Litli Bergþór - 01.07.2014, Qupperneq 3
Litli-Bergþór 3
Ritstjórnargrein
Í þessu blaði Litla-Bergþórs er nokkuð fjallað um Laugarás. Athygli vekur hvað
íbúum þar hefur fækkað á síðastliðnum árum. Nú er svo komið að allt bendir til að
eftir eitt ár verði einungis einn grunnskólanemi frá Laugarási í skólabílnum. Þessi
þróun er ekkert einsdæmi og er fækkun íbúa í dreifbýli almennt áhyggjuefni eins og
heyra mátti í ræðu forsætisráðherra á þjóðhátíðardaginn. Leiðari Bændablaðsins frá
20. júní sl. tekur þetta líka fyrir og þar er bent á ýmislegt sem hægt væri að
gera til hagsbóta fyrir dreifbýlið. Því er haldið fram að búseta í dreifbýli sé
áhugaverð og hafi marga kosti, auk þjóðhagslegs hagræðis af því að byggja
allt landið.
En allar kröfur til úrbóta virðast vera á hendur stjórnvöldum, svo sem
betri vegir, aukin uppbygging á opinberri þjónustu o.s.frv. o.s.frv.
Er það virkilega svo að við getum ekkert gert sjálf til að bæta vorn hag?
Þurfum við alltaf að kalla á hjálp frá öðrum? Er það ekki undir okkur
sjálfum komið að bæta úr því sem við getum?
Getur verið að stærri einingar séu betri til að takast á við nauðsynlega
uppbyggingu á sveitarstjórnarstiginu?
Getur verið að börnum líði betur í ögn stærri skólum þar sem 10 til 15
eru í bekk? Það er ef til vill ekki óskastaða allra að vera eitt til tvö saman í
bekk allan grunnskólann.
Getur verið að hluti af vandamálinu sé þröngsýni, hræðsla við
breytingar og von um að þetta bjargist með tímanum? Sagt er „Góðir
hlutir gerast hægt“, það er bara að vona að ekki verði allir farnir annað
þegar góðu hlutirnir gerast.
Við dreifbýlisbúar sem verðum að hafa þor og kjark til að takast á við þær
breytingar sem eru í gangi, gera ekki bara kröfur á aðra heldur gera kröfur á okkur
sjálf til að bæta búsetu og mannlíf á okkar svæði.
PS
Ég gæti nú
bjargað þessu
með fækkunina, ef
vel stendur á hjá
mér!
Facebook
Ritstjórn vill benda lesendum Litla-Bergþórs á Facebook síðu blaðsins. Gaman væri
ef fólk rifjaði upp gamlar sögur úr sveitinni - setti inn gamlar (og nýjar) myndir með
skýringum á við hvaða tilefni þær eru teknar og hverjir eru á þeim. Kannski verður
til grein í Litla-Bergþóri úr svona innleggi á síðuna.
Kveðja, ritstjórn Litla-Bergþórs.