Monitor - 31.03.2011, Blaðsíða 12

12 Monitor FIMMTUDAGUR 31. MARS 2011
Fyrir áratug var Sauðkræklingurinn Auðunn Blöndal
að telja skrúfur á lagernum hjá Würth og keyrði um
á rauðum Hyundai Coupe. Eftir að honum tókst að
„væla sig“ inn á PoppTíví fór boltinn að rúlla og 70
mínútur, Strákarnir, Tekinn, Typpatal, Svínasúpan,
Atvinnumennirnir okkar og Auddi og Sveppi eru á
meðal þess sem hefur bæst á ferilskrána. Nú er á
teikniborðinu hjá Audda að gera kvikmynd upp úr
trailernum Leynilögga sem sló í gegn á dögunum. „Ég
hef alltaf verið hálfgerður aumingi og mömmustrákur,“
segir Auddi sem hefur húmor fyrir sjálfum sér en gerir
flest annað en að leggja í einelti.
Byrjum á byrjuninni. Þú samdir textann við lagið Án
þín sem samsveitungur þinn frá Sauðárkróki, Sverrir
Bergmann, sigraði Söngkeppni framhaldsskóla með
um aldamótin. Kunnugir segja að þú hafir verið
einstaklega stoltur af textanum. Er það rétt og ertu
jafnstoltur af honum í dag?
Já, eins asnalegt og það er að segja það þá er ég alveg
stoltur af honum. Ég reyndar monta mig ekki jafnmikið
af honum í dag og ég gerði fyrir tíu árum, en maður er
alveg stoltur af þessum texta þó að það sé ein og ein
lína þarna sem að hefði mátt fara öðruvísi.
Ég skæri mér hjartað úr með skeið...
Það er tekið úr myndinni Hrói höttur. Þar var einhver
svo reiður að hann vildi láta skera hjartað úr gæja
með skeið. Við vorum nýbúnir að horfa á Hróa hött
og þannig kom þessi lína. Félagi okkar, Árni Þóroddur,
hafði öskrað þetta á stelpu eftir ball í Miðgarði. Að
hann væri svo ástfanginn af henni að hann myndi
skera úr sér hjartað með skeið bara fyrir að fá að tala
við hana. Við grenjuðum úr hlátri og þetta fór í textann.
Ég auðvitað vissi ekki þá að þetta yrði spilað út um allt
og það kannski föttuðu ekki allir húmorinn.
Hvernig týpa varstu á menntaskólaárunum á
Sauðárkróki?
Ég var bara svona íþróttalúði og var mikið í körfubolta
og fótbolta. Svo var gert mikið grín að mér þegar ég
keypti mér rauðan Hyundai Coupe og menn töluðu um
að ég keyrði um á notuðu dömubindi. Ég fékk að heyra
það aðeins fyrir það. Amma greyið var líka alltaf að fá
einhverjar nótur því ég skrifaði bílinn á hana.
Hvenær fluttir þú í bæinn og hvað fórstu að gera?
Ég flutti í bæinn tvítugur og fór að vinna á lagernum
í Würth. Ég hálfskammaðist mín fyrir að vera að vinna
þar, sem mér finnst sorglegt að hugsa til í dag því það
er auðvitað bara gott hjá fólki að vera í vinnu. En þarna
voru allir vinir mínir komnir í háskólann á meðan
ég var á rauðum Hyundai Coupe í Würth að telja
skrúfur. Ég var alltaf að segja öllum að ég væri að fara
að gera eitthvað annað en það gerðist ekki neitt. Svo
loksins eftir tvö ár var ég búinn að væla nóg í Simma
(Vilhjálmssyni) um að fá að leika í falinni myndavél hjá
þeim og þannig byrjaði PoppTíví-dæmið.
Hvernig kynntist þú Simma og félögum og komst inn
á PoppTíví?
