Litli Bergþór - 01.07.2014, Qupperneq 4

4 Litli-Bergþór
Formannspistill
Þá er sumarið gengið í garð og byrjar vel hvað veður
varðar, allavega enn sem komið er. Gott er að nýta
þessa góðviðrisdaga til útiveru því varla þarf að taka
fram hvað útivera og hreyfing hefur góð áhrif á alla.
Nú á dögum kemur maður varla á þann stað þar sem
ekki er tölva eða snjallsími uppi við. Tími og einbeiting
sem fer í þessi tæki eykst með hverjum deginum og
margir verða háðir þeim. Ef börnin sjá að fullorðna
fólkið getur ekki sleppt símanum úr hendinni eða
tölvunni í smá stund, þá er nokkuð víst að þau feti í
sömu spor. Því getur verið gott að hvíla tækin af og til.
Þetta á bæði við um börn og ekki síst fullorðna. Þá er málið að vera frjó í hugsun og finna
eitthvað skemmtilegt í staðinn fyrir tækin.
Á 105 ára afmæli Ungmennafélags Biskupstungna sem var á síðasta ári, fékk Ungmennafélag
Biskupstungna eina flottustu afmælisgjöf sem hægt er að hugsa sér. 100 ára saga félagsins er
glæsilegt rit sem heldur mjög vel utan um sögu félagsins.
Nú stendur til að fylgja þessu verkefni eftir og hefur Ungmennafélagið látið útbúa söguskilti
sem setja á upp í sumar.
Fyrir skömmu kom fyrsta söguskiltið upp við skógræktarreit félagsins við Faxa. Það skilti var
samstarfsverkefni Ungmennafélags Biskupstungna, Bláskógabyggðar og Vina Tungnarétta. Á
skiltinu eru upplýsingar um skógræktarreit Ungmennafélagsins, fossinn Faxa, Tungufljótið og
Tungnaréttir bæði á íslensku og á ensku.
Tvö skilti til viðbótar eru væntanleg í sumar.
Annað þeirra mun koma nálægt íþróttamiðstöðinni í Reykholti og mun það segja stuttlega frá
sögu Ungmennafélags Biskupstungna og hið síðara kemur til með að vera við Aratungu þar
sem rakin verður saga félagsheimilisins.
Smári Þorsteinsson.