Dagur - 14.07.1986, Blaðsíða 2

2 - DAGUR - 14. júlí 1986
ÚTGEFANDI: ÚTGÁFUFÉLAG DAGS
SKRIFSTOFUR:
STRANDGATA 31, PÓSTHÓLF 58, AKUREYRI
SlMI: 24222
ÁSKRIFT KR. 420 Á MÁNUÐI
LAUSASÖLUVERÐ 40 KR.
RITSTJÓRI OG ÁBYRGÐARMAÐUR:
HERMANN SVEINBJÖRNSSON
FRÉTTASTJÓRI:
GYLFI KRISTJÁNSSON
RITSTJÓRNARFULLTRÚI:
BRAGI V. BERGMANN
BLAÐAMENN:
ÁSLAUG MAGNÚSDÓTTIR, GESTUR E. JÓNASSON,
GESTUR KRISTINSSON (Blönduósi vs. 95-4070 hs. 95-4368),
HELGA JÓNA SVEINSDÓTTIR, INGIBJÖRG MAGNÚSDÓTTIR
(Húsavík vs. 41585 hs. 41529), KRISTJÁN G. ARNGRÍMSSON,
KRISTJÁN KRISTJÁNSSON, MARGRÉT Þ. ÞÓRSDÓTTIR,
ÞÓRHALLUR ÁSMUNDSSON (Sauöárkróki vs. 95-5960 hs. 95-5729)
AUGLÝSINGASTJÓRI: FRÍMANN FRÍMANNSSON
ÚTBREIÐSLUSTJÓRI:
HAFDÍS FREYJA RÖGNVALDSDÓTTIR, HEIMASÍMI 25165
FRAMKVÆMDASTJÓRI: JÓHANN KARL SIGURÐSSON
PRENTUN: DAGSPRENT HF.
leiðari.___________________________
Eftir hverju sækjast
erlendir ferðamenn?
íslendingar furða sig stundum á því að
útlendir ferðamenn skuli flykkjast hingað
norður á hjarann. Oft getur brugðið til beggja
vona með verðrið og raunar á lítið að treysta
í þeim efnum. Fljótlega eftir að vora tekur
fara erlendir ferðamenn að sjást á stangli og
um þetta leyti verða þeir hvað fjölmennastir.
Eftir hverju er þetta fólk að sækjast?
Að finna svar við þessari spurningu er eitt
af grundvallaratriðunum varðandi uppbygg-
ingu ferðamannaþjónustu hér á landi. Hvað
vilja erlendir ferðamenn sækja til íslands og
hvernig getum við orðið við óskum þeirra?
Þeir eru ekki að sækjast eftir því sama og
íslendingar sem fara á sólarstrendur til sunn-
anverðrar Evrópu. Segja má að þeir séu að
sækjast eftir því öndverða. Ekki er það veður-
farið, sól og hiti með tilheyrandi letilífi, heldur
sækir þetta fólk eftir því að komast í snert-
ingu við náttúru landsins, menningu þess og
þjóðlíf almennt. Margir erlendir ferðamenn
eru að sækjast eftir því að hafa eitthvað fyrir
stafni í leyfum sínum hér á landi. Ekki hefur
nægjanlega verið hugsað fyrir því að erlendir
ferðamenn hafi úr nægu að velja hvað þetta
varðar
Þegar Skotar auglýsa skosku Hálöndin sem
ferðamannaparadís leggja þeir áherslu á það,
að þar sé hægt að njóta einveru í kyrrð náttúr-
unnar, þar sé hægt að stunda ýmiss konar
útilíf, s.s. fjallaklifur, veiði og fleira. Á þessi
atriði eiga íslendingar einnig að leggja
áherslu þegar þeir höfða til erlendra ferða-
manna, auk gönguferða og útreiðartúra á hin-
um rómaða og sérstæða íslenska hesti.
Þegar Færeyingar sýna ferðamönnum land
sitt leggja þeir ekki aðeins áherslu á sérstæða
náttúru eyjanna, heldur ekki síður þá menn-
ingu og það þjóðlíf sem þróast hefur þarna úti
á miðju norðanverðu Atlantshafi. Færeyingar
eru stoltir af uppruna sínum og atvinnu-
háttum, bæði gömlum og nýjum. Nokkuð
skortir á slík viðhorf meðal íslendinga og er
það slæmt, því erlendir ferðamenn koma til að
njóta og ekki síður til að fræðast um sögu-
þjóðina, sem hefur þraukað í gegn um aldirn-
ar. Þjóðina sem lifir á gæðum lands og sjávar
en stendur föstum fótum í fortíðinni. Erlendir
ferðamenn vilja kynnast atvinnuháttum
íslensku þjóðarinnar, sem framleiðir matvæli
við bestu skilyrði sem fyrirfinnast í heimin-
um. HS
A/iðtai dagsins.
Halldór, skólinn í Lundi í baksýn.
Feróamannaþjónusta
í Lundi Öxarfirði
- Halldór Gunnarsson skólastjóri
„Hugmyndin er að nýta hús-
næðið yfir sumartímann og
gefa fólki kost á að fá þessa
þjónustu hérna,“ sagði Hall-
dór Gunnarsson skólastjóri í
Lundi í Öxarfirði. í sumar rek-
ur hann ferðamannaþjónustu
ásamt konu sinni Björgu Dag-
bjartsdóttur og fyrsta spurn-
ingin er hvaða þjónustu þau
bjóði.
