Monitor - 31.03.2011, Blaðsíða 7

SKAPARAR VERKSINS GIBBLA
SEM FRUMSÝNT VERÐUR UM HELGINA
7FIMMTUDAGUR 31. MARS 2011 Monitor
Íslenski danshópurinn Darí Darí frumsýnir um
helgina nýtt íslenskt dansverk sem ber nafnið
Gibbla. „Þetta er í rauninni frumsýning á þremur
verkum í einu,“ útskýrir Inga Maren Rúnarsdóttir,
einn af meðlimum Darí Darí sem skipað er henni,
Guðrúnu Óskarsdóttur og Kötlu Þórarinsdóttur.
„Gibbla er dansverk, tónlistarverk og myndverk
svo allir ættu að geta fundið í því eitthvað við
sitt hæfi,“ bendir Inga á en tónlistin er samin af
Lydíu Grétarsdóttur og myndverk er eftir Þóru
Hilmarsdóttur.
Þurfa að vera útsjónarsamar
Darí Darí hefur unnið lengi að verkinu sem
er þó byggt á fyrra verki þeirra sem var sýnt í
grunnskólum árið 2008. „Í rauninni unnum við
þetta frá grunni aftur þó við notum eitthvað úr
upprunalega verkinu,“ útskýrir hún og bendir
á að þá hafi verkið einungis verið dans. Hún
segir verkið í núverandi mynd hafa verið lengi í
vinnslu. „Við byrjuðum að ræða hugmyndirnar
síðasta sumar svo ferlið hefur verið svipað langt
og venjuleg meðganga,“ segir hún hlæjandi og
bætir við að síðastliðnir tveir mánuðir hafi verið
sérstaklega stífir. „Síðustu tvo mánuði höfum
við verið saman á hverjum degi að vinna að
verkinu,“ útskýrir Inga Maren og segir vinnslu
myndbandsins hafa verið heljarinnar átak.
„Við unnum langt fram á nótt í heila viku til
að þurfa að leigja tækjabúnaðinn í skamman
tíma,“ segir hún og bætir við að uppsetning á
svona sýningu sé virkilega kostnaðarsöm. „Við
fengum listamannalaun til að vinna verkið en
enga aðra styrki svo við þurftum að vera mjög
útsjónarsamar.“
Lifa á dansinum
Inga Maren, Guðrún og Katla starfa allar sem
atvinnudansarar en Inga Maren segir oft geta
verið mjög erfitt að lifa á dansinum einum saman.
„Ég held að flestir í þessum bransa flakki mikið á
milli verkefna og þurfi að kenna með,“ segir Inga
Maren sem er sjálf á leiðinni til Bandaríkjanna í
vor að sýna með dansflokki þar. „Það eru engir
geðveikir möguleikar á háum launum sem dansari
svo maður er ekki í þessu út af peningunum.“
Lífsþræðir og örlaganornir
Gibbla sækir innblástur í örlaganornirnar Urði,
Verðandi og Skuld en Inga Maren segir þær stöllur
ekki hafa viljað kafa of djúpt í viðfangsefnið.
„Við ákváðum að hafa þetta einfalt og vinna með
örlaganornirnar og sérstaklega lífsþræðina sem
þær spinna,“ útskýrir hún og bendir á að verkið
sé örlítið dramatískt á köflum. Gibbla verður
frumsýnt þann 1. apríl í Tjarnarbíói og sýnt þar
áfram. „Draumurinn væri auðvitað að sýna verkið
erlendis svo vonandi fær það góðar viðtökur,“
segir Inga Maren spennt fyrir fæðingunni eftir
langan og strangan undirbúning.
GIBBLA SÝNINGAR:
Föstudaginn 1. apríl
Sunnudaginn 3. apríl
Miðvikudaginn 6. apríl
Sunnudaginn 10. apríl
Nánari upplýsingar á Tjarnarbio.is.
Darí Darí frumsýnir verkið Gibbla um helgina. Monitor ræddi við Ingu Maren
Rúnarsdóttur, dansara og danshöfund, um verkið og dansbransann á Íslandi.
Eins og
venjuleg meðganga
Myndir/Árni Sæberg
Við lánumþér ekki fyrir
tískuvikunni í NewYork