SunnudagsMogginn - 27.06.2010, Blaðsíða 13

27. júní 2010 13
H
eimsókn nemenda og kennara
við tónlistarskólann í Stettín er
fyrsti liður í samstarfsverkefn-
inu „Stefnumót kammersveita
ungs fólks í Reykjavík og Stettín“ sem
styrkt er af norska hluta menningarsjóðsins
fyrir Evrópska efnahagssvæðið. Verkefnið
stendur í heilt ár, í september heldur hópur
íslenskra nema utan, í nóvember kemur
annar pólskur hópur hingað og í febrúar á
næsta ári gefst fleiri Íslendingum tækifæri
til að kynna sér aðstæður í Stettín.
Meðan á heimsókninni stóð æfðu pólsku
og íslensku nemendurnir saman tónlist frá
heimalöndum sínum, hlýddu á fyrirlestra
um tónlistararf landanna, meðal annars frá
tónskáldunum Atla Heimi Sveinssyni og
Hildigunni Rúnarsdóttur, og héldu tvenna
tónleika fyrir aðstandendur og almenning.
Þar léku ungmennin meðal annars íslenska
þjóðsönginn eftir Sveinbjörn Sveinbjörns-
son saman.
Meginmarkmið samstarfsverkefnisins er
að auka hæfileika og færni ungra þátttak-
enda undir leiðsögn reyndra kennara og
auka víðsýni krakkanna með því að kynna
fyrir þeim tónlist og tónlistarhefðir land-
anna. Í verkefninu verður sérstök áhersla
lögð á tónlist Frédérics Chopins í tilefni af
200 ára ártíð hins mikla snillings. Þá hefur
Atli Heimir útsett gamalgróin íslensk lög á
borð við Á Sprengisandi og Sofðu unga ástin
mín fyrir krakkana.
Ógleymanleg ferð
Aðstandendur hópsins, Paweł Majewski
skólastjóri, Anna Głòczynska aðstoð-
arskólastjóri, Joanna Jagiełło fiðlukennari
og Urszula Stawicka formaður forntónlist-
arakademíu skólans, eru á einu máli um að
heimsóknin hafi verið afar vel heppnuð.
Eins og svo margir útlendingar gera þau
veðrið fyrst að umtalsefni. „Það voru engir
tveir dagar eins. Ég átti von á meiri kulda en
þetta hefur verið ósköp notalegt. Síðan bæta
Íslendingar upp fyrir hitastigið með hlýju
sinni. Þið eruð höfðingjar heim að sækja.
Þessi ferð verður mér alla tíð ógleymanleg
og ég hef mikinn áhuga á að kynnast Íslandi
betur,“ segir Paweł skólastjóri og brosir.
Farið var með gestina Gullna hringinn og
í Bláa lónið, svo sem lög gera ráð fyrir. „Ís-
land er virkilega fallegt land,“ segir Urs-
zula.
Stettín er við landamæri Þýskalands og
tónlistarskólinn þar hefur gegnum tíðina
starfað mikið með þýskum skólum. Að öðru
leyti hefur lítið verið gert af því að leggja
land undir fót.
Spurð hvort þau hafi vitað eitthvað um
íslenska tónlist áður en þau komu hrista
þau höfuðið. „Allir þekkja Björk en að öðru
leyti vissum við lítið sem ekkert,“ segir
skólastjórinn en bætir sposkur við að hann
kannist við nokkra íslenska handbolta- og
fótboltamenn.
Góð sinfóníuhljómsveit
Hópurinn skellti sér á tónleika Sinfón-
íuhljómsveitar Íslands og Hjaltalín og hafði
gaman af. Kennararnir bera Sinfóníunni
sérstaklega vel söguna. „Hún er mjög góð,“
segir Anna.
Ewa Tosik-Warszawiak, kennari Kamm-
erklúbbsins, er pólsk en hefur búið á Íslandi
í átján ár. Það er ekki síst henni að þakka að
samstarfið komst á en þær Urszula kynntust
fyrir margt löngu í Kraká og hafa haldið
góðu sambandi síðan. Að hennar sögn er
það mikil hvatning fyrir krakkana að hittast
og æfa saman. Tungumálið hafi ekki verið
vandamál, allra síst þegar krakkarnir voru
komnir með hljóðfærin í hendur. „Heim-
sóknir af þessu tagi efla okkar hóp, það er
ekki nokkur spurning,“ segir Ewa.
Kammerklúbbur unga fólksins var settur
á laggirnar í ágúst í fyrra en hann sam-
anstendur af 21 nemanda á aldrinum tíu til
átján ára úr tónlistarskólum á höfuðborg-
arsvæðinu og í Keflavík. Nemendurnir leika
á fiðlu, víólu, selló og píanó.
Hvergi betur tekið
Alls komu sjö pólsk ungmenni til landsins
og tvö þeirra, Jedrzej Wójciak og Milena
Walent, eru hæstánægð með dvölina. Bæði
þykir þeim landið fallegt og fólkið viðmóts-
þýtt. „Ég hef ferðast býsna víða en hvergi
verið betur tekið en á Íslandi,“ segir Milena.
Jedrzej þykir mest til birtunnar koma. „Það
dimmir aldrei, ekki einu sinni um há-
nóttina. Það er algjörlega magnað.“
Veðrið finnst þeim í góðu lagi. „Þetta er
svona eins og haust í Stettín,“ segir Jedrzej
og Milena viðurkennir brosandi að hún hafi
átt von á verra veðri. „Alla vega rigningu.“
Þau vissu lítið sem ekkert um Ísland áður
en þau komu en lásu sér svolítið til á netinu.
Eftir dvölina eru þau margs vísari. Þau eru
sammála um að íslensk tónlist sé falleg en
hafi gjörólíkan karakter þeirri pólsku.
Spurð hvort þau gætu hugsað sér að flytja
íslenska tónlist í framtíðinni svara þau ein-
um rómi: „Hvers vegna ekki?“
Pólsku tónlistarnemarnir
ásamt hluta Kamm-
erklúbbs ungs fólks á höf-
uðborgarsvæðinu.
Morgunblaðið/Kristinn
Úti við
sjóndeildar-
hring
Hópur ungs tónlistarfólks og kennarar
þeirra frá Stettín í Póllandi voru á dög-
unum í heimsókn hjá nýstofnuðum Kamm-
erklúbbi ungs fólks á höfuðborgarsvæðinu.
Bera þau landi og þjóð vel söguna.
Orri Páll Ormarsson orri@mbl.is
Joanna Jagiełło, Paweł
Majewski, Ewa Tosik-
Warszawiak, Anna Głò-
czyńska og Urszula Stawicka.