Siglingamál - 01.06.1973, Blaðsíða 3
3
INNGANGUR
Grein 1.1.
í október mánuði árið 1956 kom út 1. tölu-
blað Tilkynninga frá Skipaskoðun ríkisins. Alls
komu út 10 blöð þessara tilkynninga, það síðasta
í janúar 1962. Síðan gaf Skipaskoðun ríkisins
þó áfram út umburðarbréf um einstök atriði, er
varða leiðbeiningar um smíði, viðurkenningu á
tækjum og búnaði til skipa og fleira er varðar
smíði, viðhald og öryggi skipa og búnaðar þeirra.
I tilkynningunum voru einnig birtar ýmsar
aðrar leiðbeiningar, upplýsingar og fréttir af
vettvangi stofnunarinnar, svo og alþjóðlegar
fréttir um alþjóðasamvinnu um skipaöryggismál,
siglingamál, varnir gegn mengun sjávar o. fl. Ut-
gáfa tilkynninga Skipaskoðunar ríkisins lagðist
niður vegna anna starfsmanna og talið var að
umburðarbréfin gætu komið að álíka gagni. Sú
hefur þó ekki orðið reynslan, og véfengt hefur
verið hvort dreifing umburðarbréfanna hafi ver-
ið nægilega almenn til að þau næðu tilgangi
sínum. Auk þess hafa margir saknað þeirra ýmsu
upplýsinga, sem fram komu í tilkynningunum
en ekki í umburðarbréfunum. Vegna þessarar
reynslu hefur nú verið ákveðið að Siglingamála-
stofnun ríkisins hefji útgáfu tilkynninga í líku
formi og Skipaskoðun ríkisins gerði áður, og
birtist hér fyrsta blað þessarar endurnýjuðu út-
gáfu. Fjöldi tölublaða á ári verður miðaður við
nauðsyn á hverjum tíma, en gert er ráð fyrir
að minnst tvö blöð komi út árlega fyrst um sinn,
vor og haust. Verða umburðarbréfin, eða efni
þeirra endurskoðað, birt smátt og smátt, svo og
viðurkenning tækja og búnaðar til skipa og
aðrar gagnlegar upplýsingar, leiðbeiningar og
fréttir á þeim vettvangi, sem Siglingamálastofn-
un ríkisins starfar. Er þess vænzt að rit þetta megi
verða gagnlegt sem tengiliður milli stofnunar-
innar og þeirra fjölmörgu aðila, sem hún þarf
að hafa náið samstarf við, þar á meðal sjómenn,
útgerðarmenn, forstöðumenn og iðnaðarmenn
skipasmíðastöðva og vélsmiðja, rafvirkja, sýslu-
menn og bæjarfógeta (skráning skipa og mæl-
ing), skipaskoðunarmenn, svo og alla þá aðra,
sem í starfi eru tengdir sjósókn og siglingum,
þar með talið öryggi á sjó, björgunarstörfum og
vörnum gegn mengun sjávar, svo nokkuð sé
nefnt. Siglingamálastjóri.