Morgunblaðið - 07.11.2002, Blaðsíða 22

AKUREYRI
22 FIMMTUDAGUR 7. NÓVEMBER 2002 MORGUNBLAÐIÐ
GÓÐ þátttaka var í opnunardag-
skrá norrænu bókasafnavikunnar á
Bókasafni Reykjanesbæjar sl.
mánudag. Þetta er í 6. sinn sem
samstarfshópur norrænna bóka-
safna, PR-hópurinn, stendur fyrir
vikunni og hefur Bókasafn Reykja-
nesbæjar verið með frá upphafi. Að
þessu sinni var áhersla lögð á nor-
ræna samvinnu, enda Norð-
urlandaráð 50 ára í ár. Bókasafna-
vikunni lýkur á sunnudag.
Eins og siður er á opnunarhátíð-
inni voru rafmagnsljósin slökkt
klukkan 18 og lesið við kertaljós
eins og tíðkaðist í baðstofum fyrri
alda. Það var Jón Páll Eyjólfsson
leikari sem las söguna Jólatréð eft-
ir Tove Janson. Sigríður Jóhann-
esdóttir alþingismaður sagði frá
störfum sínum í þágu norrænnar
samvinnu og Skúli Skúlason, fyrr-
verandi bæjarfulltrúi Reykjanes-
bæjar, ræddi um norræna vinabæi
og samstarf á milli þeirra og
Reykjanesbæjar.
Á milli talaðs máls flutti Minni-
hlutabandið norræn lög, en bandið
er skipað þremur bæjarfulltrúum
minnihlutans í bæjarstjórn Reykja-
nesbæjar, sem einnig eru meðlimir
Bæjarstjórnarbandsins fræga, þeim
Guðbrandi Einarssyni, Sveindísi
Valdimarsdóttur og Kjartani Má
Kjartanssyni.
Að dagskránni stóðu, auk bóka-
safnsins, menningarfulltrúi Reykja-
nesbæjar og Suðurnesjadeild Nor-
ræna félagsins.
Áhersla á norræna samvinnu
Morgunblaðið/Svanhildur Eiríksdóttir
Minnihlutabandið lék við opnunina en það skipa bæjarfulltrúarnir Guð-
brandur Einarsson, Sveindís Valdimarsdóttir og Kjartan Már Kjartansson.
Reykjanesbær
SUÐURNES
MIKLAR umræður urðu um tillögur
bæjarfulltrúa Sjálfstæðisflokksins
um breytingar á stjórnkerfi Reykja-
nesbæjar þegar þær voru til fyrri um-
ræðu í bæjarstjórn í fyrrakvöld. Til-
laga bæjarfulltrúa minnihlutans um
að draga til baka uppsögn fram-
kvæmdastjóra Markaðs- og atvinnu-
málaskrifstofu var felld með atkvæð-
um meirihlutans. Tillögunum var
vísað til síðari umræðu.
Árni Sigfússon bæjarstjóri kynnti
tillögur sjálfstæðismanna að nýju
skipuriti Reykjanesbæjar. Þær fela
meðal annars í sér, eins og áður hefur
komið fram, fækkun nefnda og æðstu
stjórnenda. Sagði hann að á kjörtíma-
bilinu myndu sparast um 20 milljónir
kr., miðað við varlega áætlun.
Telja ranglega staðið
að uppsögn
Fulltrúar Framsóknarflokksins og
Samfylkingarinnar gagnrýndu
hvernig staðið var að undirbúningi og
framkvæmd tillagnanna og gerðu at-
hugasemdir við einstakar breytingar-
tillögur. Stóðu þeir saman að tillögu
um að draga til baka uppsögn fram-
kvæmdastjóra Markaðs- og atvinnu-
málaskrifstofunnar (MOA) en Kjart-
an Már Kjartansson, Framsókn-
arflokki, gekk mun lengra í gagnrýni
á tillögurnar sjálfar en fulltrúar Sam-
fylkingarinnar sem tóku undir sumar
tillögur sjálfstæðismanna en gagn-
rýndu aðrar.
Í fyrirhuguðum skipulagsbreyting-
um felst að þrír starfsmenn MOA
missa vinnuna, framkvæmdastjórinn,
ferðamálafulltrúinn og atvinnuráð-
gjafinn. Í staðinn verður ráðinn
starfsmannastjóri og fjárhagsáætlun-
arfulltrúi.