Ég var bara að væla í Simma á djamminu. Ég þekkti
engan af þeim en sagði við hann að ég gæti hjálpað og
svona. Ég var búinn að sækja um sex eða sjö sinnum
og þeir voru eiginlega bara orðnir þreyttir á að ég væri
alltaf að hanga þarna og betla í þeim þannig að þeir
gáfu mér séns. Það gekk vel og svo fór boltinn að rúlla.
Lendir þú sjálfur í dag í gæjum sem eru eins og þú
varst þá?
Já, ég kvarta ekkert yfir því. Ef fólk er að koma með
hugmyndir og annað á djamminu þá hef ég nú alltaf
hlustað á það, hvort sem það verður eitthvað úr því
eða ekki. Við höfum líka gefið fullt af strákum séns.
Við reyndum að vera með „Leitina“ sem gekk reyndar
ekkert alltof vel, en við höfum líka tekið menn inn í
þættina og gefið þeim séns.
Ef þú værir að flytja á mölina í dag, myndir þú sækja
um vinnu hjá Simma og Jóa á Fabrikkunni?
Ég viðurkenni það og myndi finnast það töff.
Sagan segir að þegar þú fluttir fyrst í bæinn hafir þú
sent þvottinn þinn norður til þess að láta mömmu
þína þvo af þér.
Já, ég er aumingi og hef alltaf verið, það er bara
þannig. Ég sendi henni þvottinn. Ég er reyndar byrjaður
að þvo af mér í dag. Skrýtið að maður skuli segja það
og vera stoltur af því. En ég hef alltaf verið hálfgerður
aumingi og mömmustrákur í mér. Ég held hún hafi
bara dekrað aðeins of mikið við mig. Ekki endilega
fjárhagslega en á allan annan hátt.
Ef við víkjum til dagsins í dag. Hvað finnst þér um
viðbrögðin við síðasta þætti ykkar Sveppa, þegar þið
fenguð Einar Bárðarson til ykkar, og ásakanir um að
þið séuð að hvetja til eineltis?
Ég er sammála Einari með að við höfum farið yfir
strikið og margt af því sem við sögðum og gerðum var
ekki sniðugt. En það var ekki gert í slæmri meiningu.
Hvorki ég né Sveppi myndi nokkurn tímann hvetja til
eineltis, það er bara ekki séns. Ég gerðist því miður svo
ljótur að leggja annan strák í einelti þegar ég var yngri.
Ég hef alltaf séð eftir því og hringdi í hann fyrir fimm
árum og bað hann innilegrar afsökunar, sem hann
kunni að meta. Ég hef alltaf verið á móti einelti og
hef meira að segja farið og haldið fyrirlestra í skólum.
Vissulega erum við Sveppi mikið að stríða hvor öðrum
í þættinum okkar. Einar Bárðar er að grenna sig fyrir
framan alþjóð og okkur kannski fannst við hafa of
mikið skotleyfi á hann. Það var rangt af okkur. Við
þekkjum hann vel og erum búnir að hitta hann í dag
og allt í góðu. Það sem mér finnst leiðinlegast er að það
á enginn að koma til okkar sem gestur og þurfa að sjá
eftir því eða líða illa með það þegar hann horfir á þátt-
inn. Ég fékk mestan bömmer yfir því og svo náttúrulega
ef fólk heldur að við séum að hvetja til eineltis. Það er
algjört rugl.
Umboðsmaður barna hefur líka kvartað undan ykkur.
Eruð þið að misstíga ykkur svona oft eða er fólk að
misskilja tilgang þáttarins?
Eftir öll þessi ár þá koma auðvitað upp móment þar
sem við misstígum okkur. En það er aldrei gert viljandi.
Við erum ekki að fá Einar Bárðarson í þáttinn til þess
að kalla hann feitabollu og gera grín að honum fyrir
að vera að berjast við aukakílóin. Þetta bara æxlaðist
þannig klukkan fimm um morguninn. Við meinum vel
þó að það séu sumir þarna úti sem haldi annað. Fyrst
og fremst erum við að reyna að skemmta fólki.
Varstu algjör skíthæll þegar þú varst í mennta-
skóla?
