Árbók VFÍ/TFÍ - 01.06.2011, Side 211

Eins og áður hefur komið fram var hönnun Ramböll fyrir hrun eingöngu hálfkláruð og
ein af afleiðingum þess var sú að ekki lágu fyrir magntölur. En magntölur í öllum verkum
eru grundvöllur allrar verkstýringar, bæði við framkvæmd og efniskaup. TK hópurinn
vann að gerð magnskráar fyrir hrun haustið 2008 en hún byggðist á hálfkláraðri hönnun
Ramböll, eins og fyrr segir, og þekkingu verkefnastjóranna á verkinu. Þessi magnskrá var
notuð sem grundvöllur viðbótarsamnings ÍAV og Portusar frá því í mars 2009 og einnig
var hún notuð til að halda utan um eftirstöðvar á innheimtu samningsins.
Verklok
Segja má að frá undirritun viðaukasamningsins í mars 2009 hafi verkið loks farið í
hefðbundið ferli allt til verkloka.
TK hópurirtn var samhentur og vann á þessum tíma að því að koma öllu verkinu í það
ferli sem var nauðsynlegt til að ljúka því með sóma.
Frá miðju ári 2007 vann TK hópurinn sleitulaust að því að koma verkframkvæmdinni í
farveg en skorti alltaf þau verkfæri sem voru nauðsynleg. Hópurinn var í þeirri stöðu að
þurfa að vinna með Ramböll svo þeir mættu ljúka hönnuninni og á sama tíma áttaði
hópurinn sig á því að sú vinna var til einskis þar sem Ramböll lagði ekki fram þá vinnu
sem var nauðsynleg til að klára hönnunina til fulls.
Ramböll lagði sannanlega grunninn að hönnun allra kerfa og var hún ekki með öllu
ónothæf. Gloppurnar voru þó svo miklar að það var aldrei hægt að treysta því að vinna
mætti eftir gögnunum á fullum krafti. TK hópurinn tók því fagnandi þegar Mannvit kom
að verkinu í apríl 2009 til að fullklára verkið. Fyrsta verk ÍAV og Mannvits var að meta
stöðu hönnunar og skipuleggja hvaða þætti hennar ætti að setja fremst í verkröðina.
Segja má að frá því í apríl 2009 hafi verkið farið í „hefðbundið" íslenskt ferli, þ.e.
framkvæmd og hönnun var unnin samhliða, en þó er þetta verk frábrugðið öðrum hér á
landi að því leyti að umfangið er miklu meira.
Reynslan sýnir okkur að íslenskir hönnuðir eru fullfærir um að sinna verkefni af þeirri
stærðargráðu sem Harpa er en hugsanlega þyrftu þeir að bæta við sig sérþekkingu sem
ekki fyrirfinnst hér á landi. Það er mat greinarhöfundar að heppilegra sé að sértækrar
þekkingar verði aflað af hálfu hönnuða og í framhaldinu beri þeir ábyrgð á hönnun og
verkstjórn.
Segja má að á bak við framkvæmdina sé erfið og flókin saga sem fáir þekkja. Hér er reynt
að bregða ljósi á hvað gekk á á milli hönnuða og verktaka og hvaða áhrif hún hafði á
framkvæmdina.
Allir þeir sem þekkja til byggingarframkvæmda vita hversu mikilvægt það er að öll
hönnun liggi fyrir áður en framkvæmd hefst eða að minnsta kosti einhver lágmarks
hönnun sem byggja má á og treysta svo framkvæmdin geti gengið snurðulaust fyrir sig.
Það er mat greinarhöfundar að TK hópurinn hafi unnið með besta hætti úr þeim gögnum
sem voru til staðar hverju sinni og að framkvæmd og niðurstaða verksins sé þeim og 1AV
til sóma.
Kynning og tæknigreinar fyrirtækja og stofnana i 209