. Þórarinsdóttir,
deildarstjóri við Rannsóknastofnun
byggingariðnaðarins, og dr. Fjóla
Jónsdóttir, dósent við Háskóla Ís-
lands. Verkefnið er styrkt af Rannís
og Norrænu orkurannsóknaráætl-
uninni.
Það tengist enn fremur norrænu
verkefni sem styrkt er af Norræna
iðnaðarsjóðnum, Orkuveitu Reykja-
víkur og Hitaveitu Suðurnesja.
Fyrirlesturinn er opinn öllum.
Fyrirlestur um rafefnafræði-
legar tæringarmælingar