Kjartan Már gagnrýndi harðlega
að bæjarstjóri skyldi hafa sagt þess-
um þremur starfsmönnum upp störf-
um í síðustu viku, áður en tillögur um
skipulagsbreytingar hefðu verið
teknar fyrir í bæjarstjórn. Hann full-
yrti að ekki hefði verið rétt staðið að
uppsögn framkvæmdastjórans því í
starfsmannastefnu Reykjanesbæjar
væri kveðið á um að bæjarstjórn réði
og segði upp yfirmönnum bæjarins,
þar á meðal framkvæmdastjóra
MOA. Flutti hann tillögu sem allir
fulltrúar minnihlutans stóðu að um að
draga uppsögnina til baka, þar til til-
lögur að breyttu stjórnskipulagi
hefðu verið afgreiddar af bæjar-
stjórn. Sagði hann það gert í þeim til-
gangi að forða Reykjanesbæ frá ófyr-
irsjáanlegum eftirmálum og hugs-
anlegum skaðabótakröfum.
Fulltrúar meirihlutans upplýstu að
framkvæmdastjórinn hefði sex mán-
aða uppsagnarfrest og af því að tillög-
urnar gengju út á að draga úr kostn-
aði væri hver mánuður mikilvægur.
Böðvar Jónsson sagði ekki óvenjulegt
að fólki væri sagt upp störfum vegna
skipulagsbreytinga sem unnið væri
að. Ákvörðun bæjarstjórnar yrði síð-
an væntanlega staðfest á næsta bæj-
arstjórnarfundi.
Tillagan var að loknum umræðum
felld með sex atkvæðum meirihlut-
ans. Létu fulltrúar Sjálfstæðisflokks-
ins bóka að lokinni afgreiðslu tillög-
unnar að uppsögn framkvæmda-
stjórans stæði og yrði tillaga þess
efnis lögð formlega fyrir bæjarráð á
næstunni. Tekið var fram að bæjar-
ráð færi með starfsmannaráðningar
og uppsagnir í umboði bæjarstjórnar,
samkvæmt samþykktum um stjórn
bæjarins. Með því fengi uppsögnin af-
greiðslu í bæjarstjórn um leið og
stjórnskipulagsbreytingar yrðu tekn-
ar til síðari umræðu í bæjarstjórn.
Aukin miðstýring
Kjartan Már gagnrýndi skipulags-
breytingarnar einnig efnislega, taldi
þær ekki nógu ígrundaðar. Sagði
hann að fækkun nefnda fæli í sér
aukna miðstýringu. Kvaðst hann álíta
að þær fælu ekki í sér þann sparnað
sem fullyrt væri, þær drægju úr
menntunarstigi starfsmanna Reykja-
nesbæjar og væru í rauninni skref
afturábak. Þá taldi hann það mikla
skammsýni að draga úr þjónustu á
sviði atvinnumála þegar atvinnuleysi
væri að aukast á Suðurnesjum. Rök-
studdi hann álit sitt í ítarlegri bókun.
Eyjólfur Eysteinsson, varabæjar-
fulltrúi Samfylkingarinnar, kvaðst
geta tekið undir flest gagnrýnisatriði
Kjartans Más en tók fram að ekki
væru tillögurnar alvondar og nefndi
að skynsamlegt væri að leggja niður
framkvæmda- og tækniráð. Lýsti
hann sérstaklega áhyggjum sínum af
fækkun lýðræðislega kjörinna full-
trúa í nefndum svo og efasemdum um
þá tillögu að leggja niður MOA á tím-
um aukins atvinnuleysis.
Ólafur Thordersen, Samfylking-
unni, lýsti þeirri skoðun sinni að
breytingarnar væru jákvæðar að
flestu leyti en varaði við að farið væri
of geyst í þær, og vísaði til umræðna
sem áður höfðu farið fram á fundin-
um.
