Morgunblaðið - 27.10.2007, Side 27

úr sveitinni
MORGUNBLAÐIÐ LAUGARDAGUR 27. OKTÓBER 2007 27
Nú um veturnætur líta margir um
öxl, einkum til veðráttunnar, ekki síst
þeir sem eiga svo margt undir sól og
regni. Í þeim hópi eru bændurnir sem
nýta frjósama fósturmoldina og njóta
þess sem til er sáð. Eins og margoft
hefur komið fram var sumarið ein-
stakt, að minnsta kosti hér á Suður-
landi. Miklir þurrkar og hiti marga
daga yfir 20 gráður hér í uppsveitum.
Heyfengur er þó talinn með ágætum,
grænmetisuppskera góð og korn
þroskaðist vel. Ekki leit vel út með
uppskeru hjá garðyrkjubændum um
tíma en frá síðari hluta ágústmánaðar
má segja að hafi verið nær stanslaus
vætutíð.
Það gefur auga leið að uppskeru-
störf eru erfið í svona tíðarfari. Þeir
bændur sem rækta korn áttu í erf-
iðleikum með slátt á ökrum sínum og
garðyrkjubændur hafa varla komist
um garðlöndin fyrir bleytu og er upp-
skerustörfum enn ekki allstaðar lok-
ið.
  
Þegar skammdegismyrkrið leggst yf-
ir og dagarnir styttast æ meir í báða
enda hefst hefðbundið félagsstarf
sem er allmikið yfir vetrarmánuðina.
Kóræfingar eru komnar á fullt en hér
í uppsveitum Árnessýslu starfa all-
nokkrir kórar.
Skálholtskirkjukórinn fór til Róm-
arborgar og söng m.a. fyrir páfa. Hér
starfar kvennakórinn Upp-
sveitasystur, Vörðukórinn sem er
blandaður kór, Barna- og unglinga-
kór Biskupstungna auk Karlakórs
Hreppamanna sem telur nú um 60
söngmenn. Hjá þeim félögum verður
haldið árlegt herrakvöld í Fé-
lagheimilinu á Flúðum 9. nóvember.
Karlakórinn varð 10 ára þann 1. apríl
síðastliðinn. Af því tilefni er á næst-
unni væntanlegur geisladiskur með
söng þeirra félaga, lögin voru tekin
upp síðastliðið vor.
Þá er félagsstarf eldri borgara um-
talsvert og fjölbreytt. Hvað er betra
en að eiga góðar samverustundir með
jafnöldrum og vinum til margra ára?
  
Sauðkindin sem hefur fylgt bændum
allt frá landnámi á mikil ítök í hugum
margra. Fáir eða engir bændur hér í
uppsveitum hafa þó alla afkomu sína
af sauðfé. Allnokkrir þeirra sem skor-
ið var niður hjá, vegna fyrirbyggjandi
aðgerða gegn riðuveiki, hafa fest
kaup á líflömbum nú og í fyrrahaust.
Sums staðar er aðeins um fáar kindur
að ræða sem eru ungum og eldri til
ánægju og lífsfyllingar.
Þetta á við um Biskupstungur og
Hrunamannahrepp. Það er talað um
heimtur og vænleika, kynbætur o.fl.
Fallþungi dilka er misjafn eftir bæj-
um, sumstaðar heldur lakari en í
fyrra.
Hjá Sláturfélagi Suðurlands á Sel-
fossi lýkur slátrun þegar vika er liðin
af nóvember. Meðalvigt dilka er 15,4
kg. sem er ívið minna en í fyrra. Á
móti kemur að flokkun er að jafnaði
betri. Fjárræktarfólki ber saman um
að gerð fjárins sé alltaf að batna. Frá
því farið var að ómskoða fitu og mæla
þykkt hryggvöðva lamba fyrir nokkr-
um árum og meta ásetningslömb eftir
gerð hafa orðið framfarir í ræktunni.
Markvisst er unnið að kynbótum alls
búfjár.
HRUNAMANNAHREPPUR
Sigurður Sigmundsson
Morgunblaðið/Sigurður Sigmundsson
Félagsstarf Víða er starf félaga eldri borgara fjölþætt eins og hjá þesum
konum á Flúðum sem eru duglegar við föndurvinnu.
ÁSKRIFTASÍMI
569 1100