Ekki í menntaskóla. Ég tók sem betur fer
þroskakipp á einhverjum tímapunkti og
fór að haga mér eins og maður. En ég
var leiðinlegur krakki. Ég var hávær og
hlaupandi um á typpinu og svona.
Hvað fannst þér um að hlust-
endur X-ins skyldu velja þig
óviðkunnanlegasta celebið á
dögunum?
Ef ég á að vera alveg
hreinskilinn þá fannst mér
leiðinlegt að heyra það.
Ég held að það myndi
öllum finnast það
leiðinlegt. En ég er
ekki sammála því
að ég sé ókurteis
eins og einhverjir
sögðu. Ég hef
alltaf gætt að
því að vera al-
mennilegur
við fólk.
En þetta
var nú
ekkert
sem ég
var að
hugsa
meira út í.
Sveppi sagði
að þetta væru
fordómar því þú
værir svo sætur.
Ég veit nú ekki með það, en
það er fallegt af honum að segja það.
Ætlið þið að gera aðra þáttaröð af Audda og Sveppa
eftir að þessari lýkur?
Nei, það var ákveðið fyrir nokkru síðan að leggja
þáttinn á hilluna eftir að þessi þáttaröð klárast í byrjun
sumars. Þetta var lítið verkefni sem við áttum að fara í
á meðan við vorum að finna annað en svo er þetta búið
að vera í gangi núna í meira en tvö ár. Þetta er búið að
vera gaman en við finnum báðir að okkur langar að
taka að okkur ný og spennandi verkefni sem við getum
lagt aðeins meiri vinnu í. Við komum líklega með
eitthvað nýtt í sitt hvoru lagi næsta haust.
Trailerinn Leynilögga vakti heldur betur athygli.
Nú er orðrómur um að það standi til að gera alvöru
bíómynd upp úr honum.
Það er stór pæling í gangi. Boltinn er
byrjaður að rúlla en það er allt á byrj-
unarstigi. Það ætti ekki að koma á óvart
Texti: Björn Bragi Arnarsson bjornbragi@monitor.is
Myndir: Sigurgeir Sigurðsson sigurgeir@mbl.is
Alltaf verið
mömmustrákur
Auðunn Blöndal um væntanlegu kvikmyndina Leynilögga, brotthvarf Audda og
Sveppa af skjánum, einelti, fyndni, Sauðárkrók og hattapokann sem er ekki heilagur.
AUDDI Á 70 SEKÚNDUM
Uppáhaldsviðmælandi? Útlenskur er
Jamie Foxx, mér fannst geggjað að
taka viðtal við hann. Ætli íslenski sé
ekki Óli Stef.
Uppáhaldslyftingaæfing? Bekkpress-
an.
Uppáhaldsstaður í heiminum?
Skagafjörður.
Það versta við Sauðárkrók? Lítill bær
og baktal.
Tindastóll eða Manchester United?
Úff, ég verð að segja Manchester
United.
Fyndnasti maður sem þú hefur hitt?
Pétur Jóhann Sigfússon.
Mesta ógeð sem þú hefur drukkið
í ógeðsdrykk? Fish Sauce. Það er
algjör viðbjóður. Ég held hún sé sett
í mat til þess að skemma hann. Það
og lýsi. Undir lokin vorum við búnir
að finna léttu leiðina að því að gera
ógeðsdrykk. Ef þú settir Fish Sauce og lýsi þá varð allt
ógeðslegt.
Friðrik Dór, Friðrik Þór eða Hannes Þór? Frikki Dór er
eiginlega sá viðmælandi sem hefur komið mér mest á
óvart síðustu ár og Hannes er auðvitað snillingur. Eigum
við ekki að segja að Frikki sjái um tónlistina, Hannes
leikstýri og við Friðrik Þór förum á barinn.
Auðunn Jónsson kraftajötunn eða Auðun Helgason
knattspyrnumaður? Best of both worlds bara.
Hraðann eða lífið? Lífið.
Ég er reyndar byrjaður
að þvo af mér í dag.
Skrýtið að maður skuli segja
það og vera stoltur af því.