Breytingar nauðsynlegar
Böðvar Jónsson, formaður bæjar-
ráðs, sagði að sparnaður væri meg-
inástæðan fyrir fækkun nefnda og
vakti athygli á því að breytingar væru
nauðsynlegar vegna þess að unnið
væri að slitum Hafnasamlags Suður-
nesja og þar hefði nýtt sviðs bæst við
stjórnkerfið að óbreyttu. Hann nefndi
sem rök fyrir því að leggja niður
MOA að skrifstofan væri komin í
samkeppni við einkafyrirtæki um
skýrslugerð og fleira en ekki væri
leyfilegt að sveitarfélög stæðu í slíkri
samkeppni.
Árni Sigfússon bæjarstjóri sagði að
útreikningar fjármálastjóra bæjarins
bentu til þess að unnt yrði að spara
tæpar 38 milljónir á kjörtímabilinu
með þeim stjórnkerfisbreytingum
sem unnið væri að. Sjálfur vildi hann
fara varlegar í sakirnar, vissi að ýmis
kostnaður félli til vegna framkvæmd-
arinnar, og nokkuð öruggt væri að sá
sparnaður næðist sem lagt hefði verið
upp með, eða að minnsta kosti 20
milljónir á kjörtímabilinu.
Tillaga um stjórnkerfisbreytingar
verður tekin til afgreiðslu að lokinni
síðari umræðu á fundi bæjarstjórnar
19. nóvember næstkomandi.
Miklar umræður um breytingar á stjórnkerfi bæjarins
Fellt að draga upp-
sögn framkvæmda-
stjóra MOA til baka
Reykjanesbær
TVEIR menn á sextugsaldri voru
fluttir á sjúkrahús Heilbrigðisstofn-
unar Suðurnesja í Keflavík til að-
hlynningar eftir bílveltu rétt við
Grindavík í gærmorgun, en þeir voru
ekki taldir alvarlega slasaðir.
Að sögn lögreglunnar í Keflavík
missti ökumaðurinn vald á bílnum í
hálku með þeim afleiðingum að hann
fór yfir veginn og út af og valt. Um
var að ræða lítinn sendibíl.
Tilkynnt var um óhappið rétt fyrir
klukkan 9 um morguninn. Bíllinn er
stórskemmdur og var fjarlægður af
vettvangi með kranabíl.
Tveir fluttir
á sjúkrahús
Grindavík
♦ ♦ ♦
SIGURBJÖRG Kristínardóttir,
framkvæmdastjóri Sinfóníu-
hljómsveitar Norðurlands, segir
að hljómsveitin geti ekki haldið
tónleika í Akoplasthúsinu svo-
kallaða við Þórsstíg nema gerðar
verði þar ákveðnar breytingar.
Sinfóníuhljómsveitin er í upp-
námi með væntanlega aðventu-
tónleika sína. „Við getum líklega
fengi inni í íþróttahúsinu á
Hrafnagili og ef ekki vill betur
förum við þangað. Við hefðum þó
frekar viljað vera innan bæjar-
markanna,“ sagði Sigurbjörg.
Stjórn Fasteigna Akureyrar-
bæjar fjallaði um húsnæðisvanda
Sinfóníuhljómsveitarinnar, í
framhaldi af erindi frá Sigur-
björgu framkvæmdastjóra. Eins
og fram kom í Morgunblaðinu í
gær telur stjórn Fasteigna ekk-
ert því til fyrirstöðu að hljóm-
sveitin fái Akoplasthúsið til af-
nota fyrir aðventutónleika í
desember og aðra tónleika með-
an húsið stendur ónotað. Húsið
er hins vegar til sölu og því sé
ekki hægt að horfa til aðstöðu
fyrir hljómsveitina til lengri
tíma. Því sé jafnframt óráðlegt
að leggja í kostnaðarsamar
breytingar.
Sigurbjörg sagðist hafa skoðað
Akoplasthúsið ásamt Guðmundi
Óla Gunnarssyni hljómsveitar-
stjóra og þar væru stórir og
miklir salir sem gaman væri að
nota. Hins vegar væri mikill eft-
irhljómur í húsinu og að óbreyttu
væri ekki hægt að nota salina til
tónleikahalds. „Ég veit ekki hvað
þarf að gera mikið til að breyta
aðstöðunni en trúlega þarf að
setja eitthvað í loftið og á gólfið.
