Tölvumál - 01.12.1988, Síða 5

tímann. Þessi útgáfutíðni er mun meiri en þunglamaleg tímarit, sem
prentuð eru í mörgum litum og yfirhlaðin auglýsingum geta haft.
Jafnframt viljum við leggja aukna áherslu á að vekja athygli á
stefnumiðum félagsins og öðrum atriðum, sem varða upplýsingatækni."
Hvað sem segja má um stefnu blaðsins hefur því markmiði verið náð
að halda niðri útgáfukostnaðinum. Hvert blað komið í hendur lesenda
kostar nú um 70 krónur. Af þeirri fjárhæð er meira en helmingur
fjármagnaður með auglýsingum.
Tölvumál hafa náð þeim tilgangi sínum að vekja athygli á málefnum
tölvumanna. Samanborið við mörg önnur félagsblöð eru áhrif Tölvu-
mála ótrúlega mikil. Til jafnaðar birta dagblöð efni úr öðru hverju
tölublaði. Oft hefur tekist að hefja umræðu sem haft hefur áhrif á
tölvumálin í landinu. Athyglisverðasta innleggið er líklega grein
Halldórs Kristjánssonar verkfræðings um tölvuráðgjöf. Eftir að hún
birtist varð mikil umræða um tölvuráðgjöf og flestöll dagblöðin
fjölluðu um efnið. í kjölfar umræðunnar hafa margir aðilar endur-
skoðað samskipti sín við ráðgjafa. Ýmis fleiri mál hafa einnig vakið
athygli.
Okkur hefur orðið furðu vel til fanga með efni frá lesendum. Lætur
nærri að í öðru hverju blaði hafi birst frumsamin grein aðsend frá
lesendum. Þær hafa fjallað um hin fjölbreyttustu efni. Einnig hafa
móttökur lesenda verið með ágætum. Menn hafa ekki verið á einu
máli um allt sem ritað hefur verið í blaðið en margir hafa tekið því
sem sínu málgagni og talið eðlilegt að öll sjónarmið ættu þar aðgang.
Tölvumál hafa frá 1985 alltaf komið út á réttum tíma ef frá eru talin
síðustu tvö tölublöð. Lengi var að því stefnt að blaðið kæmi út milli
10. og 15. hvers mánaðar. Það var of strangt markmið og var slakað á
því. Það hefur hins vegar komið í ljós að örugg útgáfutíðni er
eitthvert mikilvægasta markmið blaðsins. Fámenn ritnefnd getur hins
vegar ekki staðið við ströng skilyrði um útkomudaga.
Nú er komið að tímamótum í útgáfu Tölvumála. Sá háttur sem verið
hefur á útgáfunni undanfarin ár þarf endurskoðunar við. Nauðsynlegt
er að endurskoða brot, uppsetningu, störf ritnefndar, fjármál útgáf-
unnar og útgáfutíðni svo nokkrir þættir sem skipta máli séu nefndir.
Undirritaður hefur ekki dregið dul á þá skoðun sína að skipulag
Skýrslutæknifélagsins sé úrelt og henti ekki starfi þess. Því ber að
breyta svo félagið nái til sem flestra áhugamanna um upplýsinga-
TÖLVUMÁL5