SunnudagsMogginn - 27.06.2010, Page 8

Morgunblaðið/RAX
O
kkur hefur verið ótrúlega vel tekið. Þetta fer mun betur af stað
en við þorðum að vona, bjartsýnisspáin er sprungin,“ segir
Hildur M. Jónsdóttir, framkvæmdastjóri Brúðuheima, menning-
ar- og listamiðstöðvar sem tengist brúðuleiklist bónda hennar,
Bernds Ogrodniks, sem voru opnaðir fyrir fimm vikum í þremur gömlum
friðuðum húsum í Englendingavík í Borgarnesi.
„Gestir hafa yfirleitt verið mjög ánægðir með brúðusafnið enda er þetta
allt öðruvísi safn en fólk á að venjast og vonandi góð viðbót við íslenska
safnaflóru. Fjölskyldufólk hefur verið duglegt að koma og nú eru hópar líka
farnir að streyma hingað, fyrirtæki og félagasamtök. Það er mjög ánægjulegt
enda er safnið ekki síður fyrir fullorðna en börn.“
Hildur segir marga furða sig á umfangi Brúðuheima en samtals er mið-
stöðin 650 fermetrar.
Í leikhúsi Brúðuheima verður boðið upp á sýningu á Pétri og úlfinum
klukkan 14 á sunnudögum í sumar. Fyrsta sýning var um liðna helgi og var
fullt út úr dyrum en salurinn tekur 75 manns í sæti.
Hafinn er undirbúningur að næstu sýningu, Gilitrutt í leikstjórn Benedikts
Erlingssonar, en frumsýning er fyrirhuguð í október. „Síðan stefnum við að
því að bjóða upp á Gilitrutt fyrir erlenda ferðamenn næsta sumar.“
Sóttar eftir leikinn
Gestir hafa ekki bara brugðist vel við listinni því kaffihúsið hefur einnig
mælst vel fyrir. „Það hefur vantað kaffihús í Borgarnesi og bæjarbúar hafa
verið mjög ánægðir með framtakið. Það er ánægjulegt hvað póstarnir vinna
vel saman, það hefur verið bæði menning og stemning í kringum þetta.“
Mikil veðurblíða hefur heldur ekki spillt fyrir en hægt er að sitja úti á palli
við víkina. „Staðsetningin er æðisleg,“ segir Hildur sem lætur sig dreyma um
að koma í framtíðinni upp aðstöðu til sjósunds.
Hildur hefur fengið óvenjumargar konur í heimsókn undanfarin kvöld og
datt í hug að grennslast fyrir um ástæðuna. Svarið var einfalt: Við verðum
sóttar eftir leikinn!
Hildur og Bernd eru alsæl í Borgarnesi. Þau voru lengi norður í Skíðadal og
„það þurfti þetta til að draga okkur út úr dalnum“ eins og hún kemst að orði.
Vinnuskólinn í Borgarnesi hefur í samstarfi við Brúðuheima unnið undan-
farna viku að gerð risabrúðna fyrir Brákarhátíð, sem haldin er í bænum í dag,
laugardag. Klukkan 13:30 geta gestir og gangandi séð afraksturinn þegar
fram fer sérstakur brúðugjörningur við Brákarbrúna og í kjölfarið skrúð-
ganga upp í Skallagrímsgarð.
Bjartsýnisspá-
in sprungin
Brúðuheimar í Borgar-
nesi falla í frjóa jörð
Hildur M. Jóns-
dóttir og Bernd
Ogrodnik, að-
standendur
Brúðuheima í
kaffihúsinu.
Í deiglunni
Orri Páll Ormarson orri@mbl.is
8 27. júní 2010