Skólavarðan - 01.05.1990, Blaðsíða 17

GÓÐ HUGMYND
Stór hluti af því starfi sem fer fram á skólasafni er
útlán bóka, sem börnin fá ýmist að hafa í skólanum eða
fara með heim. Eins og þið vitið getur gengið misvel að
innheimta bækurnar, þeim mun betur sem það gengur því
fyrr er búið að ganga frá safninu á vorin.
Ég vinn í Myllubakkaskóla í Keflavík. Safnið er stórt,
telur rúm 11.000 bindi. í skólanum eru 820 börn frá
aldrinum 6-11 ára. Útlán á safninu hafa verið um 10.900
á skólaárinu.
Mér datt í hug að gaman væri að gera eitthvað
skemmtilegt í sambandi við innheimtu á bókunum og upp
kom sú hugmynd að setja upp einhvers konar keppni, um
hvaða bekkur yrði fyrstur að skila öllum bókunum er þau
hefðu undir höndum.
Ég bar þessa hugmynd undir skólastjóra, hann tók vel í
málið og fannst þetta góð hugmynd.
Þá var bara að ákveða hvernig keppninni yrði háttað og
hver verðlaunin ættu að verða.
Eftir nokkrar bollaleggingar datt mér í hug að fá
Sparisjóð Keflavíkur í lið með mér og óska þess að þeir
veittu börnunum smá verðlaun, auk þess að greiða
prentkostnað á bókamerkjum sem ég læt hvert barn fá í
byrjun skólaárs með sínu bókasafnsnúmeri á. Þeir fengju
aftur á móti auglýsingu aftan á bókamerkinu. Þetta
fannst þeim alveg frábær hugmynd, og samþykktu á
stxindinni. Svo nú var bara að hefjast handa.
Ég byrjaði á því að fara niður í prentsmiðju með þau
gögn sem ég var búin að taka saman, þar hönnuðum við
bókamerki með auglýsingu frá Sparsjóðnum aftan á og frá
bókasafninu framan á með nafni, bekk, bókasafnsnúmeri og
einnig ýmis konar slagorðum frá safninu.
Þeir prentuðu 1000 stk. í ýmsum litum sem komu mjög vel
út. Þegar ég úthlutaði þessum merkjum ásamt númerunum
sagði ég börnunum frá keppninni.
17