Ég sendi bæjaryfirvöldum bréf
og spurðist fyrir um hvort áhugi
væri fyrir því að gera eitthvað
fyrir húsið, þannig að við hefðum
þar aðstöðu þar til menningar-
húsið risi en hef ekki fengið neitt
svar.“
Sigurbjörg sagði að Sinfóníu-
hljómsveit Norðurlands, sem nú
er á sínu tíunda starfsári, hefði
aldrei haft séraðstöðu til æfinga
eða tónleikahalds. Hljómsveitin
hefði spilað mikið í kirkjum bæj-
arins og þar verið vel tekið og
einnig í Íþróttaskemmuni þegar
hún var og hét. Erfiðara væri að
komast inn í kirkjurnar á þess-
um árstíma, þar sem starfsemi
þeirra ykist eðlilega til muna á
aðventunni.
„Það verður alltaf erfiðara og
erfiðara að komast inn með tón-
leika á Akureyri og sérstaklega
nú með þessa aðventutónleika.
Suzuki-nemendur frá Reykjavík,
Akureyri og víðar, alls 80–100
börn, munu spila með hljóm-
sveitinni á aðventutónleikunum,
þannig að við þurfum töluvert
pláss.“
Sigurbjörg sagði að mikill
áhugi væri fyrir því að fá að-
ventutónleika hljómsveitarinnar
yfir í Þingeyjarsýslu og ef af yrði
færu þeir líklega fram í Ýdölum.
Sinfóníuhljómsveit Norðurlands
í Akoplasthúsið?
Húsið ónothæft
til tónleikahalds
nema með
breytingum
HARÐAR umræður urðu um af-
greiðslu umhverfisráðs á lóðaum-
sóknum á fundi bæjarstjórnar Ak-
ureyrar í vikunni. Meirihluti
Sjálfstæðisflokks og Framsóknar-
flokks í umhverfisráði klofnaði við
afgreiðsluna og gekk fulltrúi L-
lista í ráðinu til liðs við tvo Sjálf-
stæðismenn gegn fulltrúum Fram-
sóknar og Samfylkingar. Við af-
greiðslu bæjarstjórnar á
fundargerð umhverfisráðs stóð af-
greiðsla meirihluta ráðsins á út-
hlutuninni.
Tvö fyrirtæki, Gullströnd ehf. og
Fjölnir ehf., sóttu um lóðirnar við
Bjarkarlund 1–5, Grenilund 21–23,
Grenilund 25–27 og Grenilund 28–
32. Umsóknir beggja fyrirtækjanna
voru teknar gildar en meirihluti
umhverfisráðs samþykkti að veita
Gullströnd allar lóðirnar, sam-
kvæmt tillögu frá formanni um-
hverfisráðs, Guðmundi Jóhanns-
syni, Sjálfstæðisflokki. Jón Ingi
Cæsarsson fulltrúi Samfylkingar-
innar gerði tillögu um að Fjölnir
fengi lóðirnar en tillaga formanns-
ins var í öllum tillfellum samþykkt
með þremur atkvæðum gegn
tveimur.
Nokkuð harðar umræður urðu
um málið í bæjarstjórn, þar sem
fulltrúar minnihlutans gagnrýndu
afgreiðslu umhverfisráðs. Oktavía
Jóhannesdóttir, Samfylkingunni,
talaði þar um að pólitík eða vin-
argreiði hefði ráðið ferðinni en ekki
faglegt mat. Oddur Helgi Halldórs-
son bæjarfulltrúi og oddviti L-lista
sagðist ekki sammála sínum manni
í umhverfisráði, sem myndaði
meirihluta með sjálfstæðismönnum
í ráðinu. Þórarinn B. Jónsson,
Sjálfstæðisflokki, sagði það já-
kvætt að mörg fyrirtæki vildu
byggja á Akureyri og að það væri
breyting til batnaðar. Hann sagði
hins vegar að ekki væri hægt að
úthluta nema einum aðila hverri
lóð eða hverjum reit.
Oktavía lagði fram tillögu í bæj-
arstjórn þess efnis að Fjölnir fengi
umræddar lóðir en sú tillaga náði
ekki fram að ganga. Samþykkt um-
hverfisráðs var samþykkt í bæj-
arstjórn með fimm atkvæðum gegn
fjórum og fær Gullströnd lóðirnar.
Harðar umræður um lóðaúthlutanir
í bæjarstjórn
Meirihlutinn
klofnaði í
umhverfisráði