„Gistingu, bæði svefnpokap-
láss í herbergjum og skólastof-
um, einnig höfum við uppbúin
rúm fyrir minni hópa. Við erum
með veitingasölu, morgunverð
og máltíðir fyrir minni eða stærri
hópa, en þá þarf að panta fyrir-
fram. Við erum ekki með hótel í
þeirri mynd að hægt sé að koma
beint inn í mat, það þarf að hafa
samband við okkur áður. Einnig
er fjölskyldan með hestaleigu og
á staðnum er tjaldstæði og sund-
laug. Þetta er það helsta sem
boðið er upp á.“
- Hvenær opnuðuð þið?
„Pann 20. júní og þá byrjaði
með því að Ungmennasamband
Norður-Pingeyinga kom með
hóp af unglingum í sumarbúðir.
Þetta gekk mjög vel, veðrið var
gott og á sama tíma voru börn
hér úr nágrenninu á sundnám-
skeiði hérna. 7. júlí kom síðan
hópur yngri barna til fimm daga
dvalar í sumarbúðum á vegum
ungmennasambandsins."
- En hafa komið margir hópar
og aðrir gestir?
„Pað hefur verið svona reyt-
ingur, það kom stór hópur frá
Akureyri stuttu eftir að við opn-
uðum. Það var vinabæjamót þar
og Akureyringar tóku á móti
hópum frá vinabæjum sínum á
hinum Norðurlöndunum og
komu hingað með fimmtíu
manna hóp. Pað var mjög gaman
að taka á móti þessu fólki og það
var ánægt, fór í sund og á
hestbak, kveikti varðeld og mikið
var sungið."
- Hvort áttu von á meiru af
innlendum eða erlendum ferða-
mönnum í sumar?
„Við höfum verið að endur-
bæta mötuneytið hérna, það var
ósköp lítið og ófullkomið, en nú
er komið nýtt eldhús og stór
borðsalur. Heimavistina sem er í
öðru húsi eigum við eftir að
endurbæta og einnig gamla skóla-
húsið hérna. Þegar þessu verður
lokið verður aðstaðan til að taka
á móti fólki í gistingu mun betri.
Við ákváðum að byrja í sumar á
þessum rekstri þó þessum fram-
kvæmdum væri ekki lokið og
peninga skorti til að ljúka þeim.
Það er ekki mikið komið af
föstum bókunum eða ákveðnum
hópum sem við vitum um. en allt-
af er verið að hringja og spyrjast
fyrir, daglega kemur fólk og
ferðamannastraumurinn er að
aukast. Núna í vikunni eigum við
von á fimmtíu manna hópi austan
af Héraði sem ætlar að gista og fá
morgunverð."
- Er ekki mjög mikil veður-
sæld hér í Öxarfirðinum?
„Pað er sérstaklega veðursælt
hér í sveitinni umhverfis Lund,
kannski hefur skógurinn eitthvað
að segja, að vísu dregur hann í
sig snjó á veturna en hann er til
skjóls allan ársins hring. Pó að
gott sé að vera hér eigum við
margt eftir að endurbæta t.d. lag-
færa lóðirnar og fegra umhverfið,
þar er mikið verk óunnið.“
- Hvernig ganga samskipti
ykkar við ríkið, gengur illa að fá
fjármagnið?
„Það hefur gengið ákaflega
hægt, en í dag eru þau mál komin
í góðar skorður og gerður hefur
verið ákveðinn samningur um
framkvæmdirnar núna, svo bjart
er framundan í þvf að við fáum
allt fjármagn sem við eigum hjá
ríkinu á næstu árum. Það eru
verulega miklir peningar.
Það var byrjað að byggja þetta
nýja hús 1975, en hér í Lundi hef-
ur verið skóli sennilega síðan
1928. Þessi miðskóli sem rekinn
er hér núna hóf starfsemi sína
1965. Þeir sem eiga og reka skól-
ann eru þrír hreppar, Keldunes-
hreppur, Öxarfjarðarhreppur og
Presthólahreppur.
Þetta er fyrst og fremst ungl-
ingaskóli, hér eru sjöundi, átt-
undi og níundi bekkur grunn-
skóla fyrir unglinga úr þessum
þrem hreppum. Einnig er hér
forskóli, fyrsti og annar bekkur
fyrir börn úr Öxarfirði. En börn-
in í þriðja til sjötta bekk af þessu
svæði sækja öll skólann í Skúla-
garði eða á Kópaskeri.“
Að þessu sinni gefst ekki lengri
tími til að spjalla við Halldór þó
vel fari um mann i borðsalnum í
Lundi og þar sé borið fram alveg
sérlega gott kaffi. Úti býður dug-
legur bíll og duglegur bílstjóri
sem ætla að koma blaðamannin-
um ógreiðfæra leið yfir sandana í
Öxarfirðinum. Það á að líta á
framkvæmdir Seljalax sem er að
leita að vatni til fiskeldis.
Vonandi á það fyrirtæki eftir
að ganga vel og renna styrkum
stoðum undir búsetu manna í
þessu fallega héraði og þá mun
börnunum í skólanum hjá Hall-
dóri fjölga í framtíðinni. IM