Heima er bezt - 01.08.1962, Qupperneq 32

HEIMA_____________
BEzrr BÓKAHILLAN
Herbert Kubly: Italía. Reykjavík 1962.
Almenna bókafélagið.
Þetta er þriðja bókin í flokknum Lönd og þjóðir, sem AB hóf
útgáfu á í lok síðastliðins árs, og hin skemmtilegasta þeirra að
mínum dómi. Frágangur allra bókanna er hinn sami. Hér er
brugðið upp svipmyndum af ítalíu fyrr og nú. Vér kynnumst þar
töfrum þessa undralands, fáum og býsna mikil kynni af þjóðinni,
sem þar býr, öllum stéttum hennar, hugðarefnum, stjórnarfari,
atvinnuháttum o. s. frv. Lesandinn er einnig leiddur um svið
hinnar viðburðariku sögu hennar frá Rómaveldi hinu forna til
nútímans, og það er ekki einungis stjórnmálasagan, sem þar er
kynnt, heldur miklu fremur saga bókmennta og fagurra lista.
Allt þetta færir bókin oss líkt og litauðug, atburðarík kvikmynd.
Og einkum verða lesandanum minnisstæðar andstæðurnar, sem
svo skýrt eru dregnar þar fram. Þarna mætum vér hinni glæstustu
hámenningu við hliðina á aumkunnarverðri fáfræði, auður og ó-
hóf birtist þar jafnframt hinni sárustu örbirgð og skorti. Enda
þótt bókin sé ekki hlaðin staðreyndum, gefur hún aukinn skilning
og vekur um leið þorstann eftir að vita meira um þetta furðulega
land og þjóð. 1 stuttu máli sagt, heillandi bók, sem menntar og
skemmtir í senn. Þýðandi er Einar Pálsson, og virðist hann hafa
leyst verk sitt vel af hendi.
Fuglabók AB. Reykjavík 1962. Almenna bókafélagið.
Fuglar íslands og Evrópu heitir bókin fullu nafni. Höfundar
hennar eru þrír, tveir enskir og einn amerískur, og fyrst er hún
gefin út á ensku árið 1954. l)r. Finnur Guðmundsson hefur þýtt
hana á íslenzku og staðfært. Bókin hefur þegar verið þýdd á öll
hin helztu Evrópúmál og hvarvetna notið hinna mestu vinsælda.
f henni er lýst alls 573 tegundum fugla. 1 henni eru yfir 1200
myndir, þar af mjög margar litmyndir og kort af útbreiðslu alls
þorra tegundanna. Af fuglum bókarinnar hafa 230 tegundir sézt
á íslandi.
Fátt af fyrirbærum náttúrunnar nýtur almennari vinsælda en
fuglarnir. Bækur um þá eru nær óteljandi, og margt af þeim stór
verk og hin skrautlegustu. Ahugamenn um fugla eru sennilega
fleiri en um nokkra aðra grein náttúrufræðinnar, og hafa margir
þeirra lagt fram drjúgan skerf til fuglafræðinnar. Annað mál er
að fuglafræðin getur naumast talizt til hinna hagnýtu greina nátt-
úruvísindanna nema að litlu leyti, og meiri tilfinningasemi gætir
i viðhorfi manna til fugla en margs annars sem fyrir augun ber
í ríki náttúrunnar. Hér á landi sem annars staðar eru margir
áhugamenn um þessi efni, og fáu leikur mönnum meiri hugur á
en að vita einhver deili á ókenndum fuglum, sem fyrir augu
þeirra ber. En fram að þessu hafa einungis verið til tvær íslenzkar
bækur um þetta efni, fuglabækur þeirra Bjarna Sæmundssonar og
Magnúsar Björnssonar, sem báðar eru nokkuð gamlar og ófáan-
legar með öllu. Hvorug þeirra var handhæg við skoðun fugla í
náttúrunni, þótt ágætar væru í sinni röð og á sínum tíma. Fugla-
bók AB bætir því úr brýnni þörf. Hún er samin eftir nýjustu
þekkingu manna á þessum efnum og umfram allt sniðin við það
að vera handbók við skoðun fuglanna úti í náttúrunni sjálfri.
Enda þótt nothæfi slíkrar bókar verði ekki til fulls dæmt nema
við notkun, má ráða það af vinsældum hennar, að hún nái vel
þeim tilgangi sínum að vera trúr leiðbeinandi um að þekkja fugla
úti við. Lýsingar hennar eru glöggar og góðar, þótt stuttar séu.
Aðalatriðin dregin skýrt fram, og skilgreiningar skýrar og auð-
skildar. Myndirnar eru afbragð að litum og formi og gera kleift
að þekkja fuglana í ýmsum mismunandi stellingum. Meginkost
má það og telja, að fleira er hér talið en þeir fuglar einir, sem hér
hafa sézt, því að árlega bætast nýir flakkarar við í hóp íslenzkra
fugla, og gerir bókin nú kleift að átta sig á þeim. Þýðingin hefur
verið vandaverk, en virðist hafa tekizt mjög vel. Þýðandi hefur
búið til um 420 ný fuglanöfn. Eins og vænta má hefur sú nýsmíð
tekizt misjafnlega vel, en mörg nöfnin eru ágæt og fara vel í máli,
og yfirleitt er fengur að þeim. Mjög eru breytt latnesku fugla-
heitin frá hinum eldri íslenzku fuglabókum, og hefði verið rétt að
geta samnefna við þær tegundir að minnsta kosti, þar sem bæði
nöfnin, hið íslenzka og latneska, eru breytt. Þá hefði verið til bóta,
að táknin um þá fugla, sem sézt hafa hér á landi, hefðu verið sett
við tegundatalið í bókarbyrjun en ekki einungis við myndatext
ana. Frágangur bókarinnar er með ágætum, og er hún valin til
þess að vekja áhuga ungra og fullorðinna á einum þætti íslenzkrar
náttúru, og skapa þeim með því óteljandi ánægjustundir, og kenna
þeim að meta dásemdir náttúru lands vors og lffsins í heild. Allir
sem að bókinni hafa unnið eiga því hinar beztu þakkir fyrir hana.
St. Std.
+------------------------------------------------------*
HUGSAÐ HEIM.
LjóS eftir Ingibjörgu Sigurðardóttur.
Bókaforlag Odds Bjömssonar.
í haust kemur á bókamarkaðinn ljóðabók eftir
Ingibjörgu Sigurðardóttur. Ljóðabólcin, sem
er 100 blaðsíður, nefnist Hugsað helm. Á und-
anförnum árum hafa komið út allmargar skáld-
sögur eftir Ingibjörgu Sigurðardóttur, og hef-
ur hún nú eignazt stóran hóp lesenda. En þó
mun fáum hafa verið kunnugt um að Ingibjörg
legði einnig stund á Ijóðlist í tómstundum sín-
um. Enda þótt skáldkonan láti lítið yfir Ijóð-
um sínum, mun þessi litla bók eflaust verða
kærkomin mörgum af lesendum hennar. Þeir
áskrifendur „Heima er bezt“, sem kynnu að
vilja eignast bókina, geta fengið hana afgreidda
strax. Bókhlöðuverð kr. 88.00. Til áskrifenda
„Heima er bezt“ aðeins kr. 60.00.
•)»„„-----M----M-------------------------------W----«--„4*
288 Heima er bezt